林子祥個仔，出道已經被標籤做Lam仔，美國文學系畢業回流做瑜伽教練，中文識講唔識睇嘅佢其實叫Alex林德信。簽約環球，先做model拍Canon相機廣告、和吳雨霏拍〈我本人〉MV男主角傳緋聞、與Mr.拍戲《起勢搖滾》全部處女下海。食住個勢玩全能歌、影、視3棲，今年暑假出個人EP，行唱作路線首plug新歌〈Magic〉自己作曲。性格怕醜、唔識講嘢兼揹住明星二代名銜，壓力更大。無論星途怎樣，27歲嘅佢一心闖一闖。

Profile
姓名：林德信別名：Alex、Lam仔出生日期：6/3/1985 性恪：怕醜、少說話星座：雙魚座曾參與：'10 Canon相機廣告、'11吳雨霏〈我本人〉MV男主角、'12電影《起勢搖滾》

作為藝人二代，會唔會同圈中二代特別投契？
JC（房祖名）囉！佢大過我幾年，當時我7、8歲佢十幾歲到，我返香港放暑假都會搵佢一齊玩。大個咗就少啲啦，始終外國生活，圈外朋友居多。

拍過Canon廣告、吳雨霏〈我本人〉MV、電影《起勢搖滾》和唱歌，最辛苦係咩？
每樣嘢都好新鮮，要學要試！從來都冇諗過可以做model，第一次勁緊張，都有上網睇吓fashion show學吓啲model點chok！拍電影就好開心識到一班新朋友Mr.、林欣彤等，日見夜見仲以為自己加入埋Mr.添。但等嘅時間真係最辛苦，惟有玩結他、作曲解悶！

身為林子祥囝囝有甚麼壓力？
當然有好大壓力，因為個個叫我Lam仔，常和爸爸相提並論。但從來都無諗過要超越爸爸，我呢一刻想唱歌就唱歌，個個都問現在唱歌賺唔到錢，驚唔驚？只要唔餓死就得啦，𠵱家27歲，唔通5年後先試咩！

爸爸給了你甚麼入行tips？
做好自己，所有嘢都要有信心去做。可能係遺傳，所以我講嘢慢有啲似爸爸，香港節奏好快係好事，可以迫到我快啲！之前到廣州做阿Lam演唱會嘉賓，一齊練歌時我放棄了尾段高音，佢教我放鬆啲就唱到，原來我一直用錯方法唱。

第一首識唱阿Lam嘅歌？
爸爸話我細細個就識唱晒佢啲歌！大個咗了就最鍾意唱〈千憶個夜晚〉，以前只係純粹鍾意個旋律唔了解歌詞，直至一次分手時哼到那句「舊時沒法平淡　偏偏要裝作平淡……」就真正體會到喇！

新歌〈Magic〉為何有齊中英文版？
〈Magic〉講第一次約會前對女生心動的感覺，似自己怕醜的性格。第一首派台歌親自作曲，沒有正式上過結他班，不懂看譜，只靠啦啦啦夾出自己想要的旋律。最初自己填了英文詞，現在正式plug歌就搵嚟林若寧填詞，字意跟原來相近。

留鬚的形象是學爸爸嗎？
美國當瑜伽教練時，學生年紀都比我大，惟有留鬚扮成熟！睇番1歲時爸爸抱住拍《最愛》大碟封面照，都有被畫上鬍鬚。如果我將來有小朋友，都好想可以抱住個B影番輯！

覺得自己有乜賣點？
1 除咗結他，乜都肯學，識玩少少鋼琴、bass、鼓、口琴，嚟緊好想學saxophone。 2 準時，每次都預早半至1個鐘到，遲到一定係遇到意外！ 3 自信心同思想正面，外國生活過比較想得開，就好似無乜在意娛樂新聞，我連新聞都唔睇，屋企連電視機都無㗎。講自己賣點好尷尬，不如留番畀你哋講啦！ ####


 



arrow
arrow
    全站熱搜
    創作者介紹
    創作者 stinglife 的頭像
    stinglife

    娛樂八掛大放送★

    stacylife 發表在 痞客邦 留言(0) 人氣()

    E-mail轉寄