面對面 能讓專訪拍攝團隊興奮雀躍，圍着合照個個都說：「我細細個就睇你大！」「我細細個就鍾意你！」的，時有發生，不過主角來自亞視，還真的是頭一遭。她是「馬小玲」，萬綺雯。多得王維基施銀彈興風作浪，無綫花旦荒，終於讓斟足14年的萬綺雯過檔成事，7月夥拍郭晉安、王祖藍開新劇《老表你好嘢》，人人都話萬綺雯遲來先上岸，唔嗲唔吊有主角做，待遇遠勝過應飯應壓價做大茄的另一位前亞視花旦陳煒。


18歲臨時拉伕選亞姐贏了亞軍；自認pizza面水腫王卻偏偏有觀眾緣又有高層緣，19歲就是爆騷花旦；25歲讓宇宙最強甄子丹拋妻跪地愛得要生要死；28歲拍《我和殭屍有個約會》幫亞視贏了最漂亮一仗；30歲跟撻着7天的編劇陳十三閃婚…… 萬綺雯說她每走一步都只問感覺從不強求，尤其揀老公：「我一直都搵緊一個人，一個一眼睇到就肯定係我老公嘅人，否則，幾愛都要分。十二年啦，事實證明，我啱！」甚麼宇宙最強、甚麼當家花旦，都是過眼雲煙。重要的是，說好的幸福，它真的發生了。

我要命得唔得呀?
轉投無綫，待遇遠遠勝過陳煒，萬綺雯先旨聲明，入行23年，從入行選亞姐算起，自己就一直是個不愛強求、以不變應萬變的人，做人宗旨至今沒變過。
「老老實實，我入ATV前，都係追TVB劇大，係劉娟娟（前亞姐總監）叫鬼我先做之嘛。89年亞姐選舉有人退出，劉娟娟喺婚紗公司門口見到我張相，請人搵我返嚟替個位……嗰陣時我學緊英文想考空姐，因為咁大個女未搭過飛機，應承選亞姐，係因為嗰年亞姐外景去希臘拍，就係咁簡單……做落，一啲都唔覺得呢行繽紛燦爛，淨係知道自己鍾意靜；套套女主角，機會唾手而得？我淨係知道我好想瞓覺，但係佢哋日日都唔畀我瞓。」
人人做呢行發夢都想開工開到天昏地暗，因為冇得瞓搞到要出律師信同亞視解約的，睇怕惟有萬綺雯：「好多人話我懶，係呀，我係每年都最多接一兩個job，但凡事都有前因。我細細喺元朗大，日頭通山跑、夜晚一定要瞓夠8個鐘，人人叫我睡寶寶，身體健康到不得了。但係入行唔夠一年就出事，休息不足、每晚瞓唔夠三個鐘，肝炎入院。」
「細細個，真係好單純，醫生開張紙話要唞兩個月，就真係以為終於可以唞番兩個月。但人哋電視台話唔唞得、成組人等緊你開工，仲點可能繼續瞓？直到第二年再肝炎入院，醫生話我再咁落去一定肝硬化、有錢冇命享，我黃咁咁瞓喺醫院張床到第一下擘大眼見到媽咪企喺到喊，改變咗我一生……係喎，我要命得唔得呀？……做律師樓嘅家姐驚我傾解約唔識傾，幫我出律師信，一畀完信喬英（前亞視高層）話：『得啦，唔使睇啦，你有咩講同我講咪得囉，使乜出信？轉部頭，一年拍兩套，加你雙倍錢！得唔得呀？阿女！』我一聽，又唔知點算好，返去問家姐意見。結果，咪一年一兩套劇，一直拍到𠵱家囉。」

爺爺叫我拍《網中人》
身為亞視最有觀眾緣的花旦之一，早在《我和殭屍有個約會》98年首播錄得10點收視後，無綫已經向萬綺雯招手。今次終於成事，萬綺雯說，最興奮是89歲的爺爺。
「我個性格係唔會同人哋爭任何嘢，報道講嘅嘢你唔好信。最清楚一定係監製同同事，總之由第一個電話我應承做個job為止，我一定唔遲到唔早退、永遠唔會打電話去煩住人，講晒對白唔NG。拍《殭屍1》我拍到坐骨神經受傷，《殭屍3》更加係短咗骨都照吊威吔，當時陳十三已經係我老公，俾人話我扮嘢、告枕頭狀，我扮聽唔到繼續打，直到下半身麻痺、褲都着唔到至買機票返香港醫。醫生話我俾威吔勒到肝管出血，再遲啲醫就好危險，我都係一樣兩個星期後復工，同事一直畀機會我、一直咁錫我有原因嘅。
「出邊嘅事非我唔會理，報紙新聞我從來都唔會睇，反而係消息一傳出（簽TVB），89歲爺爺一早打畀我，問我係唔係真。咪睇佢89歲，心水不知幾清，幫我分析三個電視台邊間好邊間唔好。我問爺爺：『咁你想我簽邊間呀？』爺爺話：『我想你簽無綫，雯雯，你拍啲《網中人》同《狂潮》畀我睇啦！』」


