一九六八年，國泰電影演員訓練班招募，三千多人投考，最後取錄了四十八人，班主任更為其中一位名叫劉慶基的學員改了藝名，叫劉丹，取材自文天祥的七言律詩《過零丁洋》最尾一句：「留取丹心照汗青」。話說此詩是文天祥在抵抗元朝軍隊失敗成俘虜後，於廣東零丁洋元朝軍艦上所寫的，既藉以表明自己忠於宋朝的心志，亦慨歎自己一生致力起兵抗元，卻換來孤苦無援的命運。

相對起來，自稱是「四十後」的丹爺劉丹，其演藝之路則剛好相反：從影四十四年，他在國泰、邵氏拍過國語片，七十年代當過月入逾萬元的配音員，然後七六年跳進公仔箱，拍完佳視到無綫，又加盟過亞視，雖然稱不上大紅大紫，但大家卻不會忘記他由八○年keep到現在的招牌鬍鬚，以及曾是「洪七公」（射鵰/神鵰系列）、「馮敬堯」（《上海灘》）、「叉燒炳」（《真情》）、「泉叔江兆泉」（《天與地》），還有半裸上身大晒九紋龍的「馮志明」（《4 in Love》）。

「咁多年嚟，我喺工作上最好彩係，一直都係人哋嚟搵我，而唔係我去搵人。我呢生人啲際遇都好奇怪，成日諗到嗰啲嘢，就會無啦啦有，但我想中馬標、中六合彩呢，又未中過喎！哈哈哈！」六十七歲的丹爺的成長點滴，大概也是很多香港人的故事。

初來埗到

我一九四四年喺大陸出世，四、五歲就同阿爸阿媽、妹妹同埋阿公阿婆走難嚟香港。本來我屋企以前喺大陸係大財主、大地主，但嚟到香港，就好似其他走難落嚟嘅人咁，一貧如洗，乜嘢都要重新嚟過。

我哋最初租住茶果嶺原居民起嘅石屋，好似一間房咁大，屋外面隔住條路仔就係海灘，所以我游水好叻。後來住到我十一、二歲時，我哋就搬咗去青山道木屋區，使咗三嚿水搭咗間大啲嘅木屋，仲有一半可以租畀人住，廿蚊個月，變咗做包租婆，哈哈！

住喺青山道嘅時候，我成日去玩爬山，有乜就玩乜！不過打風嘅時候都好驚o架，一知道有風球嚟，我哋就會搵鐵線掹住個屋頂，因為我見過人哋嗰啲，風一嚟，「靴」一聲，成個屋頂就畀風扯走咗！

因為射鵰和神鵰系列的劇集，他共演了四個版本的「洪七公」，令人印象深刻！

《真情》播足逾千集，從此令他多了一個「叉燒炳」的外號。

請唔請我

我哋五幾年嗰陣，香港經濟仲未起飛，冇社會福利署，又冇綜援，大家都捱得幾慘，有工開就有飯食，冇工開就要自己諗辦法。啲人出嚟搵嘢做，冇人會問「幾錢人工」，只會問「你請唔請我」。

我記得當時最多人做嘅工係紗廠，一到五、六點鐘，啲人一堆堆企晒喺巴士站，一睇佢哋啲頭髮仲黐住啲白紗，就知佢哋喺紗廠做，都叫做有份穩定收入o架！

至於我爸爸，初初嚟香港，看更又做，乜都做過。後尾試過有個交通差，因為生得細粒，喺馬路中間嘅指揮台度畀人搶警槍，哼，跟住就決定要搵啲山東佬嚟做，大大隻隻企喺馬路度，唔打得都睇得呀；咁我哋係山東人，喺嗰陣嚟講叫做身形高大，我爸爸就係咁做咗嗰陣叫嘅「山東差」。

爸爸做咗差人之後，屋企環境OK好多。我哋嗰陣連埋我已經有五兄弟姊妹，跟住就搬咗去荷李活道警察宿舍，同曾蔭權、梁振英做鄰居，哈哈哈！

在芸芸經典角色中，丹爺最愛《上海灘》的「馮敬堯」。「佢嘅內心戲比較多。」

在神劇《天與地》中的「泉叔」（左二），協助徒弟「鼓佬」林保怡（左三）參選入立法會，丹爺說戚其義寫有關劇情時，亦有問過他從前參選的情況。

《4 in Love》中的「馮志明」，半裸大晒九紋龍，壯健身形，全賴他熱愛戶外運動所致，「網球、高爾夫、踢波、游水，我連潛水教練牌都考埋，最深潛過八十幾九十呎！」

世界之大

我初初讀完書出嚟就做建築，後尾建築冇得撈，我就諗：不如去環遊世界，散吓心呀，但我冇錢o架嘛，咁點呀？哼，後尾有個uncle走嚟問我，有冇興趣跟佢行船，我諗諗吓：有人工逗，又可以環遊世界，幾好喎，咁我咪去囉！

上船第一日，我從未試過離開過香港，一出去，見到茫茫大海，呢個南中國海喺地圖上咁細，但都已經一望無際，睇唔到岸，咁成個地球嘅比例咪好勁？犀利呀！真係叫我大開眼界！夜晚喺船上面望星星特別多，再諗吓個宇宙，嘩！一個地球都咁大，加埋其他星球，一個人嘅比例簡直一粒塵都不如！

