King曾在超過 20間酒店任甜品師傅，愛以不同材料做製作。

創業通

開甜品工場　月賣 3,000件蛋糕

2013年02月27日 ~~ 第1101期交易通．搵車快線

開 cafe是不少人的夢想，像今年 24歲、曾在多間酒店任職甜品師傅的 King也有這個夢， 3年前更與友人合資開店，可惜失敗收場，更欠下債項，幸而經過多番努力，去年 King再接再厲創業，不過這次為節省成本，改為只開工場，批發件裝蛋糕到約 10間 cafe，及接客人訂造蛋糕柯打，又與有機農場 crossover，令生意漸有起色，開業不夠半年，月賣近 3千件蛋糕，約賺 2萬，再次為夢想努力。

採訪當日屬黃昏時分，位於觀塘某工業大廈內 Spatula蛋糕工場，記者在走廊已聞到陣陣香氣，原來老闆 King與拍檔在廚房正忙於製作蛋糕，「我哋每日都要製作約 10款蛋糕，隔日要送到唔同嘅 cafe。」蛋糕造型精緻、味道也特別，像白朱古力荔枝玫瑰花茶蛋糕，便以花茶作材料，入口有花香味道，甜度適中。「每 2至 3個月就要轉一半以上嘅蛋糕款，希望畀多啲新鮮感客人。」
這些件裝蛋糕，主要供應給約 10間 cafe，全部由 King逐間敲門傾合作，「我哋冇門市，主力做批發，我哋之前花咗成個月時間，搵咗一啲路線同我哋比較夾嘅 cafe，上去試食蛋糕後，覺得我哋整嘅蛋糕適合佢哋，再同佢哋傾合作，搵我哋做供應商。」
合作夥伴不易找， King不時遭到拒絕，「要 cafe轉換供應商唔容易，試過有啲 cafe去傾幾次都唔成功，亦試過有 cafe攞過一次貨就冇回頭。」幸而也有不少 cafe欣賞他們的手藝，現時約有 10間 cafe長期合作，每月約訂購 2,500至 3,000件蛋糕。

白朱古力荔枝玫瑰花茶蛋糕$30
King主力做件裝蛋糕批發，並會不時研發新口味來留客。

藍莓乳酪蛋糕$30

寫 blog吸訂造蛋糕客

除了 cafe客，一直有寫開 blog的 King，還在網上累積了過百個長期捧場客，靠着他們人傳人，接到不少人訂造蛋糕柯打，一磅蛋糕價錢為$280。「我冇特定蛋糕款式，會因應客人喜好，度身訂做，試過有客人鍾意食辣，我就整咗個羅勒黑椒菠蘿蛋糕畀佢，反應都好好。」現時磅裝蛋糕每月售出約 30個，客人需上門自取。
King只以工場形式生產蛋糕，而不開門市，除了因為經費問題，還因為他曾因為開門市，狠狠地摔了一交。中五畢業後， King加入中華廚藝學院的西餅製作課程， 5年多前以第一名成績畢業，甫畢業即獲多間 5星級酒店爭相聘用。「當年為咗攞多啲經驗，我冇安定喺一間酒店長做， 2年幾做過超過 20間酒店。」其中更曾任米芝蓮二星餐廳 Bo Innovation的甜品部主管。
3年前， King與剛相識的拍檔在九龍灣開餅店，一心想大展拳腳，可惜開業不久便與拍檔產生糾紛， King一怒之下，沒有履行合約工作，最終被告上法庭，要以 36萬元和解，令他被迫問銀行借貸抵債，「嗰時好失落，冇諗過會搞成咁，我唔開心到連自己嘅咭片都冇攞走。」
其後餅店被一間食品研發公司收購，該公司老闆靠着遺下的咭片找到他，請他做甜品研發，「成件事好似拍戲咁，對方咁啱想搵人研發甜品，睇到咭片知我做甜品，就搵咗我。我當時未有任何新方向，接受咗呢項工作。」

