現年 23歲的 Nicholas Hoult，身高 6呎 2吋半，高大有型，於新戲《熱血喪男》中扮深情喪屍冧死女。《熱》片早於 2月頭美國上畫，一出即打低《俠林雙俠：獵巫世紀》成票房冠軍，至今累積票房已高達 5億 3千萬港元。

西面

砌低 Robert仔　《熱血》喪屍男行蛇運

2013年02月27日 ~~ 第301期 Face

白面殭屍仔 Robert Pattinson憑電影《吸血新世紀》紅足 5年，但自《吸血》系列於上年底埋尾後， Robert仔冇晒聲氣。
Robert仔後勁不繼，今年就有另一新紮白面靚仔 Nicholas Hoult接棒。跟 Robert仔同屬英國演員的 Nicholas，本月中亦憑住新戲《熱血喪男》扮靚仔喪屍冧死女，去到月尾又多一套魔幻大製作《傑克：巨魔獵人》推出，一個月內有 2套妖戲輪住上，唔使搵麥玲玲都知 Nicholas蛇年紅硬。

濕身都似

《熱血喪男》中， Nicholas飾演喪屍擺明走 Robert Pattinson舊路，戲中佢同女主角 Teresa Palmer拍水戲，亦似足《吸血新世紀》中 Robert仔同 Kristen Stewart嬉水戲（左圖）。

跟同鄉 Robert Pattinson一樣， Nicholas於最近上畫的《熱血喪男》扮靚仔喪屍，為咗女主角 Teresa Palmer，更用盡方法令自己由喪屍變回人類。扮癡情喪屍肯定冧爆女，今月尾 Nicholas更走入魔幻世界，於 2月 28日香港上畫的《傑克：巨魔獵人》中，化身降魔使者，同巨人軍團搏鬥，冧完女再攻埋合家歡市場，唔怪得美國傳媒都睇好 Nicholas今年必上位。

Nicholas高大威猛，原來有畏高，最近出席新戲《傑克：巨魔獵人》記招時就自爆：「我喺套戲花咗好多時間學攀石，教練仲強迫我喺大風大雨天氣下攀，起初驚到想死，但克服咗之後覺得好好玩。」

上年 Nicholas同 Jennifer Lawrence拍拖期間，經常被人影到糖黐豆出街拍拖，當時 Jennifer表面上好似小鳥依人咁攬住 Nicholas條腰好和順，背後原來經常鬧人超難頂。

Gay片冇難度

其實，今年 23歲、出身於英國的 Nicholas，爸爸是飛機師、媽媽是鋼琴教師，家境唔錯。自小已夢想做明星，所以 7歲開始便由童星做起，由於戲路闊、唔只可以走靚仔路線，就算曾在英劇《 Skins》和電影《單身男人》中扮 gay演男男情慾戲一樣 no problem，所以深受媒體製片人歡迎，入行 17年間， Nicholas已拍過 14套電影， 16套電視劇，由細到大年年有工開。

拍戲撻着
前年， Nicholas同 Jennifer合演《變種特攻：異能第一戰》時， 2人都只係配角，大家地位一樣咁高咁大，所以特別夾，之後卒之撻着。

童年拍巨星
11年前即 2002年，當時只得 12歲嘅 Nicholas就拍住英國巨星 Hugh Grant主演《單身插班生》，戲中 2人勁多對手戲。

09年， Nicholas同英國影帝級演員哥連費夫合演《單身男人》，戲中 Nicholas飾演一名暗戀哥連嘅大學生，兩人對望時眼神好鬼沉醉，難怪當時有人懷疑 Nicholas係基。

基味濃
而早於 07年，當時 17歲已大個仔嘅 Nicholas於英劇《 Skins》中，就同男對手 Mitch Hewer上演赤裸激咀戲， so gay！

影后前度狂恰

扮完深情喪屍後，本週四（ 28日）上畫嘅《傑克：巨魔獵人》中就做降魔使者，同女主角 Eleanor Tomlinson一齊對付巨人軍團。

雖然 Nicholas青靚白淨，但入行以來，只曾與今屆金球影后 Jennifer Lawrence拍拖， 2人於前年合演《變種特攻：異能第一戰》時撻着，最初梗係勁癡纏，但因 Jennifer去年上位後態度開始囂張，經常出言呼喝一向性格比較儒弱的 Nicholas，起初好似鵪鶉咁唔敢駁嘴，一路死忍，但之後 Jennifer愈鬧愈過分，還開口話 Nicholas地位襯唔起佢，最後 Nicholas忍唔住提出掟煲。𠵱家 Nicholas上位，終於可以威番次畀前度睇。

Robert仔跌 Watt

Robert Pattinson自做完《吸血新世紀 4破曉傳奇下集》後，冇得做白面殭屍冧女，人氣跌晒 watt，雖然踏入 2013年仍有兩套片如《 The Rover》及《 Maps To The Stars》等住拍，但並非大片，而同戲拍檔亦只是二線演員如 Guy Pearce等，級數同《吸》片冇得比，簡直降晒呢。唔怪得最近傳出 Robert仔同 Kristen Stewart拍拖嘅進展，靠舊緋聞博曝光。