Isaiah　 22歲
珠海新聞及傳播系 Yr.2
chocolat-ier元朗店老闆
Isaiah現於元朗廣場開設朱古力加盟店，以夾糖形式經營。

U撈

珠海妺$5,000起家　做朱古力店老闆

2013年02月27日 ~~ 第1101期交易通．搵車快線

2年前中七剛畢業的 Isaiah看到一篇有關 chocolat-ier朱古力店訪問，忽發奇想聯絡報道中的老闆，批發朱古力然後找地方散貨。只靠 5千元起家，今日仍在學的 Isaiah已在元朗廣場開了一間朱古力加盟店，平均月賺 2萬多，連朱古力公司 chocolat-ier老闆都大讚她叻女！

未開鋪前， Isaiah主攻擺 road show散貨，圖為 11年於將軍澳廣場擺攤位。

「前年睇到《交易通》報道 chocolat-ier朱古力店，唔知點解自己好想賣朱古力，所以膽粗粗打畀老闆 Crystal問可唔可以入貨，當初只係諗住去大學擺 road show試賣。」現就讀於珠海新聞及傳播 Yr. 2的 Isaiah表示，最初創業只是抱住貪玩心態。
每間大學不定期舉辦短期展覽市集， 4日至 1星期的攤位租金約 1千元。由於第一次搞，為減低成本， Isaiah和其他人夾租一個攤位，花$5,000入貨及付租金，於 11年 11月在浸大賣朱古力，每 100克賣$90，結果 1星期賺到$1,500。「可以話打咗支強心針，反正有貨賣剩，我開始計劃下次再去邊度賣，有諗過返大陸散貨，不過 Crystal叫停我，話唔知內地市場兼人生路不熟，喺香港擺 road show儲吓經驗同錢先。」
Crystal為 Isaiah引路，她每逢擺 road show都會叫 Isaiah參與， Isaiah覺得自己是初哥，樂意接受意見。「我仲係學生，可以當兼職咁做，佢話荃灣、大埔有展位，我照去，結果一年內參加咗十幾次，有時賺 1、 2千，得個做字；但好多時都賺到 4千至 1萬，令我清楚客人口味之餘，又幫我儲錢去開鋪。」

花 20萬元朗開鋪

結果於上年 10月 Isaiah與家人投資約二十多萬，在元朗廣場開了 chocolat-ier元朗分店，由於 Isaiah與 Crystal合作無間，不用付一筆過加盟費用便可開加盟店，但要承諾每年入到特定數量的朱古力。
由於 Isaiah要返學，所以要請人看鋪，「我每星期返 4日學， day off同放學就去鋪頭，自己看鋪同個 sales看鋪生意差好遠，因為 sales打份工，唔會好上心去 sell客；每逢考試及交 project前幾日，未必有時間日日去睇鋪，有錢都未必賺到！」
現時店鋪每月平均賺 2至 3萬，聖誕檔期屬全年最旺的日子， Isaiah必須親力親為，每晚只睡 3、 4個小時，幸好剛過去的聖誕，她就賺 4萬多元。「成日留喺鋪頭密密做，加上近排炒咗個 sales，又要重新 train過新人，真係好辛苦，搞到自己都殘晒。」

每逢 day off及放學後， Isaiah會去看鋪， sell客收銀一腳踢。

chocolat-ier老闆 Crystal
Isaiah人際手腕好好，識得同人打交道，佢試過贊助朱古力畀商場換取展位，好醒目。

做老闆有得亦有失

未畢業已做老闆， Isaiah自言有得亦有失，「雖然盤生意有錢賺，最初做都覺得有挑戰性，但我呢個階段應該好好享受校園生活，開咗鋪後，好似冇晒年輕人應有嘅生活，同埋少咗陪屋企人，感覺疏離咗好多。」
其實最大的得着，是學會溝通技巧和培養出責任感，「做咗老闆，覺得自己識得同人溝通，有時透過學校去做義工，我會變得主動同健談。自經營朱古力店後，都發現自己鍾意對人，其實畢業後嘅方向仲未確定，可能會再開分店，或者搵份工做 PR或記者，希望可以見識多啲。」

上年難得抽空跟學校去了北京進行交流活動， Isaiah（前）說創業後少了參與學校活動。

上年 chocolat-ier贊助 Alive Not Dead 5周年派對， Isaiah（左）義務幫總公司做 helper，當去見識一下。

初哥創業揀加盟店有着數？

開加盟店必需要付一筆加盟費，金額由十多萬至四、五十萬或以上不等，並必需要向總公司入貨。成為加盟店的好處是貨源、宣傳等都由總公司負責，可為創業初哥解決不少煩惱，但經營自由度相對較低，如包裝、定價必需跟從總公司。創業者需先衡量自己資金，及對公司發展的信心。
想像 Isaiah成為 chocolat-ier加盟店老闆，加盟費約 35萬，總公司負責宣傳、培訓及供貨，此費用不包括貨錢、人工及租金等。
Facebook： chocolat-ier