即將約滿環球的樂壇天王陳奕迅（Eason），掀起各大唱片公司爭奪，除了Neway動用無上限支票利誘外，東亞唱片老闆林建岳更盛傳動用四千萬銀彈攻勢力 邀Eason簽約三年，雖然Eason講到明以環球為首要考慮，不過最近卻改口話冇跟公司傾過續約問題，睇留環球機會都幾微。

本刊得到可靠消息，指Eason將簽約東亞旗下的華星唱片，唔只有個大水喉林建岳射住，仲有同期入行、無所不談的老死楊千做同事，仲可一圓回歸華星的夢想，一舉三得，唔走就笨。

近年，陳奕迅在樂壇的地位絕對可以稱得上係無出其右，在剛過去的《新城勁爆頒獎禮》及《叱樂壇頒獎典禮》上共奪11.5個獎，成為暫時的大贏家，無論開個唱、出新碟一樣賣個滿堂紅，又深得台灣、內地樂迷歡迎，難怪約滿在即，即引起唱片公司爭奪戰。

—價高者得—

即將約滿環球旗下新藝寶的陳奕迅，盛傳已跟其他公司洽談合約事宜，有傳Neway唱片公司出動無上限支票利誘陳奕迅加盟，條件是要與陳家瑛一齊做Eason的經理人。

另一方面，早前笑言要5億賣身俾東亞的Eason，亦獲東亞唱片垂青，出動四千萬簽約三年的條件力邀合作，以銀彈攻勢及揀歌自由度吸引Eason考慮，不過環球高層黃劍濤就笑指Eason唔會睇銀碼係幾多，但就被傳以《叱頒獎禮》的男歌手金獎作為續約條件；如今Eason雖然大獎在手，也並非代表會留守環球。

—口供唔夾—

上月被指引來各大唱片爭奪的Eason，曾言「跟環球合作了6年，係環球將我推到另一個層次，會以環球為首要考慮」，表面上，情深義重，續約機會大，面對金蛋被爭，環球高層黃劍濤出埋口術：「好幾個月前已經同Eason經理人傾緊續約事，我已經開個價俾佢，家只係等緊佢答覆，公司對佢續約有信心。」不過Eason出席過月初頒獎禮後再被問及去留問題時就話，「其實真係未傾呢，我同環球仲有好耐約，都仲有兩張唱片未做，合約事要時間考慮。」公司高層話傾，當事人又話未傾，似乎神女有心，襄王無夢喎。

—老死做媒—

陳奕迅被問到會否由好友楊千嬅穿針過檔東亞時，曾以「我唔講公事」回應，不過據知，Eason一直希望與同年出道的千嬅回歸華星年代。去年5月，千嬅簽約華星成為傳奇，早前華星出身的劉浩龍也加盟其中，加上東亞旗下還有鄭秀文、許志安、蘇永康、何韻詩等華星同學仔，絕對可以完成Eason「叫埋成班華星兄弟姊妹開騷」的心願。知情人透露，「岳少向來都好欣賞Eason，兩年幾前都曾經斟洽過Eason過檔，今次更加係至在必得，出動到半億簽三年條件，加上千嬅做中間人不斷游說，Eason終於都點頭，其實Eason都好睇千嬅頭。」

—高下立見—

同人唔同命，Eason約滿環球新藝寶引起唱片公司激烈爭奪，不過同屬環球旗下的李克勤，約滿在即就幾乎無人問津，只有BMA的羅傑承盛傳曾與克勤接洽，對此克勤曾承認：「佢的確係斟我簽約，但係南華元老隊，與音樂無關」，並透露自己將留守環球。

去年，因四大唱片公司版稅問題與無反目，連累無契仔李克勤曝光率及人氣大減，日日匿埋屋企專心湊仔湊老婆，幾近令人遺忘，難怪同與Eason約滿在即，一個成為搶手金蛋，一個就選擇無多，唔留環球仲去得邊？

深｜交｜15｜年

楊千嬅與陳奕迅同於1995年參加第14屆華星新秀歌唱大賽加入樂壇，其後盛傳曾經相戀，不過戀情告終後保持好朋友關係至今，千嬅更曾明言Eason是她圈中最好的朋友。

同道中人

1995年，Eason與千嬅一同參加華星新秀，Eason得冠軍，千嬅得季軍。

電影拍檔

01年，二人合作電影《百分百感覺II》，至07年再合作《每當變幻時》。

個唱嘉賓

去年10月，千嬅舉行演唱會，首場便找來Eason任嘉賓，合唱《姊妹》。

老婆代表

上月20日及24日，楊千嬅舉行婚宴及結婚派對，Eason人不在港也派老婆徐濠縈代表出席。

各｜出｜奇｜招

無上限支票

有指Neway唱片老闆薛嘉麟出動無上限支票宇宙價力邀Eason加盟，條件是要與陳家瑛一同做其經理人。

4千萬利誘

有指東亞老闆林建岳開出4千萬天價簽三年的條件斟洽Eason合作，陳家瑛則繼續做其經理人。

動用人情牌

環球以合作6年的人情牌斟洽Eason續約，更出口術表示Eason唔會睇價錢，「佢可以睇到公司點幫佢。」

風｜起｜雲｜湧

近年，樂壇是非不斷，先有四大唱片公司因版稅問題與無鬧翻，再有個別唱片因不滿頒獎禮制度而杯葛，難怪天后容祖兒以「風雲變色」形容現今樂壇形勢。

四大變五

BMA於上月21日加盟香港音像聯盟有限公司（HKRIA）與四大唱片公司為盟，即被無列入杯葛名單。

杯葛港台

港台頒獎禮取消「四台聯頒大獎」卻臨時增設「傳媒推薦大獎」，令英皇、東亞唱片公司感不公平而決定缺席頒獎禮。

A Music抗議

A Music因歌手在商台頒獎禮捧蛋，而力斥商台DJ不喜歡播放旗下歌手的歌曲，決定今年不再出席商台活動及不派歌。

金牌地震

金牌大風主席鄭東漢於去年底突然宣佈退出公司，翌日黃高也宣佈離開公司，發展飲食生意。

 

arrow
arrow
    全站熱搜

    stinglife 發表在 痞客邦 留言(0) 人氣()

    E-mail轉寄