咖啡朱古力慕絲蛋糕$30

菠蘿杏脯迷迭香果醬$55
由 King新鮮手造的果醬，會混合不同水果及香草，味道獨特。

學會研發新款口味

2年間， King不但還清債務，更學會研發新口味的蛋糕，「做咗甜品研發後，學識咗用唔同材料做甜品，先發現甜品世界可以好闊，好想蛋糕有多啲變化。」去年， King重燃鬥志，與認識多年的朋友再合資四十多萬創業，因開門市成本大，他們改為專做蛋糕批發。「搵拍檔做生意，都係搵老朋友好啲，因為大家識得耐，知道大家脾性，合作溝通都易啲。」
雖然不是門市，但 King也想盡辦法宣傳，例如搞甜品聚會，吸納更多甜品愛好者。「我寫 blog同 facebook都有班支持者，所以諗到搞 gathering，每次畀 30位人士參加，喺 cafe包場，提供約 12款蛋糕，同參加者逐款蛋糕分享製作心得，由佢哋試食畀意見，𠵱家搞過 2、 3場，次次爆滿。」
活動收費只用來交包場租金，雖然沒有額外收入，但卻做到極佳的宣傳效果，不少參加者會把照片放上 facebook，及推介給朋友，「有參加者之後做咗熟客，成日會嚟訂蛋糕。」
與 cafe相熟後，今年情人節還有 cafe邀請他開班教做蛋糕，「以前都有諗過搞蛋糕班，但好多行政工作要做，例如報名、收費等，𠵱家同 cafe合作，我哋只係負責教授嗰部分，可以慳好多時間，未來想 keep住呢類合作，因為過咗聖誕及情人節， 4、 5月係淡季，可以喺呢段日子教多啲班。」

Hazel＆ Hershey老闆 Birdie
我試過好多間蛋糕店，都搵唔到合適嘅蛋糕，後嚟試過 King整嘅幾款蛋糕，用好多生果去製作，味道好清新，佢仲幫我設計可以配合到咖啡嘅蛋糕，好啱我哋 cafe。

位於中環卑利街的 Hazel＆ Hershey，也有向 King取貨。

健康製法參展宣傳

除了蛋糕，原來 King還會炮製曲奇、蝴蝶酥、麵包，甚至果醬等，全部人手新鮮製作。「我哋主張全部食品都係手造，而且唔會落添加劑，希望更加健康有益，好似麵包嘅酵母，我哋用生果細菌去發酵，唔係落酵母粉。」
另外， King還參加過紅酒展，大收旺場，他們推出的 cake set只要$65，便可吃到 5款蛋糕， 4天紅酒展售出逾 1,300份，營業額有 9萬元，盈利有 3、 4萬。「不過唔係次次成功，好似美食展就只係賺到 3、 4千，因為客路唔同，就算蝴蝶酥賣$20一包，啲客人都嫌貴。」但 King沒有灰心，坦言汲取今次教訓後，下次再戰美食展，會因應不同客群推出不同食品。

美食展主打散包的蝴蝶酥和曲奇，雖然生意麻麻，但令 King（中）吸取到更多展覽經驗。

King會在不同 cafe舉辦甜品聚會，讓參加者試食蛋糕，藉此吸納客源。

為增加收入， King不時參加位於太古坊的有機農墟，即場售賣果醬、麵包等，反應極佳，一日可賺 4千元。因為農墟， King認識了一間本地有機農場，與對方合作，以新鮮蔬果製作蛋糕，「我哋試過 crossover，以拆賬形式，由佢哋供應番薯，我哋製作成甜品，做咗限量 100set嘅甜品，放喺農墟賣， 2星期就賣晒，嚟緊我哋會再試以番茄、果醬等研發新口味，夏天又會喺農場開麵包班，未來我都想同多啲公司合作，希望有更多新火花，研製更多新口味嘅蛋糕。」

King（左）與拍檔每日都在工場製作蛋糕，全年無休。

客人 Paola Sinisterra
King做嘅蛋糕口味好特別，又好味，令我每次都有驚喜。

點入有機農墟？

King在有機農墟賣果醬和麵包，大受歡迎，日賺 4千元。

King提及位於太古坊的有機農墟，逢星期日早上 10時至下午 5時，在鰂魚涌的糖廠街擺檔，約有 40個檔口，主要售賣本地有機蔬菜、食品、手工藝等，現場還會有音樂會、活動等，免費入場，而檔主售賣的產品只要符合要求，如售賣有機蔬菜、健康食品、手工藝、花卉等，便可以申請開檔，檔口尺寸共有 3種，包括 2米× 2米、 1.5米× 3米及 3米× 3米，檔口租金由$1,000起。
King說：「我哋暫時擺過 3次檔，每次反應都唔錯，而且可以識到好多志同道合嘅人，增加唔少合作機會同商機。」 4月及 5月的檔口現已開始接受申請。
參考網址： http://hkmarkets.org