例牌半年開工半年休息，萬綺雯說轉投無綫後更加不會增加產量：「啲時間留番嚟梗係唔係做家庭主婦咁簡單啦，我一路都冇停過拍戲、拍港台劇、做港台劇仲有拍廣告。其他時間學吓嘢，學珠寶鑑定，學咗頭級諗諗吓，我都唔戴呢啲嘢嘅！跟住學畫畫、學插花、種花。最緊要老公以前喺屋企開工，早午晚三餐都可以對住老公，舊年佢自己開咗個工作室，大部分時間返工、寫劇本返大陸，由朝到晚都見佢唔到，呢個時候有套劇開，都啱嘅。以前細個鍾意有安全感，反而年紀大咗想試新嘢，重點係，老公支持我去試吖嘛！」講到底，都係為老公。

老公，佢哋又問甄子丹呀！
明知道萬綺雯與甄子丹已經是十多年前的舊聞、明知道兩人現下婚姻各自美滿，我還是忍不住問：「你同老公有冇睇過《葉問》？你老公有冇好自豪，一個打十個嘅宇宙最強都唔夠佢爭？」「梗係冇啦，我哋兩個好少睇中文電影！」…… 97年拍《殭屍1》結識，萬綺雯與《殭屍》系列編劇陳十三直到二千年《殭屍2》結局慶功時才撻着，七日後就在美國註冊結婚，結婚至今12年依舊愛得纏綿。重提舊愛，係有啲out。


「爹哋媽咪喺我好細個就分開，我當佢哋係借鏡，一路都諗，除非見到一個人，覺得佢一定係我老公、一世都唔會分開，我唔會揀佢，無論幾愛都要分！外貌、條件，所有嘢都係過眼雲煙，我係要一個可以同我行到幾十年嘅soul mate。今年係我哋結婚第12年，我覺得我哋兩個走埋，啱！好work！過去嘅嘢乜都要計，做人咪好唔得閒？「結婚第三年，老公細佬有病，跟住輪到公公生cancer，人生最痛苦嘅五年，好慶幸，我哋可以陪住對方度過……我真係想像唔到冇咗老公嘅日子點過，但係我同老公講，你一定要早死過我，因為你嘅身後事同屋企我都一定打點得好好……我好相信我嘅能力，我好知道，當有事需要我堅強嘅時候，我一定會好堅強，我可以打點好一切，可以處理好佢嘅後事、代佢處理好家族裏邊每一件事。我唔係話老公顧唔到，但係我唔捨得佢一個人去顧吖嘛……講真，好多嘢冇人估到，但係當我親眼見到十幾廿歲嘅人都可以無緣無故離世時，我心裏邊其實有個底，最重要嘅只有眼前，我同老公嘅家庭，就係我由細到大期待嘅家庭。我嘅夢想，老公畀咗我，下一步就係我陪住佢去追求佢嘅夢想。」

沒有草莓的花園
萬綺雯與陳十三和6隻貓住在接近北潭涌禁區的全幢村屋，生活最大的樂趣除了給陳十三買餸煮飯，就是打理她的小花園。萬綺雯的花園裏有花有草有菜，惟獨沒有士多啤梨。「公公96年驗到有cancer，前後一年喺醫院過，每日拍完嘢入養和探佢，我都會帶一種花畀佢，嗰啲唔係成日見到嘅花。佢瞓緊，我插好啲花喺床頭，佢一醒，第一件事就係問我：『雯雯，呢個係咩花？』我細個住元朗、公公住錦田，公公由細到大最錫我，每次我去，都會留畀我最大最甜嗰粒士多啤梨……所以，我𠵱家都冇辦法種士多啤梨。」


陳十三的微博最常見到萬綺雯和萬綺雯的小花園，被傳媒偷拍，亦總見蚊蚊淋花護草。 ####


平均兩年才接一部電影，萬綺雯最新作品是在《追兇》裏與劉青雲扮夫妻：「佢就真係我細細個嘅偶像啦！」


與郭晉安合作新劇7月開拍，萬綺雯入行23年第一次亮相無綫，獻給《東張西望》主持黎芷珊。


18歲參選亞姐時，萬綺雯說自己pizza面不堪入目，全靠亞姐總監劉娟娟畀信心：「你得 ，你信我啦！」


選完亞視即做女主角，98年萬綺雯飾演《我和殭屍有個約會》女主角馬小玲，締造電視經典。


在元朗長大，萬綺雯說媽媽打三份工養大三個女最了不起。相中的老人，則是她89歲的爺爺。


90年拍《點三八與大提琴》戀上戲中對手呂頌賢，95年拍《陳真》戀上甄子丹，兩人拍拖四年分手。《忽然1周》圖片


與陳十三撻着第七日赴美結婚，至今恩愛癡纏：「老公最鍾意笑我baby talk，成日話我唔好出聲就得喇！」



arrow
arrow
    全站熱搜
    創作者介紹
    創作者 stinglife 的頭像
    stinglife

    娛樂八掛大放送★

    stacylife 發表在 痞客邦 留言(0) 人氣()

    E-mail轉寄