接受領養：金妹　唐狗
2個半月　女仔
身世：在馬鞍山一個地盤發現，領回時有皮膚病，現已治好。

Petbook

西貢街頭搞 road show領養寵物

2013年02月27日 ~~ 第1101期交易通．搵車快線

現時領養寵物受到重視，不少寵物團體會不時舉辦各種領養活動，但身為西貢街坊的 Debbie，為了幫助有需要的狗，和一班志同道合的朋友成立 HOME DOG HOME，每逢星期六、日都會在區內舉辦街頭領養日，一年來已幫助了 150隻寵物找到新家庭，而他們希望可以有更多熱心市民關愛流浪狗。

接受領養：尾尾　唐狗
5個月　女仔
身世：在西貢鹿尾村發現，故名尾尾。

「我哋係同時間接收唐狗媽媽 Maple同佢 6個子女，但狗 BB好快俾人領養晒，得番 Maple一個，好彩有一個外國家庭最後肯收養佢。」 Debbie是 HOME DOG HOME的始創人，只要不落雨，他們每逢星期六日及假期都會在西貢親民街搞 road show，幫狗狗搞街頭領養。「我哋未有固定會址，狗狗平時暫托喺寄養家庭，一到領養日就會各自帶狗狗聚集喺度。」
HOME DOG HOME接到的案件 9成以上是唐狗，「我哋有接收純種狗，試過帶純種狗去 road show，好多人聚晒喺佢哋度，好快有人收養，其他待領養嘅唐狗就冇咩人理，但我哋覺得唐狗更需要人去關注，𠵱家我哋只將純種狗放喺網上呼籲人領養。」其實 HOME DOG HOME都有貓隻領養，但貓隻不方便帶出街，同樣只作網上呼籲。
「街頭多流浪狗，會造成好多問題，會俾居民投訴，啲狗會俾漁護署捉走。我哋覺得唐狗都係生命，更加值得去幫忙，所以我哋會主力接收唐狗嘅 case。好似年廿八嗰晚收到求助，喺西貢鹿尾村見到隻唐狗受咗傷，我哋趕過去見到一隻狗坐咗喺度，佢後背同腳不斷流血，我哋即刻帶佢去診所，經檢查發覺佢係俾其他狗咬傷，仲感染咗牛蜱熱，情況好危急，我哋即刻搵義工嘅狗狗幫手輸血，雖然醫療費都幾昂貴，但好在佢已經差唔多好番晒，等待緊好心人領養。」

由幫助流浪貓開始

接受領養：白豬　唐狗
約 10歲　男仔
身世：在長洲被漁護署捉走，後被贖回，接受了絕育和打了預防針，性格溫純。

Debbie本身是家庭主婦，成立 HOME DOG HOME全因她的「婦人之仁」，「自細有養開狗， 04年搬咗入西貢，住嘅地方不時有自來貓，我就買貓糧餵佢哋，跟住愈嚟愈多貓聚集，可能啲貓互通消息，知道我呢度有嘢食，直至有一日見到餵緊嘅貓帶埋成班貓仔出嚟，開始覺得咁落去唔係辦法，真係幫唔到太多。」
Debbie明白到只是餵流浪貓不是長遠之法，開始改變方式，「我好想幫啲貓，最好嘅方法係帶佢哋去診所絕育、杜蚤。我去附近山頭幫啲流浪貓，識到一個寵物團體嘅義工， 08年開始喺呢個團體做義工搞領養日，都喺西貢親民街做街頭領養，見到啲寵物被收養，覺得好有意義。」
Debbie覺得領養日可以直接幫到被遺棄的寵物，但當時參與的寵物團體的想法並不是這樣，「個團體之後冇再搞領養日，我覺得同自己嘅方向好唔同，於是就離開咗，喺 12年 2月同 8個志同道合嘅朋友組織咗 HOME DOG HOME，開始喺原來嘅位置繼續搞領養日。」

希望增加寄養家庭

HOME DOG HOME並不是一個認可的非牟利機構，造成經營上的困難，「起初都係諗住組織個團體就得，但慢慢發覺咁樣好唔方便，好似同政府申請場地搞活動，要成為一個認可嘅非牟利機構先做到。𠵱家幫助狗隻，好似打預防針、買狗糧都係我哋同一班義工自己出，每個月最少要支出$12,000，其實可以話捱緊。我哋申請緊做非牟利機構，到時就可以向市民募捐。」
現時義工約有 30人，而寄養家庭約有 13個，「上年幫助到約 150隻寵物搵到新家庭，當中超過 9成係唐狗，其餘係貓貓同名種狗。其實𠵱家最欠缺嘅係寄養家庭，有時義工收到求助電話，接收隻寵物後，如果冇人可以寄養，惟有將佢暫住喺啲寵物診所或者酒店，到領養日再帶出嚟等人領養，個行政成本會好高，所以想有更多嘅人幫手。」

Walter Family領養者

有一次經過西貢親民街街頭，見到唔少人拖住狗圍埋一齊，原來佢哋搞緊領養日，嗰陣我哋睇到 Maple，覺得純種狗同狗 BB容易搵到人收養，反而 Maple呢啲成年唐狗比較難有機會，我同屋企人覺得應該畀機會佢，於是決定領養佢。

點領養？

想領養的人士可以出席星期六、日舉辦的領養日，看看有沒有合緣分的狗狗，或者上 HOME DOG HOME的專頁看看， Debbie說：「領養者一定要入嚟同狗狗見吓面，我哋會先了解佢同屋企人嘅想法，之後會進行家訪，睇吓啱唔啱狗狗住，最緊要係同意我哋可以跟進番寵物情況，好似到 6個月大時一定要帶佢哋去絕育，同定期帶去檢查同打預防針。」
查詢： facebook/HOMEDOGHOME

每逢星期六、日， HOME DOG HOME的一群義工都會帶待領養的狗狗到西貢親民街街頭舉行領養日。

Debbie不時要與想領養者介紹每隻寵物的身世，要對每隻待領養寵物有一定認識。

Doris義工

本身做開貓嘅暫托家庭，有次行山見到一家流浪狗，之後覺得應該幫佢哋，於是聯絡上 HOME DOG HOME，仲成為佢哋嘅義工同暫托家庭，𠵱家仲差大妹同細妹未俾人領養，希望佢哋快啲有新家庭。