探熱針
俾面派對 撐 Now唱夜場 張敬軒謝安琪收𡃁模價
曾經同是環球唱片旗下歌手的張敬軒、謝安琪，因為公司同無綫擘面，一度絕跡電視熒光幕。
睇準五大唱片歌手少了一個宣傳平台， Now有機可乘，甚至連夜場騷製作都唔放過，四圍揼五大旗下歌手心口，講到明酬勞唔多，只保證有電視同互聯網轉播，加上由無綫前高層、現任 Now首席副總裁及製作部總經理何麗全親自出馬扯線，謝安琪同張敬軒心甘情願收「俾面價」，三萬五平唱四首歌，只為日後出碟宣傳，鋪定後路。
平過𡃁模打碟
積極開拓財路的 Now，過去一年，包起澳門新濠天地 Cubic的夜場騷，歌手連製作，每場收足一百萬。上週五（一月四日）壓軸一場，由謝安琪、張敬軒親戚檔孭飛。
平日𡃁模到夜場打碟，以 Jeana（何佩瑜）為例，四、五萬一場走唔甩，但掹車邊叫一線的謝安琪，所收的酬勞連𡃁模價都不如。
「何生（何麗全）親自開到口要人，又講明電視同互聯網有轉播，咪當打好關係，將來出碟要𢱑宣傳，都唔會托手踭！」謝安琪身邊人透露。
以往登台，謝安琪三首歌收十萬起跳，至於有牆紙大王契爺陳鼎禮睇住的張敬軒，更加企硬十五萬三首歌。今次賣大包俾面何麗全，謝安琪降價到三萬五唱四首歌，堅持唱兩首冷門作品加熱播歌《囍帖街》。至於張敬軒則以同價但照足大會指定，唱了五首 hit歌。
「軒仔話當年何麗全喺無綫，對佢好照顧，所以價錢同選曲方面都好鬆手。」
何麗全同謝安琪經理人夏森美開晒香檳等睇騷，見記者影相，即尷尬彈開。
夜場品流複雜，張敬軒要食二手煙唱歌。
報答何麗全
演出當晚，何麗全同謝安琪的經理人一早已經在 Cubic搵定位，飲住香檳等睇騷。踏正凌晨十二時，謝安琪打頭陣出場，雖然選唱了較冷門的《潔淨皇后》，但勝在是快歌，夜場觀眾一樣聽得投入，四首歌話咁快唱完，即使台下觀眾不停嗌 encore，但按本子辦事的謝安琪，「聾耳陳」上身， say個 bye便轉身走。
至於壓軸的張敬軒，由於長期受失眠影響，精神狀態明顯欠佳，唱到第四首《櫻花樹下》還發台瘟唱甩嘴，焗住傻笑重唱。
臨尾，張敬軒賣晒口乖：「今日呢場演出係我個人第一百場表演，頭先唱咗首澳門蝦碌版《櫻花樹下》，而家我罰自己唱多一首，係近排响 YouTube有二百萬 hit rate嘅《只是太愛你》，補番數！」其實張敬軒已決定約滿環球後轉會英皇，重現無綫只是遲早問題，今次撐 Now，純粹俾何麗全面，謝恩！
有傳同巨聲幫的胡鴻鈞關係非比尋常的張敬軒，不避嫌在社交網絡激讚對方的新碟出色過人。
將與劉浩龍在電影《末日派對》合演夫婦的謝安琪，記者會上向傳媒示範戲中會怒摑對方的場口。
曾經是「迷雲黨」的張敬軒，自陳志雲離開後加上環球同無綫交惡，自此在無綫無影無蹤。
𡃁模 Jeana打碟，閒閒哋五萬走唔甩，相比之下謝安琪同張敬軒澳門登台價，超值。
去年十月同環球解約的謝安琪，正式加盟「星煥」做一姐。（《蘋果日報》圖片）
留言列表
{{ article.title }}
