上週二，莊思明單拖到金百利商業大廈睇心理輔導，本來全程頭耷耷的她，入中心後即開始放鬆，邊玩手機邊等見醫生。逗留兩粒鐘後，她又戴住黑超 離開。
轉介精神科
正忙拍攝無綫處境電視劇《愛•回家》的莊思明，上週二（六月五日）一個人出現於銅鑼灣崇光附近的金百利商業大廈，搭直上十二樓的心悅坊心理中心。上址是一個心理輔導中心，病者之後會按個人狀況，被轉介到精神科醫生，接受藥物治療。該中心布置陳設同屋企差不多，坐在梳化等候的莊思明神情輕鬆，未有異樣。在中心逗留了兩粒幾鐘後，莊思明落樓行去景隆街，孖生姐姐莊思華的平治房車亦校啱時間候駕，之後直駛往中環擺花街，返回她早前跟朋友合資的時裝店Tinseltown。據了解，二月初陳司翰提出分手後，當時未有工開的莊思明，幾乎日日匿埋屋企喊到眼發炎，又唔願出街見人，家人擔心得輪流實，怕她睇唔開搞出事，並力勸她睇心理，解決情緒問題。胞妹終日以淚洗面，這兩個月來要靠睇醫生食藥控制情緒，莊思敏亦忍唔住在公開場合同陳司翰割席。
死心不息
「而家有工開應該好啲，但Lisa開工都好靜，大家都知佢唔開心，同劇嘅黎諾懿、朱慧敏都叫過佢睇開啲；不過最令身邊朋友擔心係大家都覺得佢响度等緊Victor回頭，相反個男嘅就好決絕，明知Lisa要睇埋心理，依然冇反應，仲要成日換女，偏偏Lisa仲好維護佢，話後生梗係鍾意玩，去蒲去飲都係正常。」知情者說。提到要搵專家心理輔導，莊思明繼續死撐。「我去探朋友啫。（你留咗成兩個幾鐘！）因為好耐冇見，所以留咗一段長時間。（你同Victor仲有冇見面？）完全冇。」二人會否有復合機會，莊思明沉默一會後說：「唔會啦。」
壓力爆煲
藝人身為公眾人物，無論公私，少少事都會惹公眾留意，精神壓力比尋常人較重，經歷情緒病困擾，除了搵專業醫生幫手，靠精神寄託，向宗教尋求解脫亦是另一途徑。
鄭秀文拍戲抑鬱
返大陸接拍關錦鵬執導的電影《長恨歌》，有指Sammi無法抽離角色，日日自閉；回港後，她進一步與外界隔絕，直至信教後，情緒才回復穩定，再度活躍。
謝安琪食藥解憂
08年謝安琪靠《囍帖街》彈起，隨之而來是一連串負面新聞；身心俱疲的她一度出現幻聽，需求助精神科醫生，食抗抑鬱藥。
周潤發患驚恐症
00年拍完《臥虎藏龍》後，周潤發開始出現失眠、冒冷汗、呼吸困難，最後確診患上驚恐症。醫生指他是多年來積累的工作壓力所致，經歷半年治療，才完全康復。 ####
據知，莊思明甩拖後，稍有時間就返鋪頭做sales，落手幫公仔換衫。
早前出席宣傳活動時，莊思明全程木無表情，原來已經開始睇醫生食藥控制情緒。
有份出席派對的新女Judy，投男友所好，揸槍在現場走來走去。
陳司翰喜愛夜蒲，上月搞制服生日派對，飲大了的他，醉到瞓在夜店，不省人事。
留言列表
{{ article.title }}