當時係六幾年，打緊越戰，我跟東南亞船，去到越南，見到嗰度啲人生活得好悲慘，個個都係行屍走肉，街上冇一個人有笑容，我好唔明點解世界會變成咁，打仗為乜呢？

以前我十五、六歲時走去學過打西洋拳，成日恃住自己識打，一畀人蝦，我就會同人死過；但行船之後見到咁多嘢，乜都睇化晒，先發覺自己以前懶巴閉，爭嚟做乜呢？

在新處境劇《愛．回家》中，丹爺（右三）飾演一個有仔有新抱有孫兒的爺爺。

不甘寂寞

行船行咗兩年幾，初初就好新鮮，但後尾成日都喺架船度，十幾日淨係望住個海，見唔到陸地，浮吓浮吓咁，我就開始覺得悶！如果我當時行嗰啲去美國成個月嘅大船，我諗我真係會跳海！哈哈哈！

然後我見到有啲人做行船做到年紀好大，佢哋成世人都喺架船度，咁我自己又點呢？單身寡佬就話啫，但我總有一日要成家o架，唔通娶咗老婆之後，揼低個老婆去行船咩？

無耐嗰水船返到嚟香港之後，國泰電影就租咗我哋架船拍戲，我做officer，要on duty，於是乎我就同啲導演、製片搞到好熟。咁蹺嘅係，當時報紙話國泰演員訓練班招募，我即刻返屋企喺櫃底度，摷一張自己認為最有型嘅相寄去，哈哈哈！

寄咗去之後，我行嗰幾水船好彩都係去新加坡，好近，兩次國泰寄信叫我去interview，好彩我都喺香港，到最後，我終於收到取錄信，咁我就大鑊啦！要受訓半年，冇人工，我又冇得行船，即係要辭職啦！如果讀唔成呢，我就要重新搵嘢做！卒之，我就揀咗辭職去受訓，因為我其實一直都鍾意啲表演嘅嘢，小學開始已經做話劇，而行船，始終並唔係我鍾意嘅。

千禧年以原名劉慶基代表自由黨參選立法會，兒子劉愷威和太太亦瞓身支持。

隨遇而安

半年嘅訓練班畢業時，四十八個同學得番十一個，有啲畀公司飛，有啲讀讀吓覺得自己唔適合，走去轉行。我係最後畢業同公司簽約嗰十一個，但到依家，全班只係得番我一個仲做緊呢行，哈哈哈！

同國泰簽咗八年約無耐，大老闆就撞機死咗，公司亂晒大龍，但邵氏嗰邊就發展好好喎，我就諗：如果可以過邵氏就好喇！哼，跟住就有個我唔識嘅編劇打畀我，問我有冇興趣過去邵氏傾傾，仲畀我好好條件，結果國泰當時嘅總經理Willie陳（陳自強）就幫我解咗約，我過咗邵氏之後九個月，國泰就話執笠。

七○年去到邵氏，人工千幾二千蚊，已經比出面好好，但做配音嘅，就可以搵到萬幾蚊一個月，我就諗：如果我識配音就好喇！跟住邵氏嘅配音領班知我識講普通話，無啦啦打嚟問我想唔想學配音！哈哈哈！

我啲際遇咁多年嚟都係人哋嚟搵我，唔係我自己去搵工，入佳視係咁，入無綫、亞視都係咁，諗到嗰樣就無啦啦會有，都算好彩囉！哈哈哈！

七八年由佳視跳槽到無綫後，在《強人》中演「雷一帆」。

六八年初出道，在國泰電影拍國語片，當時的他還未有其招牌鬍鬚。

七○年加入邵氏後，丹爺（右）曾在李翰祥執導的《大軍閥》演出過。

另一個七十後的故事

丹爺說，在將播出的新處境劇《愛．回家》中，他的角色會升呢，「有仔有新抱，仲有埋孫添呀！」

現實中，他有一子一女，是個非常open minded的父親，現在專注於內地拍劇的大仔劉愷威，已有個要好的女友楊冪。問他可會恨飲這位未來新抱的茶，他哈哈哈笑起來：「未知呀、未知呀！啲後生仔嘅嘢，我都控制唔到o架！」有跟楊冪見過面嗎？「有！佢係個好女仔，好乖女！先排佢有幾部電影上畫，嚟香港宣傳好匆忙，但都有同我哋見面，印象都OKo架！就算冇時間見面，佢返到北京都會打畀我：『uncle，我回到北京啦！』好有交帶，好少人會識得咁做！哈哈哈！」

跟兒子劉愷威感情要好，更大讚其女友楊冪是個好女仔。

至於曾有說劉愷威整容，丹爺即火都嚟：「都黐線嘅！整乜鬼嘢容呀！不如話佢換咗個頭呀！話阿威細個個鼻扁，我個仔由細個開始，都未扁過鼻！反而佢個樣變得最緊要，係嗰陣喺橫店拍「薛丁山」（《大唐女將樊梨花》），試造型時個導演話佢有baby fat，叫佢減，佢就日日喺橫店跑步、做sit up，個幾禮拜，就成塊面凹晒，咪顯得個鼻大咗啲囉！」

三十七歲屬「七十後」的劉愷威，有個如此着緊自己的「四十後」父親，的確很幸福。