媽咪姐
新抱獻技
女人愛晒命，躋身上流社會嘅一眾名太仲鍾情演嘢。三位來自不同豪門嘅新抱仔，近日就不約而同出席活動較量較量！
霍家新抱郭晶晶
變臉神功
最近有傳婚變嘅霍家新抱郭晶晶，周二（ 8日）出席護膚品活動時，竟然一反常態，接受現場傳媒訪問。不過名媛向來報喜不報憂，當有傳媒問及婚變一事時，晶晶就笑臉變黑面，戲都費事交。
晶晶一聽到唔對路問題就當堂冇晒表情，助手仲一支箭跑出嚟擋駕。連呢啲問題都經唔起考驗，點躋身波譎雲詭嘅名媛堆呀！
晶晶喺個助手包圍下，話咁快就走入後台拒做訪問，令現場記者鼓譟，連大會司儀陳芷菁都面露尷尬神色。
四叔新抱徐子淇
晒文學修養
李兆基同李家誠周日（ 6日）帶埋徐子淇到香港大學見識，其間千億新抱就自爆老爺窒佢中文差。與此同時，媽咪姐發現佢當日唔用 Chanel等大牌手袋，刻意拎咗個以美國文學家 F.Scott小說封面設計嘅手袋，潛台詞應該係「我中文唔好，但我有文學修養！」
徐子淇驚記者睇唔到，特登拎高啲俾大家影相，好幫手。 F.Scott係美國已故小說家，徐子淇當日拎住嘅手袋就以 F.Scott遺作《 The Last Tycoon》封面作為圖案。
雖然徐子淇將焦點放晒喺佢手袋度，但媽咪姐發現佢左腳小腿有個幾明顯嘅傷疤，陰功咯。
恆生新抱何倍倩
打孖晒
何倍倩懷孖胎，難怪當晚活動搞手王大業都要扶實佢出場。
已經育有三歲囝囝嘅恆生新抱何倍倩，周一（ 7日）出席皮草活動時，就自爆腹中唔止得一個 baby。佢話：「應該係 twins嚟！我真係肥咗好多，趁依家仲可以見得下人先撐下老友場。」 
全站熱搜
留言列表
{{ article.title }}
