唯一可取是裝修，光猛企理，地方大，但枱與枱之間都幾逼。

試食王

靚裝信唔過

2013年01月10日 ~~ 第1192期香港《壹周刊》

九龍城咁多間泰國菜館，要揀一間，照常理推斷，多人排隊，差極有限。人龍店小曼谷最近擴充營業，分店在衙前塱道街角，霓虹招牌勁搶眼。唔似舊店及同區地踎小店，裝修光鮮有型，電視播住泰國歌手演唱會，氣氛唔錯，座位旁仲有結他同音響，雖然試食當晚冇人唱，但地方夠大，座椅比舊店舒服得多，至少唔使坐摺櫈，仲有一排室外位，營造泰國街頭 feel。平日未到七點半已經九成滿座，隔籬枱係 JJ賈曉晨同陳奐仁，唔使去高級餐廳都可以睇明星，心諗實冇死。

舊店招牌菜仍然保留，加咗唔少新款，勁多選擇，部分菜式加價$8至$10，本來都以為合理。新店主打海鮮燒烤，有鹽燒阿拉斯加長腳蟹、原隻鮑魚等貴價菜，問吓侍應有咩推介，佢敷衍地指指餐牌：「呢啲都係新嘅。」一句菜名都冇提過，就走咗去。忙到完全唔得閒招呼你，好彩之後幾有禮貌，補番數。菜式好快上晒枱，大都虛有其表，賣相靚仔但味道麻麻。飲品比以前大縮水，細杯到幾啖飲晒，冰多過水，飲咗兩杯都嫌少。必食的生蝦刺身有乾冰伴碟，造型一流，但最重要的生蒜辣椒竟然欠奉。燒大蜆同燒生蠔大大隻，有炸白飯魚仔裝飾，睇落好吸引，但只得蒜茸味，唔鮮甜，燒物同生蝦都係蘸同一款醬汁，好冇誠意！冬蔭海鮮炒扁意粉看似有新意，但意粉腍過茶餐廳貨色，冬蔭功味唔出，直情要用難食來形容。燒雞連樣都唔合格，斬到形狀唔似雞，肉質又乾又嚡。愈食愈唔對路，叫個最穩陣嘅甜品定驚，芒果涼粉大半碗都係冰，仲要收我$40。埋單接近七嚿水，有冇搞錯！舊店冇裝修冇招呼，至少好食抵食。在九龍城紮根十多年的小曼谷，明明同一個老闆同一個班底，冇理由唔知客人來得這區食飯，環境唔係最重要一環，無謂打爛招牌，將心機放番入食物度仲好啦。

燒脆皮白鱔$88
比較好食，皮脆肉嫩，調味啱啱好，不過餐牌寫住時價，結果$88得兩嚿。

小曼谷五星燒雞$88/半隻
我食過最唔似雞的雞，雞肉似柴皮，骨頭又碎又尖，食完有陰影。

冬蔭海鮮炒扁意粉$78
海鮮有切到碎晒的帶子、魷魚及青口，意粉加埋醬汁一澼澼，得個辣字，唔掂。

牛油蒜茸燒生蠔$88
生蠔肉厚，但冇燒烤香，入口同燒大蜆味道完全一樣，都係蒜味。

泰式生蝦刺身$80
一上枱煙霧瀰漫，蝦肉爽口彈牙，算好食，勝在無加價。

椰香芒果涼粉$40
墊底的冰粒唔係碎冰咁細，用來食定係保溫？加埋毫無椰香的椰汁，個杯有幾靚都冇用。

透明玻璃見到廚房勁繁忙，窗前海鮮船放滿長腳蟹、大蜆等海鮮。

評分

食物：★★
服務：★★★
環境：★★★
價錢：★★

小曼谷海鮮燒烤屋

地址：九龍城太子道西 398號　御．太子 1-3號地下
電話： 2716 7868

飲食特務 B
Mango Tree過海開分店

高級泰菜店 Mango Tree近日進駐圓方，加入多款新菜式，包括青芒果軟殼蟹沙律、酸辣泰薑龍蝦湯等，用上來自泰國的有機香草及香料。新店設計富特色，面積亦比舊店大，飽覽維港靚景，更有氣派之餘，全日營業，下午茶時段指定飲品買一送一，可以對住日落 happy hour。

香辣大蝦椰汁湯$168

Mango Tree
地址：尖沙咀柯士甸道西 1號圓方 2樓 2032號鋪
電話： 2668 4884