專題 Log In

老闆都心動　 Lexus LS600hL

2013年02月27日 ~~ 第1101期交易通．搵車快線

揸車、坐車，都要講身份，普通一個打工仔買部拉利，供都供唔起，邊有錢入油去溝女？正如一個大老闆，日理萬機，點可以買部小房車，坐到好似屈蛇咁折磨自己？所以大老闆御用嘅頂級房車如 M-Benz S-Class或 BMW 7系，都有巨大車身、極其舒適乘坐性，再加上易於操控嘅駕駛感，務求畀老闆公私兩用，自己揸又得，搵司機載又得。
今次試車嘉賓譚先生正正就係老闆級人馬，多年來擁有過多代 BMW 7系，現有上代 7系已使用多年，係時候踏入換車期，今次就搵佢試吓最新 Lexus LS600hL，睇吓會唔會變心？結果，未試揸先試坐，已即時心動……

Lexus LS600hL Spec.

引擎： 4,969c.c. V8
馬力： 394ps/6,400rpm
扭力： 53.0kgm/4,000rpm
系統輸出： 444ps
傳動：無段變速自動波
懸掛：前、後多連桿
制動：前、後透氣碟
耗油： 11.6km/L
車身： 5,210 X 1,875 X 1,480（ mm）
車重： 2,340kg
車價：$1,899,590
查詢：皇冠汽車（ 2820 4020）

譚先生有幾迷 BMW？除多年來都以 7系作為腳車外，同時仲有 X5及 525i GT，對 BMW車系嘅特性瞭如指掌。不過迷還迷，多年來都係用 BMW，令到少咗接觸其他牌子新車，對 Lexus呢類日本高級車認識更少之又少。「我之前只係坐過朋友嘅 Lexus，好似係中型房車，外表同車廂都冇乜特別印象，所以都冇再去留意呢個牌子。」

BMW 745iL車主譚先生

LS600hL拍埋譚先生部 745iL（左）仲要長多 31mm。

「完全冇諗過，有日本車可以大過我部車！」

今次嘅 LS600hL其實係一次大型 facelift版本，車廠大刀闊斧將車頭大改造，重點係加入車廠新標記漏斗形鬼面罩，而且車頭燈組合、指揮燈、射燈，全部用晒 LED，整體更年輕化，亦都同 GS車系及即將推出嘅新 IS組成家族式面譜，十足歐洲車廠咁有 family face。「 LS個外表都幾靚，起碼對我嚟講有新鮮感。之前我都有睇過新款 BMW 7系，但今代唔吸引。」
筆者先將譚先生部上代 7系拍埋部 LS600hL影相，試圖比較一下兩車長度，點知連譚先生都大表驚訝！「我仲以為我部車已經好大啦，點知呢部 Lexus仲大！完全冇諗過有日本車可以大過我部車！」事實上， LS600hL係最頂級 LS，長陣車身達 5,210mm，比譚先生部 745iL仲要長多 31mm，係日本車中巨無霸，主要作用當然係加大後座空間，造就極上乘坐感受。

全新頭燈組合內裏全部都係 LED燈。

尾燈暗藏 Lexus嘅「 L」標記。

雖然後座同尾廂唔可以貫通，但都夠放 2-3袋 golf棍。

LS600hL獨有 hybrid車章喺車身。

老闆座駕仲有得揀

通常實業老闆買車都好似譚先生咁屬穩陣派，用開一個牌子冇問題就唔會轉，咁樣其實錯過唔少好車㗎！就好似今次部 LS600hL咁，如果唔係筆者搵譚先生試車，佢根本唔會入 showroom望佢一眼！其實同 BMW 7系同級嘅車，一般人只會諗到 M-Benz S-Class，但其實除呢 2款班霸之外，仲有 Audi A8同 Jaguar XJ，同樣豪到不得了，而且罕有啲，揸出街有型啲！

四驅高科技 Audi A8

Audi嘅 A8雖然係旗艦型號，但街上面嘅數目可能比 LS600hL更少，主要係因為形象年青，易手價插水。不過 A8實在係部好車，全線用 quattro四驅，而且用高科技鋁合金車身，令車重低於 2,000kg。車價：$1,209,800起

