郭羨妮向老公撒嬌：成日揼佢－娛樂八掛大放送★

郭羨妮向老公撒嬌：成日揼佢

娛樂圈最近喜事重重，去年與內地武術指導朱少杰結婚的郭羨妮（Sonija），早前宣布「造人」成功，懷孕3個多月，但她未有因而錫身，除着高踭鞋出席活動外，在家又周圍郁，令老公大為緊張！這位準媽媽將一連5日大談成長經過，由讀書到做空姐及選美，並細數圈中密友！

口述：郭羨妮　筆錄：專案組

懷孕初期，我好唔舒服，嘔得好犀利，又怕去嘈嘅地方，但依家冇乜唔慣，已經冇嘔，只係半夜會好肚餓囉！我都係鍾意食啲酸嘢同鹹嘢，同其他孕婦一樣，冇乜特別，但我冇食補品，只係飲湯同食多啲生果，亦冇特別戒口，我一向食嘢都好健康。

感受BB心跳

因為未調理好身體，所以我已經停工休養，依家身體OK，但如果拍劇就唔得o架喇！因為成日，唔會好似以前咁有動力，依家想舒服啲，總之一就休息，都瞓得幾多呀！情緒方面冇乜特別轉變，唔會成日覺得好忟，但老公喺度，我就會發脾氣，搵佢出氣，所以成日揼佢，要佢哄吓我！

依家冇特別嘢做都會留喺屋企，我不嬲唔係好出街，但要Keep住照超聲波，照嗰刻真係好奇妙、好開心，Feel到佢個心喺度跳，真係好得意。老公成日做嘢唔喺香港，都係我自己去照，但有畀番佢睇，佢一路都好想有BB，一結婚已經話想生，依家有咗，佢梗係好開心！

有喜等同福氣

有BB當然開心，全家人都好開心，我覺得呢啲係福氣，唔係咁容易，而我有一種好期待嘅感覺，真係好想快啲生BB出嚟，想睇吓佢係咩樣，可能依家個肚唔係好大，等遲啲再大啲，心情就會緊張啲。反而老公好緊張，有時我成日郁來郁去，佢就話：「你唔好郁得咁犀利啦！」有時我貪靚着高踭鞋，佢雖然冇話唔畀，但會好緊張，叫我小心啲！

我會喺香港生BB，產房都Book咗，暫時只係諗住生一個先，其實仔女都冇所謂，但老公就想要女。雖然個肚未大，但我諗過BB出世之後嘅嘢，好似送唔送佢去外國讀書呢！不過名就未諗，依家仲早，最緊要係開開心心，BB健康咁就得o架喇！

惡補孕婦須知

依家唔使做嘢，得閒就會睇書，學吓孕婦須知，我冇經驗，睇吓呢方面嘅知識會好啲，有時都會睇吓飲咩湯水有益，為自己補充營養。當然，BB用品我都有留意，老公有時都會講吓BB經，佢留意到啲BB用品都會同我講，但未有諗過買定，依家仲早，遲啲先諗，因為仲有好多時間。