有睇新聞都知，拉布有其箇中學問，拉布議員推出過千修訂，有如Android陣營機海，你有你iFan話以量抗質冇性格，其實用心睇細節，每間廠都做足功課，好似新一輪「新修訂」：Samsuung推出多尺寸Galaxy Tab 2代平板、Asus繼續變形、vLG就玩大芒3D，既為反攻「新iPad」高走低開後嘅空窗期，亦為廣大市民提供揀機自由。
傳聞中，亦將「以拉布抗拉布」，全線gadget大改良：iPad mini、iPhone 5、新Macbook、iTV……同你鬥多機！呢場手機拉布戰，仲吸引過model身前塊純白蕾絲布，有乜內情？一齊！
《FACE》Gadget版監修人
903 DJ Donald
iPad Mini我就唔係太想見到，細部Tablet定位古怪，睇嘢又唔方便，教主生前都話過唔得，希望唔好自打嘴巴。反而係新iPhone，唔該佢真係要加番個大芒，試過其他大芒機，上網、睇相好好多，唔轉款相信會有逃亡潮。
市佔跌勢推iPad Mini
教主Steve Job生前曾寸過7吋Tablet係「Dead on Arrival」，一出即死。但彼一時、此一時，據美國調查公司IHS報告，iPad在一眾低價Android平台Tab機圍攻下，市佔率已由87%微滑至62%，確有必要開多條line搶攻中低階市場。細iPad傳咗超過一年，最近就有材料供應商確認已落order搞7吋新作，仲話縮水iPad代號係iPad Mini，唔係The Small iPad呀！
iPad Mini傳聞：
性能：7.85吋Retina芒．A5X雙核．更輕更薄日期：2012年8至9月售價：8GB（200至250美元）
傳聞1.7.85吋保教主遺詔
可信度：80% 盛傳中新iPad屏幕達7.85吋，加埋機邊叫做有8吋，冇違背教主離世前認為7吋太細唔好篤嘅見解。此外，可靠消息指新機將會採用日本Nissha Printing提供的新式薄膜感應技術，有望做得比新iPad更薄。
傳聞2.機能同新iPad一樣
可信度：30% 傳聞iPad Mini規格會跟New iPad劃一：A5X處理器、Retina Display解像度，而容量只得8GB版本，不過𠵱家連16GB都唔夠裝高清apps，呢單料可信好低。
傳聞3.地獄價打低階市場
可信度：70% Android平板最賣得係中低階市場，iPad Mini售價一定唔會高，傳聞會以破地獄價200至250美元開售（不需2,000港元），直情搞大芒版iPod Touch搶攻學生市場。賤物鬥窮人聽落唔似作風，但教主生前話過要發動核戰撼低Android，唔通就係暗指今次蝕本價大作戰？iPad Mini傳聞於8月賣得，到時自有分曉！
Macbook 升級冇得走
消息指6月11號開辦嘅WWDC2012會公布新Macbook，傳聞會飛走17吋得番13同15吋版本，轉用SSD硬碟、拎走光碟機，外形跟Air走纖薄路線，更會將手機Retina技術融入電腦。而Macbook Air更傳聞劈價到799美元（約$6,000）打Ultrabook！
iTV繼續得過傳字
電視係教主最想完成嘅新計劃，呢套代號「iTV」嘅智能電視，吹咗成年，近排富士康CEO郭台銘拍晒心口話已經為準備緊。坊間估計會於2013年推出，對應Siri語音、體感操作、更有webcam玩FaceTime。
Galaxy Tab 2 大小通殺
睇完突圍消息，轉睇Android拉布機海。iPad Mini 𠵱家先嚟收復平價tablet市場，但Samsung早有先見之明，Galaxy Tab系列恍如女星變幻球身材：7"、7.7"、8.9"、10.1"逐吋同你玩。但原來咁多部都只係Tab 1變種，今次先算係正式第2代！Galaxy Tab 2暫時只有10.1"同7.0"雙版本，走經濟路線、全線升ICS介面、機能冇大改；大家都知Samsung最叻從收完風後照跟，此次G-Tab精簡陣容至2個尺寸，令iPad Mini玩7吋、唔改功能嘅傳聞更加可信。
Galaxy Tab2 7.0 入門細Tab
今次Tab 2機能唔算頂級，喺芸芸Tab系小平板中，論機能不及年頭推出嘅7.7，處理器性能同解像度都算次級，但預期售價會更經濟，屬入門小平板。Samsung暫未公布香港定價，但計番美元價，10.1吋399美元（約$3,200）、7.0則為249美元（約$2,000）， 呢個價玩7吋雙核，仲行Android 4.0，都好抵啦。
Spec.
