IGOSSIP

iPhone 5　易變蕉

2013年01月10日 ~~ 第1192期香港《壹周刊》

早排先後有內地同香港用家坐攣咗部 iPhone 5，拎番 Apple整收成千幾二千蚊，認真和味。呢兩單嘢上晒報，起初仲以為係個別事件，不過，先達手機維修鋪億訊嘅老闆 Wilson就話一啲都唔個別，「上個月閒閒哋都整咗十幾部，拎親嚟整嗰啲都係廿零歲嘅後生仔，以前用 iPhone 4S都慣咗粗用，不過之前部機嘅機背有多塊強化玻璃，而 iPhone 5為咗偷薄啲就抽走咗，所以機身唔夠硬淨，好易坐攣。」 Wilson話最勁嗰部足足攣咗 20度，用家唔想部 iPhone 5變蕉，真係要買個硬殼保護佢。

Wilson話如果只係坐攣外殼，收費大約千五，不過換咗外殼（唔理你個外殼係原廠定雜廠）就肯定冇保養；如爆埋玻璃，就建議直接拎番 Apple整，「一定平過我。」

日本銷量最透明

可能因為顏色選擇多，加上後繼機 J2又冇乜變化，所以雖然 J1係 2011年機款，但都一樣熱賣。

調查機構 BCNranking啱啱發表咗 2012年換鏡細機（ mirrorless SLR）喺日本嘅銷量榜，當中最勁嗰部係 Nikon 1 J1，銷量佔成 11.2%，亦係唯一一部過雙位數，就連大家勁彈似玩具膠機嘅 Pentax Q都佔第八位（ 5.8%），日本人嘅喜好認真夠特別！不過，講呢個銷量榜嘅原因，主要係為咗讚一讚日本電器專門店夠膽俾條實數調查公司睇，睇番其他國家，最多俾個排名你，第一同第二相差幾多？唔知！之前記者都試過問勻香港幾間電器連鎖店，攞各品牌嘅銷售數字，全部都即刻耍手擰頭，話如果俾咗數字出嚟，一定激嬲代理，隨時連貨都唔肯再派！其實部機做得唔好又唔夠膽面對現實，咪盞愈做愈衰。

淘寶搵 iPhone

用「找回丟失 iPhone」喺淘寶搜尋，就會搵到唔少代搵 iPhone嘅「專門網店」。

俾人偷咗部 iPhone，搵番嘅機會等同大海撈針。但原來淘寶上有唔少高人，有「地下渠道」可以幫你搵機。方法有二：第一個係透過手機嘅 IMEI私立編號，翻查部機有冇拎番 Apple Store維修或換機，有就可以趕去攔截；第二個方法係第一時間報失 SIM卡，「新機主」打算重新 activate部機，就要入過張可用嘅 SIM卡，而過程中會將 SIM卡嘅獨立編碼傳上 Apple，攞到呢組編碼，就可以知道將卡屬於邊間電訊商，再翻查對方電話號碼報警拉人。每次收費廿蚊人仔，聽落好抵，不過對於喺香港唔見嘅手機，第一個方法只係查部機去咗邊間鋪，比較可行，但第二個方法要靠香港電訊商協助，基於香港個人私隱度高，唔似大陸咁易走後門，香港電訊商 PR私下同記者講，查就一定查到，但唔該搵警方提出要求，先會做嘢。