千呼萬喚，楊千嬅與丁子高的愛情結晶品，7.6磅的Torres終於曝光！

楊千嬅入院開刀產子，休養五天後，上周六與BB秘密出院回家。丁子高為了答謝老婆為他誕下一個「超級靚仔」，早早聘請星級陪月，聯同傭人、父母等組成10人陪月團，廿四小時全天候照顧老婆。

由於千嬅餵人奶加上囝囝超級大食，丁子高預早訂購了五十條不常見的石崇魚，和過百個夏威夷靚木瓜，日日煲有助「谷奶」的木瓜魚湯畀千嬅飲，等太太身體調理好、囝囝食得好。

做了父親一星期，丁子高對本刊深情剖白其初為人父的感受：「個仔出世後，有種說不出的興奮，依家望住個仔的時候，身邊咩人同我講嘢，基本上我都完全聽唔到，當然老婆就例外啦！」

剛為人父母的楊千嬅與丁子高帶着興奮、愉快的心情，上周六帶囝囝Torres回家。剖腹產子的千嬅，經過數天休息，已回復精神飽滿，並以靚媽look示人。

丁子高在金鐘名店HARVEY NICHOLS為兒子挑選BB衫，他說：「見到靚就買，好多衫仔係朋友送，BB未出世，佢哋啲用品已塞爆成間房。」

坐月禁食雞

楊千嬅上周六出院回家，翌日早上略施脂粉的她即抱着兒子Torres，和老公丁子高溫馨影全家福。集萬千寵愛的小Torres在父母懷中表情多多，不時眼仔睩睩四圍望，甚至伸出脷仔甜笑，千嬅夫婦看着兒子，面上流露幸福喜悅。

丁子高對初為人父甚表興奮，他說，Torres中午時份出世，夜晚已懂得啜食人奶，連醫生都讚他叻仔，嘴仔夠力吸啜。難怪千嬅說：「留院休養呢幾日，都冇真正休息過，因為每兩小時要餵一次奶，所以返到屋企後，我第一時間學識泵奶，畀陪月在半夜餵囝囝，咁先可真真正正睡幾小時。」

石崇魚在坊間一直被視為「補身魚」，用石崇魚煲湯，對手術後傷口癒合功效顯著，而且不會生肉芽，不少媽媽在網上討論區都一致推介。

據知，千嬅與丁子高都沒有上產前班，但就預早請了一個星級陪月指導，在千嬅坐月時照顧她起居飲食。現在千嬅每日三餐十分清淡，菜單有蒸豬肉、清菜及白飯等，因為怕燥，所以全個月都禁食雞。千嬅說：「始終係開刀，傷口未完全復原，飲食方面都要清淡，陪月照顧我一日三餐，佢煮嘢食好好味o架，每次一攞啲食物出嚟，我老公自動變咗支銀針，乜都話要幫我試味，早兩日陪月攞碗湯畀我，佢就一啖飲咗我三分一碗，個仔呢樣嘢最似佢爸爸，飲奶完全唔使擔心。」

千嬅父母周三到醫院探望BB，榮升外公外婆的他們相當開心，大讚BB靚仔，問他們似女兒或似女婿，二人說：「兩個都似。」

木瓜魚湯谷奶

而丁子高為了讓千嬅有足夠奶水餵哺兒子，早在千嬅入院前已預訂了五十條游水石崇魚，和過百個夏威夷靚木瓜，炮製「谷奶」木瓜魚湯。據丁子高身邊好友透露：「Real話最緊要煲呢個木瓜魚湯，因為佢老婆喂人奶，呢個湯有助排乳液。不過，呢種叫石崇魚的海魚唔係成日有，所以佢一早已訂定幾十條，確保不間斷供應，仲有成百個木瓜，全部都要揀最靚先買，佢話老婆坐月一定要小心調理好身體。」

除了為老婆坐月作好安排，丁子高在兒子出世前亦相當着緊，早前本刊便拍到他趁出席活動前，到金鐘名店HARVEY NICHOLS看BB衫，之後又到地下的高級超市揀奶粉和嬰兒食品，期間又狂咪育嬰書，把握時間為兒子出世做好準備。