處理器：雙核心1GHz 操作系統：Android 4.0 通話制式：GSM四頻、3.5G 屏幕：7" 1,024×600 鏡頭：300萬像素記憶：內置8GB、支援MicroSD 體積：193.71×122.4×10.5 mm 重量：344g 售價：待定查詢：Samsung 3698 4698
Galaxy Tab2 10.1 再攻大芒
G-Tab咁多個版本只有上年年中嘅10.1係大size。玩細時，Samsung又玩番大，認真歡喜寃家。比起上代10.1最大分別係加咗通話功能同MicroSD插咭位。
Spec.
處理器：雙核心1GHz 操作系統：Android 4.0 通話制式：GSM四頻、3.5G 屏幕：10.1" 1280 x 800 鏡頭：300萬像素記憶：內置16GB、支援MicroSD 體積：256.7×175.3×9.7 mm 重量：588g 售價：待定
Android迷點揀尺寸？阿ken：「睇戲7吋、睇書10吋」
Ken曾使用初代Samsung Galaxy Tab同Tab7.7，𠵱家玩S2，佢認為7吋行16：9，會比較啱喜歡坐車睇劇睇片嘅人，相反如果多用tablet睇電子書或者上網，10.1吋較實用：「我自己會揀7.0，平時坐地鐵見人玩iPad都覺得大嚿，呢部唔怕撞到隔籬位。」
G-Tab新一代換U不換核
上面講解完兩款新機機身特性，之後就睇番兩部G-Tab 2嘅共有改良：新機由三星自家CPU改為TI OMAP4430 1GHz雙核心，開app睇片流暢度同過往相若，捽介面有啲窒，但行app時表現不俗，試打機同播高清片都唔算吃力。暫時Samsung冇應承畀舊版G-Tab改食雪糕，想玩4.0 Galaxy table，只此兩部。
唔用AMOLED Plus屏幕
Galaxy Tab 2棄用7.7吋舊型號嘅招牌S-AMOLED Plus屏幕，轉用舊式PLS TFT屏幕，10.1解析度為1,280×800，7.0為1024×600，拍埋iPad Retina芒（2,048×1,536），唔難睇得出解析度有分別。
平玩四核Acer Iconia Tab A510
拉布梗係要班馬，可惜本來好積極抗嘅兩大泡菜牌，LG放棄喺香港出tablet，剩低Samsung一個，好彩仲有兩大台牌幫拖拉起塊布！台灣機最正係夠平，Acer呢部A510有四核U，仲勁過前面兩部Samsung機，玩落覺得佢快過晒雙核tab，粒四核U唔係流嘅，兼且又唔食電，粒9,800mAh內置電齋播片能頂到15粒鐘，再加埋32GB內存，夠save晒1,300幾項修訂，仲可以好似陳偉業咁長氣，而定價仲要唔過$4,000，腦場仲會再賣平啲，就算冇3G都抵玩！
Spec.
屏幕：10.1"（1,280x800）處理器：四核心1.3GHz 系統：Android 4.0 ICS 鏡頭：500萬像素記憶體：1GB RAM 儲存空間：內置32GB、microSDHC 傳輸：WiFi、藍牙、HDMI 體積：260×175×10.95mm 重量：685g 售價：$3,898 顏色：黑/銀查詢：Acer（2821 0200）
變身notebook Asus Transformer Pad TF300
台牌冇Samsung市場咁大，出唔到咁多尺寸tablet去拉布，只好集中出一個size嘅機。所以Asus呢部TF300嘅spec.同Acer嗰部幾似，同樣係10.1吋款加四核U，速度一樣令人滿意，32GB WiFi淨機版嘅價錢亦都係$3,898。不過，正如議員拉布發言時都要諗啲改變，否則就會俾人插重複。於是Asus就一直玩變形，由第一代Transformer Pad起，加個keyboard去變notebook，除咗出街捽捽吓玩app，仲可以座枱打字做paperwork，夠晒實用。個keyboard本身仲有內置電池，駁落tablet後唔只冇偷電用，仲可以倒轉頭變成後備電池，拉15個鐘布都足夠畀你開會偷睇戲。
Spec.
