娛樂八掛大放送★

再進修

去年一部《巾幗梟雄》橫掃千軍，今年乘勝追擊是必然的事。金牌班底監製李添勝、編審張華標、視帝黎耀祥、視后鄧萃雯、五連冠惠英紅以及大奶奶謝雪心以外，新加入的角色，唔使問阿貴都知電視台明畀位你上。力捧的親生女陳法拉意料之內，經理人合約屬於中國星的黃浩然，被珍姐曾勵珍欽點同法拉加插一條青春浪漫感情線，證明就算沒了杜 Sir，黃浩然一樣有運行。
我冇門冇派，珍姐同梁家樹旗下嘅劇都有做，除咗兩位畀機會我，最多謝始終係添哥。我未做過古裝，係佢第一個用我演《碧血鹽梟》，相信第一次我肯做肯捱，佢至會再用我。
我唔覺得做電視比做電影差，反而認同杜 Sir同向生向太所講，電視台係磨練演員最好地方。入 TVB三年，今年最緊要，一般情況一個月製作 10集劇，我一年就劇疊劇拍足 120集，練到金睛火眼，最一生受用都係每個劇都俾我遇到良師益友。
之前教我好多嘅蔣志光、郭峰、合作過兩次嘅 Ken哥（鄭則士）以外，仲有添哥同黎耀祥。拍電影，俾人話淨係識扮型……唔係覺得自己靚仔，係開始太着緊鏡頭上自己個樣自唔自然……添哥話，演員應該面口少，但俾人 feel到你內裏有好多戲；祥仔都話，當一個演員太注重外表、太着緊形體表達時，內裏就自然少咗……一言驚醒夢中人。等於佢話多年前見識原來梁朝偉都打得一樣，由電視台浸出嚟，就係要嗰樣有嗰樣。
想唔想返出去拍番杜 Sir？拍番電影？反而唔再心急，電視台佢大把線眼，我嘅表現相信有人會同佢講，問題係入行 14年，確實係大半演技都係呢三年喺電視台賺番嚟，呢啲嘢一世受用，第時去到邊都唔驚自己捱唔到……你睇小紅姐都可以 28年後拎 5個影后啦！男演員嘅壽命更長，我有料急咩呢？呢一行，只要你唔死就得 o架啦！

唔係太子

入行多年，一直有個傳聞，說黃浩然家人在上環擁有多達七間海味鋪，是現實版的《溏心風暴》太子爺。黃浩然不厭其煩，一次又一次解釋：「我唔係賺錢買花戴！」
我名副其實係個屋邨仔，爸爸係小巴司機，海味生意其實係阿姨同姨丈 o架，我喺鋪頭食嘢都有畀錢！
中學讀鄧鏡波書院，生得高大，外形亦 ok，有啲女仔主動結識，亦試過喺電影做老臨。捱凍捱十幾粒鐘，得嗰百幾蚊，明搵笨啫，所以從來冇諗過拍戲。中七揀科，都係同大家一樣揀啲穩陣有人請有錢搵嘅工，咪入咗城大讀 IT囉。都係嗰年，義務幫朋友做 model，俾杜 Sir睇到，搵我去做佢頭一班嘅旗下藝人。 97年以後市道差咗，就跟住佢過繼去向華強嘅中國星旗下。
入行前，會覺得自己外形唔差，但我出道就係跟杜 Sir，佢出名要求高，我意識到靚仔唔只冇着數，仲係負擔同阻礙，冇料到又撈得霉，更加俾人藐。
後生冇諗咁多，係冇拍杜 Sir之後、尤其係入 TVB，至真正諗未來嘅路。頭幾個月入去已經格格不入，自己做嘅戲更加自己都冇眼睇，真係諗過今次再唔掂，第時點呢？念頭始終一閃即逝，係警惕自己手上呢個機會絕對要把握好，否則咁就收皮。
男仔唔係講樣、講自信。大家都知拍劇錢搵得唔多、我啲劇又多數未出街，多謝監製會第二次、第三次繼續搵我，就係我最大動力同鼓勵。我有信心自己比以前進步，但到底仲差幾多？好期待劇集出街後睇吓大家反應，係時候檢討、再進步。

絕種好男人

02年黃浩然拍《新紮師妹》，除了得到自己的影壇代表作劍雄以外，亦認識了為電影擔任形象指導的太太 KaKa。兩人拍拖三年幾，黃浩然說有日叮一聲，覺得就係佢啦，於是買戒指求婚：「佢好鍾意一個古董首飾盒，有次佢出 trip返屋企，我拎個盒出嚟，佢以為我只係送佢呢個盒，諗唔到入面仲有戒指，梗係喊到死啦……」 05年 30歲的黃浩然成家，說隨時打算生下一代做爸爸。
呢排我聽收音機講星座，講得啱……處女座份人最悶，而我老婆就係白羊座，最需要浪漫。再加上家太忙，一日閒閒哋開 18個鐘頭工，所有心力、體力都花喺公司，返到屋企就係死屍一條。佢默默承受之餘，亦為我做咗好多。佢有工作，工作時間亦都好長，但無論我幾夜返，佢唔想我再食街外嘢，都會好好心機炒個日式牛扒意粉畀我宵夜；行街見到有嘢啱我，比如呢個背囊，就係老婆新買畀我；我開工要水壺，佢最近一買買咗幾款返嚟畀我替換……其實好窩心，但我未必再有氣力多謝佢、攬一攬佢……希望佢唔好覺得我老馮。
我承認，好多嘢對住身邊人就會慳番啖氣，一味諗住在心中……但幾忙都好，我唔會忘記佢生日。由結婚後嗰年開始，佢每年生日我都會同佢搞生日派對，請 7、 80個 common friends、諗個主題。呢一日，亦都係一年當中我唯一會請假嘅一日。
有人都問我，做呢行見到咁多靚女，點解冇緋聞……其實你係咩人、有冇位入，每個人有眼睇……所以就算同同劇女同事好朋友，都冇事發生，加上好好彩，合作過嘅楊怡、法拉，個個都係爽朗嘅女仔添。喺廠玩得埋，我一定唔會帶返屋企，我唔覺得私人時間男女同事仲有咩好傾，老婆都喺片場識我，所以佢好明白我為人，自然有安全感。