吹笛亦是自學。「我懂看 12345的音譜，故識吹。曾有遊客讚我吹笛好聽，因是用心來吹。記住這話，教書時總跟學生說，世上無難事，只要用心做。」

Voice

九龍城撕紙王

2013年01月11日 ~~ 第911期忽然１周

敏叔 13年來風雨不改，每天都在寨城公園打躉，教人撕紙。他讀書不成，拿綜援度日，妻離子散，卻因撕紙成名，受傳媒追訪，到處表演，不停做義工教撕紙，為的是一份堅持，更多是用生命影響生命。

互動片段

九龍城寨撕紙王

敏叔撕紙有幾威？連阿布扎比王子一家來港度假，都請敏叔到其入住的半島酒店總統套房，教他的兩名寶貝兒子學撕紙。

13年前，由屯門搬來九龍城，偶然來到寨城公園，發現這地方好正，開始天天來打躉。我同人講在公園有 4大任務：帶遊客認識公園歷史；推廣撕紙藝術；吹笛娛己娛人；幫遊客拿相機影相。
我經常跟公園職員說，要當自己是旅遊大使，遊客俾部相機你幫忙影相，唔可以耍手擰頭，否則別人會怪你無禮貌。我唔係公園職員，義工都稱唔上，亦無人要我咁做，只因要盡地主之誼。有人唔鍾意，但我唔理。
我學歷唔高，從小考試都拿零分，只是做速遞，但熱愛中國文化，覺得有責任把公園的歷史介紹給遊客。每遇到導賞團，就黐埋去聽，又同街坊傾偈。識多咗，把所有資料融會貫通，遇到遊客，自行同他們講公園歷史，一講三、四小時。
經常傳真給古物古蹟辦事處處長，投訴有導賞員要再培訓。像這些穿越牆壁的出入口叫「月門」或「洞門」，唔可以叫做「窿」；又好似涼亭內不能移動的是「中堂」，唔係「屏風」，亂咁講會俾人笑囉。（公園又唔係你的，關你乜事？）公園是歷史文物，歷史無得呃，要講就要講正確的，點可以用個人意思去演繹歷史。

他兩手猶如剪刀，沒起稿，輕鬆撕出「忽然一周」四字。是天生能撕紙？「絕對不是，就算教學生，我都說要多練習。其實，大過兩歲、手指能動，把左手食指和右手大拇指做成剪刀狀，在紙上把不要的紙屑撕出來便可。撕紙能訓練自信、轉數和耐性。」不忘推廣。

撕出彩虹

我在廣州出生，中學時來港，讀書不成，在老竇的製衣廠做簿記。結婚，生了一女。但唔鍾意做生意，輾轉做過收帳、外勤。後來年紀大，惟有做速遞。人生平平無奇，直至 30年前的一個舊曆年，用揮春撕了「大吉」二字，家人個個讚好，還貼起爭相拍照。後來朋友發現我會撕紙，迫我撕更多作品，才開始練習。由撕對稱的字和圖案，到撕不對稱的字和圖案，從來唔起稿，愈撕愈上癮。
坐地鐵、等𨋢、吃飯，都拿着紙撕。試過有地鐵乘客看得入神，過站忘記落車。有傳媒問我在家會否撕，我答無人睇，撕嚟做乜？我表演慾好強，愈多人看愈開心，故不放過任何一個表演機會，別人欣賞，我就開心。
記得 13年前太太要跟我離婚，話性格不合，仲帶埋個女走，非常傷心，當時住 25樓，打算開窗跳下去。突然想起姐夫讚過我撕紙的手藝，說有「空間概念」。他是大學教授，為人自負，都讚，覺得自己都有價值。把伸出去的一隻腳縮回來，死唔去。決定搬來九龍城，被我發現寨城公園這裏有好多遊客，開始在這裏撕紙。
後來，電台訪問我。又在文化中心、天星碼頭擺檔推廣。更到學校、社區中心教學。認識我的人愈來愈多，我亦唔吝嗇教人。有電視台問我唔怕自創的手工藝被人學會後，教識徒弟無師傅？我即場鬧佢，話中國咁多傳統手工藝，點會因這句話而被埋沒？唔可以咁自私，只要有人肯學，我就肯教，拍埋整個過程都無問題，因為我要把這藝術發揚光大。
我拿綜援，只夠交租和基本生活，衣服鞋襪都是執回來的，但我堅持去不同地區教學。我教過殘障人士，看到斷手的用半截手按着紙都要學，好感動。別人的一個動作、一句說話，往往是種鼓勵和鞭策。我以往就是無人鼓勵，讀書不成。現在教人，經常鼓勵學生，要珍惜青春，唔好似我。

畫家朋友為他創作的 logo。

第一次撕的「大吉」。相只得一半，因旁為太太和女兒。「上次經驗，怕她們唔鍾意，都係唔好出佢哋嘅樣。」說隨緣，卻仍緊張。

因為訪問，他把作品攤開讓我們拍照，但平時他在公園只是齋撕紙以吸引遊客。

聖誕節，在太古地產「 Happy 40th Street Party慶祝創建社區 40年」活動示範撕紙。教學時，他常以個人經歷鼓勵學生。

今生無悔

特別用自己、太太和女兒的生肖撕成的圖案，你說他有否想念她們？

父親已過世，兄弟姐妹少聯絡，太太和女兒亦一直無機會見。我今年 68歲，有傳媒問我最想做甚麼？我答是見女兒。她今年 30歲，可能已做人媽咪。十多年來，我經常出鏡，其實她有很多機會找到我。但都無。
我惟有安慰自己，可能她在我面前出現過，係我認唔出啫；又或佢出街常同媽咪一起，怕媽咪唔鍾意，故不敢走來認我。
曾有報紙登了女兒小時候的相片，說幫我尋親，卻無回音。朋友怪我這樣做可能會令女兒更恨我。無計，一切隨緣。
現只希望把撕紙藝術傳承開去。記得姐夫曾用四個字來形容我：「無悔今生」。（突然雙眼通紅，聲音抖顫）每次想到這……就好激動……會不自覺流眼淚，但我覺得自己承受得起。