上週六，一班剛畢業的大學生上來聚會，阿釗（左一）亦有落場陪玩，「有個場俾啲客，佢哋就好開心。玩得開心，就算唔再上嚟，都會介紹朋友上嚟。」

壹盤生意

工廈 hea出搵銀術

2013年01月10日 ~~ 第1192期香港《壹周刊》

二十五歲的周志釗（阿釗），時下典型愛 hea又貪玩的𡃁仔。
中大碩士畢業，先後跑去賣按揭賣香薰。
月薪平均萬五元，卻月花五千元，在觀塘工廈租個劏房做私竇，放工與朋友在私竇歎紅酒、睇碟。 hea吓 hea吓，卻 hea出一條橋來。
一年前，他把私竇布置成派對房間，分租出去，並改名 Comma Party，在 facebook宣傳，齋賣場地 hea hea哋，卻月賺三萬。
本刊找來其潛在客戶，「魔術創意」老闆 Convoy親身前往睇場，經常要租場搞派對的他，指這類場地現時需求甚大。
因此阿釗不能再 hea，以賺得更多。

上週六晚上八時半，十三個設計系的大學畢業生包了場。甫進內，見到阿釗已預備好多款紙牌遊戲，客人即時自動埋位，十分興奮：「嘩！呢個點玩㗎？咁多 game我無隻識玩喎！」此時阿釗拿起一副「牛魔王」，「我教你玩啦，呢個好易啫。」玩了一輪，部分人轉去玩 Xbox 360 Kinect的跳舞遊戲 Dance Central，阿釗端出他調製的特飲 Comma Speical及其他汽水後，客人繼續遊戲，而他的任務已完成，便一個人回到另一間房看電視及上網。
按人頭費計，每人七十八元，包四小時，超時每小時額外加二百元，阿釗這晚一共賺約一千多元。其中一名客人 Suty說：「以前唔係唱 K就係去樓上 cafe，最鍾意呢度有私人空間，可以周圍走。」這裡與 cafe不同的地方是，齋賣地方，除了飲品外，連食品都不會供應，阿釗解釋：「我唔想煮，其實 cafe啲食物唔好食，橫掂而家外賣做到好平，啲客自己叫外賣仲好。」阿釗與同在工廈開鋪的生蠔、刺身外賣店「 Ocean Three」的老闆相熟，於是房內放有該店的菜單，方便客人叫到會。過去的十二月，遇上聖誕節，連同中午及凌晨時段有五十個這種派對。

阿釗將近門口的位置，為客人打造一個打機專區；右邊劏房業主分租給其他人做辦公室，今年三月約滿，阿釗已打算租下。

阿釗會幫客調特飲任飲，這杯「 Comma Special」有七喜、橙汁、利賓納同檸檬，「將七喜雪到好似冰嘅質地就最正！」

阿釗與小健（右）每星期輪流睇場，有時間都會回到 Comma Party搬飲品、核數、度橋宣傳。

瞓身搵客

回到一年前，阿釗租這個工廈單位，原來只為自己需要。「屋企又細又多人，出街又嘈又逼。」阿釗自覺無地方 hea，故月入萬多元，仍不惜月花五千租這個私竇，閒時上來睇戲看書。他的如意算盤是這樣的：「最多分租出去，夠交租就算，每個月有四、五個人租，我都唔使交租啦。」當初，他只是偶爾到附近派傳單，最多上討論區為自己做打手，宣傳一下。怎料，一個月竟吸到十多批客，更有錢落袋。阿釗說：「好多客都話呢度地方舒服又獨特，我見有 Art jamming場都要轉型做 party場頂租。有咁嘅機會食正個 timing，梗係機不可失啦。」於是，阿釗九個月前便索性辭職，全職做生意。
阿釗開始積極擴展，買 Wii、買 PS3等遊戲機，又上淘寶買新紙牌遊戲；在宣傳方面，試過贊助大學活動，用平價吸客，去年暑假，吸引不少大學學會來聚會；又試過搞極速約會，請來塔羅師玩「綽頭」。他建立 facebook粉絲專頁，放傳單在「 Ocean Three」宣傳，口耳相傳下，愈來愈多人幫襯，「試過有客見我哋傳單上嚟開 party，同場一個朋友公司咁啱要 brainstorming，又介紹佢公司同事上嚟。其中一個同事嚟過後，就介紹佢老公上嚟開 party，所以呢啲人際網絡好神奇。」

上週五「 13.1.4」，當日註冊結婚的 Party制服公司老闆 Annie（白衣）同老公 Eddy專程上來拍照， Eddy說鍾意這裡是實景，一抹陽光下有韓國拍攝風格，比普通 studio自然。