英倫貴紳士 Jaguar XJ

英國豪車唔係只得 Rolls Royce同 Bentley， Jaguar亦都充滿貴氣！頂級旗艦 XJ除保留大量英國車獨有嘅電鍍裝飾外，仲有勁多版本選擇，剛推出入門 2.0版本，直四 turbo引擎都有 240匹馬力，車價只係$898,000，買嚟粗用一流。

「後座太舒服嘞！益晒乘客！」

以往筆者搵嘉賓試車，絕大多數嘉賓都會第一時間上司機位望望又坐下，但今次特別要求譚先生先坐下 LS600hL後座，由代理嘅專業司機載佢暢遊 20分鐘，感受一下 LS600hL著名嘅舒適後座，睇睇坐慣豪車嘅老闆有咩評價？「車廂好闊落，仲邊有投訴？又按摩功能、又可以躺低個身，呢個後座太舒服嘞！益晒乘客！如果用嚟招呼貴賓就一流，但我平時都鍾意自己揸車，後座我受惠唔到，如果我買我唔會要呢個後座，除非我請司機揸，我只做乘客。」
咁又係， LS600hL個後座其實舒適豪華得過分，自己一面揸車，一面喺倒後鏡望住個乘客瞓到流晒口水，老闆都冇癮啦！

譚先生話後座太舒服，如果作為乘客，根本冇投訴。

譚先生日常主要自己揸車，所以前座舒適性更重要。

唔好以為日本車冇力挑戰歐洲品牌， LS600hL就成功創出新市場。

後座手枕上有大量按鈕，主要操作音響同座椅角度。

只有左後座係大老闆座位，可以伸直晾腳外，仲有按摩功能。

有需要時，可以㩒掣將前座移前，令後座腳部空間更充裕。

「多掣撳到會擔心用唔晒。」

LS600hL可以話係 Lexus嘅晒冷之作，如果 LF-A係 show晒 Lexus sporty一面， LS600hL就係極盡 Luxury一面。中控台雖然有個 12.3吋高清顯示屏來負責簡化多項操作，但仍有多個按掣需要熟習操作。「其實都幾複雜，因為有時上到車未必想搞咁多嘢，呢度多掣撳到會擔心用唔晒。」
唔好以為 LS600hL只一味晒高科技式豪華，當中都有好多花人力同心機去調校，好似睇落簡單一個桃木軚盤，原來需要經 67個工序、 38日時間先可以完成！而頂級 Mark Levinson音響系統，更用咗 2,000小時去調校，絕唔簡單！難怪 LS600hL本 user manual仲厚過黃頁電話簿。

中控台上方有 12.3吋顯示屏，盡量簡化所有操作。

表板中央都有彩色顯示屏，簡單操作全部可顯示。

無段雙連波箱可以喺波棍作 8速＋/﹣。

獨立扭掣設定行車模式，而且仲可以電控升高車身。

「我未試過混能車，估唔到可以咁靜。」

Lexus差不多全線車系都有 Hybrid版本，而 LS更以 LS600hL作為車系中嘅頂級。配用 5.0公升 V8引擎及摩打，系統總馬力達到 444匹，比譚先生部 745iL多 111匹。加速更快、更勁似乎係必然嘅事，但譚先生一啲都唔放上心，反而對 Hybrid系統最感興趣。「我未試過混能車，估唔到可以咁靜，着車一啲聲都冇就可以行得！要讚！而且我最憂慮嘅引擎同摩打切換時嘅唐突感覺都冇，真係好驚喜！行車時當然又快又穩定，但我唔追求速度，所以 444匹喺香港真係用唔着，除非上大陸打 golf啦！」
試坐過、試揸過，譚先生又會唔會考慮脫離 BMW 7系行列？「我對 LS都好有興趣，不過如果買都係要短陣，因為我自己揸會多啲，揸長陣似司機。要唔要 Hybrid版就要試埋 LS460先知嘞！」

車主手冊成本電話簿咁厚！

操作好似電腦 mouse嘅系統操控桿。

用頂級 Mark Levinson影音系統，加上超靜車廂，仲正過屋企聽歌。

軚盤都有發熱功能（紅圈），冬天就知佢好用。

譚先生認為香港路面用唔着 444匹馬力，上大陸打波就可以飛番轉。

四驅系統幫助下，車重達 2,340kg都可以行車靈活穩定。