屏幕：10.1"（1,280×800）處理器：四核心1.2GHz 系統：Android 4.0 ICS 鏡頭：800萬像素記憶體：1GB RAM 儲存空間：內置32GB、microSDHC 傳輸：WiFi、藍牙、HDMI 體積：263×180×9.9mm 重量：635g 售價：$3,898（WiFi版淨機） $4,698（WiFi版連鍵盤） $4,698（3G版淨機） $5,498（3G版連鍵盤）顏色：深藍/紅/白/銀查詢：Asus（3582 4738）
4吋大芒 iPhone 5稱霸預告
雖然7吋iPad都夠爆，但稱霸世界嘅新作始終係iPhone 5！雖然離大家估計iPhone 5於9或10月推出之日，言之尚早，但近排成班美國分析員已經吹晒風，話發現4S正在減產中，估計已準備生產iPhone 5。於是部機啲料又再喺網上瘋傳，連《華爾街日報》都有報道，傳得最勁又最合理嘅就係屏幕加大至4吋，若然呢點屬實，iPad又真係縮細，成條product line真係似足Samsung。技術上冇難度，做與唔做，最大因素都係面子問題。
iPhone 5傳聞:
1.支援4G。新iPad已有，新iPhone冇理由冇。 2.兼加入NFC近距離通訊，能夠機過機傳資料。 3.改善Siri，有可能增加支援語言。 4.好有可能採用iOS 6，靠OS增加影相功能，但鏡頭唔會upgrade。
出奇老鼠
明抄Mac機Magic Mouse，可信性好低，但創意十足，張圖又整得靚，值得一讚！可信度：30% 美觀度：85%
真係叫iPhone 5？
現階段又仲未有人話執到iPhone 5樣辦機，惟有睇住網友整嘅概念圖，估吓個樣。除此之外，仲有好多人估部機係咪叫「iPhone 5」，定係跟「New iPad」起個古怪名。之前有人渾水摸魚註冊咗iPhone5.com網址，最近就成功俾收番，相信唔會再出現iPad被人搶先註冊商品名稱而迫住改名嘅鬧劇，「iPhone 5」呢個名嘅可信性增加不少。
弧型機背
一直傳iPhone 5機背會變番弧形，又唔再用玻璃機面，同呢張圖嘅弧形膠背幾脗合，而且夾得幾靚。可信度：80% 美觀度：80%
虛擬home掣
留意home掣改成虛擬掣，幾有創意，但同主流風聲不符。而且似係由台灣改裝而成，機背好hard core，美感不足。可信度：30% 美觀度：45%
一味靠薄
比4S改動唔大，主要整得薄身咗，可信性反而高少少。仲好有心機咁扮埋條邊框嘅內部結構出嚟，好似有根有據。可信度：80% 美觀度：80%
i系達人Derek: 「信新iPhone大改 唔信iPad Mini」
新iPhone屏幕增大可能性很高，畢竟大量大屏幕手機對蘋果構成很大壓力。屏幕大了，預計外形會大改，不可能沿用 iP4/4S 設計。至於iPad Mini，個人認為可信性非常低，因為以全球平板電腦市場來說，iPad 仍然是一枝獨秀，暫時毋須推出另一款型號來分薄自己市場。
立體抗爭 LG Optimus 3D MAX
拉布抗，就要唔同界別黨派嘅機合作先夠實力，除咗Android tablet打iPad，手機都要預先出定嚟迎戰iPhone 5。繼之前Samsung發表咗新旗艦GS III後，LG實行睇死iPhone 5唔會玩裸眼3D，於是就以此為賣點，推出重頭作3D MAX重點攻擊！ 3D MAX個主介面保持係2D，方便日常用機；開app進入3D介面後，先會變成立體menu，之後無論影相拍片、上YouTube睇3D片同玩game（隻game本身要支援3D）都能裸眼睇到立體感，iPhone點用app模擬成3D都唔夠佢正。
Spec.：
Android 2.3．雙核心1.2GHz．3.5G、GSM．4.3" 1,600萬色裸眼3D．500萬像素鏡頭x2．內置8GB、microSDHC．126.8x67.4x9.98mm．139g．$4,698．LG（3543 7777）