新租下較細的房，環境較暗，「我都擔心有人 take嘢㗎，鎖咗裡面個廁所門，逼佢哋要行出行入。」阿釗說。

引入拍檔　拓展關係

Comma Party位於觀塘巧明街，五至十分鐘行到 APM同港鐵站。

就是這神奇的網絡效應，令阿釗想到引入拍檔，拓展關係。前年十二月，阿釗遇上客人小健，開業頭三個月，小健每個月都上去私竇玩，兩人平日又相約食飯，開始相熟，傾談時發現兩個創業方向一致，便決定合作。阿釗說：「一個人做嘢、諗嘢始終有限，多個人多個諗頭，又方便同客 keep住聯絡。」阿釗覺得小健為人開朗，「佢好玩得、對住小朋友特別細心，同啲客玩個個都好開心。」
畢業一年多的小健，大學主修會計，除了幫手諗計找客外，亦負責睇數。以往阿釗一個人，搵幾多袋幾多，現在跟小健為了鼓勵對方跑數，於是兩人除了各支六千元作底薪外，會將盈利的四成對分，有剩的留作儲備。由以前主攻晚上的派對，更開始狂谷中午的活動，主打興趣班及公司客做「腦震盪」、歡送會的場地及攝影棚，每四小時收費四百八十元至七百八十元，不包任何器材，「試過一班攝影師帶 model上嚟影相開 party，我先發現可以做 studio，佢哋話貪呢度有自然光，似韓式攝影。又試過有客問可唔可以帶兔仔上嚟，原來寵物派對有得做喎！」
去年十二月，兩人更以四千元，租下單位內另一間三百多呎的房，以看電影為主題，「以前得一個場，有客 book咗就無，就算得五個人都要俾間大房佢，有大生意都做唔到。而家多間房，我哋可以靈活啲控制個場。」事實上，記者問過觀塘區地產經紀，附近工廈有不少類似鋪位可以放租，故阿釗的生意入場門檻低，容易被模仿。「我都預咗好多人會搞，但始終我搞先，有優勢。不過我都要同啲熟客拉緊啲關係，搞好啲質素！」阿釗說。

開業成本
(12/2011)

租金*　$15,000
裝修加傢俬　$10,000
影視遊戲　$10,000
雜費　$2,000
總投資　$37,000
*一個月租金，兩個月按金

營業資料
(12/2012)

營業額　$63,000
租金*　$7,000
人工#　$12,000
水電　$500
雜費　$5,000
盈利　$38,500

*一間 500呎大房加一間 300呎細房
#兩個老闆底薪

壹點意見

娛樂製作公司老闆 Conroy親自睇場後，對環境大感滿意，但是工廈這地區性問題，較難吸引家長客。

本欄曾報導過做派對策劃的娛樂製作公司「魔術創意」，月賺十四萬元。不過，老闆趙廣軒（ Conroy）沒有自己的 studio，每次搞派對，都要四圍搵場，他指並未聽過 Comma Party。本刊請他以潛在客戶的身份，就價錢、環境、服務、及宣傳品評。

價錢

我以前多在屋苑會所搞派對，好似嘉亨灣、維景灣畔價錢較平，大約每小時一、二百元，有啲甚至免費，但爭崩頭㗎，要兩星期前先可以預約。高級嘅私人會所好似馬會、深灣遊艇會就多數包食物，而且唔俾帶外來食物，最低消費都要一萬至萬五，或者四百蚊一個人，玩三小時，所以呢度價錢好大眾化，可以接受。

環境

環境舒服、空間感大。最大賣點係一大排窗，日頭陽光透入來感覺好放鬆。不過夜晚應該加窗簾，增加私隱度；唯一失分點係工廈，家長未必放心讓小朋友在這裡開 party。呢度係頂樓，電梯唔到，客人要行一層樓梯，唔方便殘障人士。

服務

只提供飲品的模式係可以，因為飲食好個人化，我相信會上嚟玩嘅客，都唔太在意食物，但可以提供一啲容易加熱嘅小食，多個選擇。

宣傳

一定要做網站！仲有假期前兩個月就要主動出擊谷生意，去到對方公司時，要留意老闆看什麼雜誌，喺嗰啲雜誌落廣告，對症下藥。啲客允許的話，可以拍片放上 youtube。
可以設計不同主題，例如而家好興的泡泡派對、氣球派對，吹五百個波中午影完婚紗相，夜晚可以用嚟開 party。有多啲選擇俾客，人哋會知道你花咗心機，揀你的機會都大啲。