港姐大起底 湯鎮業姪女抄足徐子淇上位路
新一屆港姐週一（14日）進行面試，一眾索女隨即被起底，其中最養眼「長腿羨妮」湯洛雯（Roxanne），原來係湯鎮業姪女，Roxann一心闖娛圈，佢仲抄足千億新抱徐子淇上位路，除同徐子淇一樣倫敦大學畢業，更係徐子淇模界師妹，Roxanne現在所屬Primo Management模特兒公司，其實係Elite模特兒公司前身，當年徐子淇就係Elite一手發掘入行。
雖然有指Roxanne爆喜愛夜蒲，但好姨聽聞佢係乖乖女一名，佢身邊好友話：「平日Roxanne6點幾就起身，因為佢唔使開工就會幫手送細妹返學，好錫個妹。Roxanne好想入娛樂圈，對做戲好有興趣，不過佢唔想靠父蔭，所以先會參選港姐。」
其實Roxanne能文能武，近年更考獲潛水牌，佢話：「小時候我經常參加運動會，直至17歲要赴英國讀書，為融入當地生活，我減少運動，變回『文靜』後，我竟被同校時裝學系學生邀請行catwalk演繹他們的設計，或許我對模界興趣就係咁而來。」
對於囡囡參選港姐，身在大連拍劇湯鎮宗表示：「既然報名就支持啦，未報之前唔係咁喜歡，佢鍾意條路點走佢決定，唔會阻佢。」至於叔父湯鎮業力撐姪女說：「佢幾靚女，學歷各方面都ok，知佢選就梗係支持啦，後生女學，唔好將成敗睇得咁重就得，贏當然好，當人生經驗。」
瘦版黃婉曼曾闖樂壇
「瘦版黃婉曼」Wingto係part-time模特兒，雖然佢冇黃婉曼身材咁勁，但有燦爛笑容，又識擺甫士，晒做藝人。
事實上，原來Wingto名叫林泳淘，係女子組合Lacee Lacey成員之一，去年曾經派新歌《秒殺》上台。當時Wingto以藝名林熙（Halen）登場，但星途平平。由於Lacee Lacey以跳舞組合形式出道，佢表示欣賞韓國五人組合Wonder Girls，以佢為目標，可惜出道唔夠一年就冇影。
長頸Gloria死仔
22歲Gloria打扮青春，氣質同薛凱頸相近，由於佢都頸長長，所以被稱為「長頸Gloria」。有網友踢爆，佢曾就讀位於屯門加拿大神召會嘉智中學，現為兼職模特兒，不時影相賺外快。
據知Gloria性格開朗，勁受龍友歡迎。網上流傳一張佢同一班龍友相，只見大家有說有笑，打成一遍。有指佢龍友絕招係頭貼頭玩自拍，難怪咁受歡迎。
 放大圖片 |
|
|
留言列表
{{ article.title }}
