2006年 12月，阿佘蒲夜店溝掂同官恩娜冷戰緊嘅吳卓羲。 2007年初，吳卓羲以 Audi溝女戰車，載阿佘到港澳碼頭，親密關係不言而喻。
當年今周
我要做第二個阿佘！
世姪女有日搵媽咪姐哭訴：「 Auntie，又一年我又老一歲啦，仲未搵到男朋友點算吖？」哎喲，僭建唔係一日建成，搵男朋友都唔係一擊即中啦！
大家不妨學吓佘詩曼咁積極。早前先喺苗僑偉嘅 party一晚𠝹四男。追溯歷史，除咗早期嘅張智霖、陳浩民， 2007年 1月第 599期，《忽周》影到佢同吳卓羲同車，曖昧到暈。之後仲有鄭嘉穎、胡軍……緋聞真係水蛇春咁長。
當時住北角嘅阿佘準備去澳門工作，但上車地點竟然係吳卓羲位於將軍澳嘅屋苑。阿佘更思縮匿喺車廂後座，無私顯見私啦。
被斷正嘅吳卓羲，一見記者影相即耷低頭掩面，如果係冇嘢嘅，唔需要咁避忌啫。
可能大家會疑惑，咁樣會唔會搵到真愛？搵多啲 chance識男仔點都好過一碌木坐喺度等人追啩。
Come on，今時今日我哋可以高聲表達對政府不滿，點解唔可以大大聲求愛？唔賭唔知時運高，唔出去溝仔又點知自己原來咁鬼好。各位姊妹，今年努力呀！
檔案編號第 599期
日期： 19/01/2007
緋聞一籮籮
2000年拍攝《十月初五的月光》，阿佘公然瞓張智霖大髀。後來兩人再合作《跑馬地的月光》，靚靚日日監場，防止阿佘黐老公。
2002年跟陳浩民合作《情緣汽水機》而撻着，但男方到處留情，女方於 2007年斬纜。
阿佘於 2006年跟《鳳凰四重奏》嘅馬德鐘傳緋聞。有指馬太張筱蘭當時嬲到要帶埋兒子出走法國，幾乎婚變咁滯。
鄭嘉穎與阿佘結緣於 2008年《法證先鋒 2》，男方為阿佘狠飛當時女友周麗淇，不過戀情維持兩年左右，於 2010年分手。
2012年初，阿佘於內地拍攝《建元風雲》，跟拍檔胡軍混熟。兩人被目睹於酒店撐枱腳三粒鐘，上車時男方更輕攬女方纖腰，相當親密。
留言列表
{{ article.title }}