ICS平機 LG Optimus L7
拉布梗係要各種功能同價位嘅機都有齊，LG同期仲出埋呢部冇3D嘅L7。機價$2,698比3D MAX平一大截，LG IPS芒出名比三星粒粒芒更高清，呢個價有大芒玩，雖然只係單核U，都幾抵玩。
Spec.：
Android 4.0．1GHz CPU．4.3" 1,600萬色屏幕．500萬像素鏡頭．內置4GB、microSDHC．125.5x67x8.7mm．122g．$2,698 ####
傳聞中嘅iPad Mini（右）係7.85吋，比起9.7吋嘅原iPad（左）少咗2吋多少少，大概細咗4分1啦。（概念圖）
預想中的iPad Mini終於用新芒技術，會比原iPad更薄更輕。（概念圖）
傳聞話唔想搞到啲apps分高低清兩個版本，所以iPad Mini都keep住Retina。（概念圖）
Steve Jobs話過Android平板係copycat，又話7吋「Dead on Arrival」，勁憎佢哋，所以用地獄價硬撼不無道理。
傳聞話想將Macbook Pro同Macbook Air統合為一，並會提供Retina display版同普通芒版。（概念圖）
網上堆概念圖個樣同iMac差唔多，預想功能有Siri音控。
兩機支援32GB micro SD，中低階機嚟講算大量。
Tab系唔少都有通話功能，今次連10.1吋都有咪位，唔用耳機都可以講到電話，令人意外。
對Samsung機嚟講4.0好珍貴，同手機一樣用上Touchwiz介面，Game Hub、S Plan等自家軟件，fans唔會陌生。
Cap Screen係四大快捷鍵之一，Cap完能即時改圖，幾有趣嘅新功能。
試相相機唔能夠手動揀對焦點，兩個版本都係300萬像素，質素一般冇驚喜。
鏡頭下有好大分別，用肉眼睇就無咁覺眼，但都睇得出色水無咁鮮豔分別。
同我一樣夠大嚿又長氣！
試全景相 Android 4.0新增咗全景拍攝功能，橫掃部機就影到超wide相，不過A510個500萬像素鏡頭質素一般。
奧運指定手機係Samsung SIII，指定tablet竟然係A510，所以機背印咗五環logo。
試玩多邊形game，粒Tegra四核U夠晒應付，唔使幾秒就入到game，亦未見過彈app。
雖然平，但機身有埋mini HDMI頭駁電視，microSD槽隔籬原本係SIM咭槽，但香港版冇3G功能，所以封咗。
原生行Android 4.0 OS，但Acer仲加入咗自家Ring介面，一篤正中底部粒圓點（紅圈），就開到圓形shortcut介面出嚟，能快速睇網頁、睇相同入setting。
同人民力量合體拉布！
因有keyboard做後備，tablet唔使放特厚電池，所以keep到厚度只有9.9mm，比A510薄少少。
試相其f2.2光圈嘅800萬像素鏡頭，都係一大賣點，喺好暗兼側光嘅酒吧入面，model個樣依然影得清晰，相質亦唔失禮。
Tablet一插入keyboard就合體完成，立即可以打字同用touchpad操控游標。
Keyboard仲有埋大USB插頭，可以插手指抄file走或駁mouse，幾方便。
機背有波紋，唔易留指紋。睇真啲，呢隻係深藍色嚟，唔再係黑色咁悶。
iPhone 5冇外洩相睇，暫時只有呢件聲稱係iPhone 5耳筒插頭、聽筒同WiFi連接線嘅零件流出，仲未能靠佢實質估到部機個樣。
蘋果用家組織MACitizen會長 Derek
機身只厚9.9毫米，比上代3D機（11.9毫米）更薄，機背有雙500萬像素鏡頭，影3D相一take過。
拍攝3D跟一般影相/拍片程序一樣，照常影都已見到有立體層次，睇到model分成兩個虛影浮現背景前，但留意，拍3D一定要打橫影，唔可以打直。
若從網上搵到左右或上下兩格並排「side by side」3D相，抄入3D MAX後，亦能透過3D轉換器睇到立體感。
留言列表
{{ article.title }}
