剪髮修甲同步進行，絕對係分秒必爭。（羅國輝攝）

八卦陣

林鄭髮廊執笠

2013年01月10日 ~~ 第1192期香港《壹周刊》

正當行騙長官周身蟻，人人喊打之際，大火燒唔到自己身上嘅政務司司長林鄭月娥似乎過得好優哉游哉。早前，記者就撞到啱啱喺沙田香港體育學院出席完活動嘅林鄭，單拖去灣仔軒尼詩道恤髮兼修甲。

林鄭似乎係呢間「 Cut& Sharp Salon」嘅熟客，一入 Salon，即刻有人招呼佢。除低眼鏡嘅林鄭，同普通師奶無乜分別，記者望咗好耐，都差啲唔認得佢。兩位姐姐一齊服侍林鄭，邊恤髮邊修甲，全程五十分鐘搞掂，埋單只係二百蚊多啲，認真實惠！
據 Salon嘅員工表示，林鄭通常都係星期日參與彌撒後或者平日 lunch time幫襯，份人好 nice好易話為，之不過，林鄭呢頭幫襯完，嗰頭間 Salon就已經執笠；原來業主大幅加租六成，每個月大拿拿加多十幾萬租，生意做唔住，上星期已經關門大吉。（林璐菁）

林鄭民望高，出席完活動夠膽單拖行去灣仔 Salon；俾着係 CY，掟蕉都似。（羅國輝攝）

係人都知唔准著高踭鞋落跑道，但林鄭照著可也，莫非真係官字兩個口？（羅國輝攝）

林鄭幫襯完無耐，呢間 Salon已經執咗笠。（羅國輝攝）

吳得掂小學雞定鵪鶉？

陳方安生前排同傳媒茶聚，話題自然離唔開政府表現，當中局長、副局長嘅人選更加係大家關注嘅焦點。陳太有讚有彈，好似環境局副局長陸恭蕙咁，佢就話委任得啱，因為佢有聲譽，容易俾市民接受。
至於其他無聲譽又無表現嘅人呢？陳太就講到明，有啲局長唔稱職，唔明點解仲可以留喺度！講緊邊個？教育局局長吳克儉是也！
陳太不留情面咁話，「吳得掂」根本無能力自己出嚟講述政策，每次都要奶媽林鄭企响側邊，成個小學生咁！咁究竟成隻鵪鶉嘅「吳得掂」係咪應該自己摺埋，引咎辭職呢？陳太就話呢個問題留番俾 CY喎！（馮普賢）

正一小學雞！（設計對白）
陳太話，唔明點解仲有唔稱職嘅局長可以留低。（鄭樹清攝）

每次林鄭同吳克儉一齊出嚟，都係由林鄭講晒。吳得掂何止係小學雞，簡直就係鵪鶉！

開會定開拖？長毛元秋互片

星期五立法會財委會今年第一次開會，要開始審議防止拉布嘅「五加二」方案，即係要求議員喺提出議案時，必須最少在五天前以書面通知秘書處，而若果再追加修訂，就要最少兩天通知期。
點知會議期間，葉國謙提出中止待續，直接討論佢提出嘅「限制議員發言次數」動議，想加速議會自閹！長毛當然㷫到爆炸，不斷大鬧民建聯無恥。
一見長毛發惡，葉國謙即時「笠水」，反而政壇元秋蔣麗芸就發狂，叉晒腰大叫長毛「 Shut up！」結果被長毛反寸佢愛國愛到唔識中文，元秋亦忍唔住氣改口嗌︰「閉嘴！」
長毛元秋你一言我一語，雙方好似鬧八婆交咁，鬧到火紅火綠，嚇到葉國謙反過來要拉住元秋，叫佢冷靜啲。睇怕香港嘅立法會，遲早會演變成台灣議會咁，開會變開片，遲早大打出手。（馮普賢）

你信唔信我打鑊你！（設計對白）
長毛俾主席叫佢坐低，不過佢坐低都係繼續鬧。（羅國輝攝）

我驚你呀！（設計對白）
你唔夠佢打就唔好嘈喇！（設計對白）
政壇元秋鬧到出埋真火，葉國謙都驚咗，即刻安撫佢。（羅國輝攝）

警隊畫得

警察書畫學會搞畫展，一哥曾偉雄俾面出席，仲不斷大讚啲畫畫得好好，愈講愈浮誇，話「畫入面啲人好似郁緊咁」！
讚到天上有地下無，皆因禿鷹太劉綺華都有畫作參展，記者唔識欣賞，但禿鷹就講到明：「太太畫嘅一定係最靚！」
除咗禿鷹老婆，前警務處副處長（行動）任達榮，同曾經偵破立法會議員何俊仁遇襲案及赤柱皮篋藏屍案、人稱警花嘅李雅麗都有作品參展，估唔到佢哋都畫得一手好畫。（馮普賢）

本週圖片

前二哥任達榮退休後，畫嘅畫都特別祥和。（羅國輝攝）

老公大讚愛妻幅畫係最靚，禿鷹太笑得特別冧！（羅國輝攝）

估唔到人稱「警隊梁詠琪」嘅高級警司李雅麗，油彩畫都得得哋！
（《蘋果日報》圖片）