縱使張立基這天沒有即場唱着「Electric is her world，electric girl……」，但看着他在鏡頭前猶如甩繩馬騮般不停地跳動着，已經夠晒娛樂性了。

然而實情是，他最近才因為坐骨神經炎，做過三次手術。「年幾兩年前開始痛，痛到起唔到身，由睡房行去洗手間都要行半個鐘，有時行街都會痛到踎喺度！照磁力共振，原來裏面有三粒水囊，抽一粒做一次手術，結果有兩粒太入、太近神經，做唔到。」

問他這天如此跳着跳着痛不痛，他笑笑口：「冇辦法o架啦！如果冇呢啲就唔係跳舞o架啦！」

猶記得九十年代初，他因為一首跳舞歌曲〈Electric Girl〉，令他人氣急升，維持了沒幾年他卻忽然消失；至○九年，他由深圳回流香港時，已屆中年（他不想提及年齡）了，但還是落力地為一些私人聚會表演，最近更重返亞視為《星光大道五》做評判、為七月初頒獎禮當演出嘉賓。

畢竟，他的一切都是由跳舞開始，所以，只要有機會，他還是會繼續跳─那怕今天已難掩一臉風霜。

跳出名堂

看着張立基的興奮神情，不難感覺到他對自己的跳舞成就有多驕傲。

七八年，他還在就讀中四時，因為跟朋友到disco玩樂，結果得到麗的電視舞蹈總監賞識，羅致加入訓練班。「我唔係讀書嘅人，不過都要象徵式咁返學，嗰陣我每個禮拜有幾日，都係放咗學返去廣播道麗的練舞。其實我加入時，佢哋已經係下學期，我入咗去兩個月，就已經學番晒佢哋之前六個月嘅嘢！

首屆《未來偶像》三甲得主，除了中間的張立基外，應該沒有甚麼人記得他左右的亞軍和季軍名字了。

他說，跟第二屆《未來偶像》冠軍甄楚倩（左一），經常被人指似樣，「嗰陣我哋幾好朋友，不過好耐冇聯絡咯。」

「我喺訓練班入面，係個好出色嘅dancer！嗰年套《大白鯊》有啲歌舞場面，只會揀我哋一啲跳得好嘅去拍，我就係其中一個！後來聽番啲師兄師姐講，我先知原來嗰陣佢哋已經聽到有人講：『有個叫張立基嘅人，跳得好好！』跟住就特登嚟睇我！佢哋話我跳舞嗰陣好鬼cool，因為啲導師，通常會教學員跳舞時個樣要寬容、有啲笑容，但我係全班二、三十人中，唯一一個跳舞時唔笑嘅。」

他畢業訓練班沒多久，麗的舞蹈組便宣布解散，到他應付完中五會考後，日子過得很失落。「我係屋企獨仔，阿爸做海員，雖然屋企唔係有錢，但都未至於要我幫補。考完會考嗰年，唔係好多嘢做，之前日日都要六、七點起身返學，但嗰陣我六、七點彈起身，諗到好似要返學，但忽然醒起，已經讀完書囉喎，感覺真係好空虛，唔知做乜好！我阿爸阿媽見我咁，都叫我搵份正經啲嘅工做，但我同佢哋講，我想畀多一年時間喺跳舞度。」

未來偶像

初賽歌曲，他選了〈警察故事〉。「我嗰陣做緊梅艷芳演唱會，有晚成龍大哥做嘉賓唱呢首歌，我覺得好有衝勁，就喺後台問黃良昇（前Blue Jeans成員）佢哋意見，佢哋都贊成，跟住我就憑呢首歌入咗圍。

「到入決賽前又要揀歌。有次《未來偶像》去荔園做活動，雪屐場啱啱播緊張學友嘅〈偷心者〉，首歌有快有慢，我就揀咗呢首，仲將我想表演嘅舞蹈構思，同大會排舞師講，佢都好支持我。

八六年，他（中）憑張學友的〈偷心者〉成為了亞視第一屆《未來偶像》冠軍。

他形容，當年參賽時是一場令評判矚目的表演。

「其實我入到決賽時已經好矚目！因為啲評判未見過一個人，係以咁嘅表演形式去參加歌唱比賽！張衛健（八四年新秀金獎）嗰啲，都有舞蹈喺裏面，但佢本身唔係dancer，喺舞台上只係純粹表現自己；但我嗰陣已經有六年職業舞台經驗，乜嘢大型show都做過晒，所以我嗰陣已經感覺到啲評判對我唔錯！結果啲人都覺得我嘅表演唔止係參賽嘅水準，而係一個表演囉！」

結果他奪得冠軍，跟亞視簽了四年約，成為了首位力捧的「偶像歌手」。可惜隨着合約期快將屆滿，待遇愈來愈差，心灰意冷下，找了當歌手後才熟絡的陳自強幫忙穿針引線，九○年過檔到TVB，甫推出一首〈Electric Girl〉，即人氣急升，外界更把他跟當時同樣是跳舞歌手的杜德偉比較。「我哋成日都喺好多活動上撞到，大家都會有講有笑，佢個人幾nice呀！不過私底下，我哋唔算係朋友，冇乜偈傾。」

遇人不淑

九十年代初那幾年，算是張立基的事業高峰期，就在這個時候，他交了新女友。「我每次要出埠時，佢都幫我處理香港啲嘢，幫我睇住阿爸阿媽。我嗰陣搵到，唔係好着緊錢銀。佢冇耐就問我攞十五萬、三十萬話做生意，我畀佢，佢都話蝕咗；然後話同我買兩手中信泰富，十五萬一手，過一排升咗，我叫佢放，佢好唔高興之下賣咗，但因為要畀經紀費、釐印費，所以話我要倒蝕幾萬蚊！跟住又話叫我同人夾份買康樂園單位炒，夾五十萬，點知最後佢話個擔保搞唔成，要撻定！」結果那女子反而因此事發脾氣走了。

「後來我啲CID朋友同我分析，話個女仔其實係職業騙徒！我亦知道，原來佢曾經冒我銀行戶口簽名，又喺大角咀買咗層九十萬嘅樓，你話啲錢喺邊度嚟？」

成了《未來偶像》後，張立基曾為亞視拍過古裝劇《大鬧粉粧樓》。

九○年，他找來了成龍的經理人陳自強（右）為他穿針引線轉到TVB去。

人財兩失，他因此患了抑鬱，終日躲在家裏，不想見任何人。「我嗰陣情緒好混亂！冇晒心機做嘢！冇精神又瞓唔到，成日諗住想離開呢個世界！」

九五年有報道指他精神有問題，他上了節目《大平反》澄清，雪上加霜，最終壓力太大，決定離開香港移居深圳，多年來在內地登台維生，生活過得不錯。○九年回流，既因為母親身體不適，亦因為感覺「是時候」。「我返嚟，冇諗過要出唱片，或者會有乜嘢做o架，總之有機會，我就會做！加上我嘅坐骨神經炎只會惡化落去，所以我更加要趁仲跳得舞時，繼續跳！」

猶幸他還有跳舞。