試拍行人

今日好玩嘢

iPhone拍 time lapse快慢任我玩

2013年02月27日 ~~ 第301期 Face

今屆奧斯卡有份提名最佳紀錄片嘅一套《 Searching for Sugar Man》，導演受訪時爆出因 budget問題，有部分片段只係用 iPhone拍攝，原來 iPhone拍片真係可登大雅之堂！但其實除咗為慳錢， iPhone只要配合適當嘅工具同 app，仲可以拍到更多意想不到嘅創意片，就好似加裝新出嘅 Manfrotto腳架仔 KLYP，就拍到具電影感嘅 time lapse片，人人都可做大導！

互動片段

實拍示範

何謂 time lapse

試拍街景
若從高角度拍街景，行人同車都會極高速咁走動，變晒鬼影，唯獨企定嘅人會睇得清楚。

Time lapse（縮時攝影），即係將一段本來應該好長嘅片，濃縮到好短，於是翻睇時就會見到啲景物郁得勁快。電影入面最常見就係超快咁由日頭變夜晚，或者啲人行得快到變鬼影，好多時仲會配合埋主角企定定唔郁，造出強烈對比效果。

經典電影 time lapse

國產凌凌漆
凌凌漆飲 dry martini呢場，前面啲行人勁快就閃過，但佢就極慢咁拎起杯酒，凸顯佢係一個風度翩翩嘅豬肉佬。

東邪西毒
戲入面王家衞拍咗大量太陽高速由東方轉到西方、浮雲急速飄動、樹木勁快咁俾風吹嘅意境畫面，拍就拍成日，但播出嚟全部只係 1、 2秒，唔怪得套戲拍咗幾年。

必備腳架

用 iPhone拍 time lapse嘅首要條件就係要企定部機，所以一定要用腳架。 Manfrotto KLYP（讀音： clip）套裝提供一個有特別扣位嘅 case，套上 iPhone後，就能加裝螺絲孔轉接器，再插上套裝包埋嘅 DC仔腳架，或另購嘅單反長腳架，之後無論喺咩地方 set機長時間拍攝都得。

用套裝本身包埋嘅腳架仔，已可令 iPhone穩陣咁座枱拍攝，另外亦有扣位可加裝送埋嘅外置閃燈。雖然暫時 case只有 4S款，但只要拆走上半截殼， iPhone5都一樣裝到腳架，只係裝唔到閃燈啫。$700（ Manfrotto/2327 6728）

腳架轉接器亦可裝喺機底，打直部機裝腳架都冇問題。出街拍攝嘅話，就最好用番支大型單反腳架，就位易好多。

長時間影相變成片

每個 time lapse鏡頭都需要長時間拍攝，不過同普通拍片加快鏡唔同。 iPhone拍 time lapse其實係每隔若干時間就影一張相，再將相片串連成影片，高速播放時就會同拍片冇分別，但就有 size file細好多同處理時間短好多嘅優點。不過拍咁長時間，冇可能人手逐張㩒快門，需靠 app幫手，喺 App Store搵會發現唔少呢類 app，多數功能都大同小異，筆者就推介呢個叫 TimeLapse嘅免費 app。

Time Lapse/Free

下載網址

拍攝 step by step

1. Set片長
拍之前先要 set好條片真實時間想拍幾耐、成品片長幾多，兩者差距愈大，畫面愈快愈誇張。例如拍 10分鐘變 10秒的話，啲人會行得快過拍 10分鐘變 1分鐘好多。

2.企定拍
跟住就可以開始拍，取景器仲有對焦點同測光點 icon，可以篤芒調校，然後就叫 model企定定唔好郁，任得行人喺佢身邊正常走過。

3.完成
拍人唔使太耐， 1分鐘左右就夠，濃縮成 10秒後， model企定喺畫面中心，但旁邊啲人就勁快咁走過，好得意。若喺 set時間嗰版校埋慢快門，行人仲會變埋鬼影，好似大相咁，效果仲明顯。

慢快門捕捉流動美態

iPhone加腳架，當然唔只得 time lapse咁少嘢玩，拍片玩完加快，影相仲可以變慢，指嘅係用慢快門！ iPhone標榜影相 easy，當然唔會有得校快門，只會用預設嘅正常速度去影，但適當咁用慢快門影相，確實能拍出一啲普通相少見嘅美感，值得裝個 app去補充，花少少心機同時間影得晉階啲。筆者推介呢個 Slow Shutter Cam app，用佢就能自選快門開啟時間，由半秒至到手動關閉嘅 B快門都可以揀，最啱用嚟捕捉景物嘅活動形態，例如水嘅流動，影出嚟張相嘅意境都高啲！

Slow Shutter Cam$8

下載網址

噴水池試相
用 Slow Shutter Cam影噴水池，只需校到 15秒快門，再慢慢等佢自己曝光，就能凝結到水由池頂流落地嗰一剎那，水點變成水幕，畫面靚過肉眼睇！

正常拍攝
就咁用 iPhone影的話，只會見到水珠，頂多有少少鬼影，好普通！

拍攝 step by step

1.落腳架
用慢快門影相好易因手震搞到鬆郁朦，所以都要落腳架， Manfrotto個套裝又要出動！

2.校快門
篤芒對焦兼測光後，就可以校快門，由 0.5秒至 B快門，總共有 7級揀。

3.睇住曝
若開埋左上角嘅 LP（ live preview）功能，更可以睇住曝光過程，達到滿意程度就可以手動停止佢再曝光。

4.事後執
影相後佢會暫存唔同曝光程度嘅相，可以捽下方條 bar，選擇曝光最好（水簾最靚）嗰張相先至 save，保證滿意。

奴 COMMENT

細腳架方便帶
我都下載過 Time Lapse同慢快門影相 app嚟玩，但一直都發揮唔到，影出嚟一「劈」嘢咁，試兩吓就 delete咗個 app，原來係爭咁個腳架！ Manfrotto呢個唔錯喎，有 case套實，唔似得以前用夾夾實部機咁牙煙。而且我唔會帶大腳架出街，佢送嘅腳架咁細個，啱晒我，可以下載番啲影相 app嚟玩喇！

夜攝馬路現光軌

用 DC影相，捕捉光同水變化嘅技巧差唔多，套落 iPhone身上，用 Slow Shutter Cam呢個 app加腳架影光，梗係都有嘢玩！最大路玩法就係將馬路上行車嘅車頭燈影到變光軌，睇落一條條線沿住馬路去，夠晒迷幻。不過用慢快門影光比影水更難，好彩個 app仲有個 live preview（ LP）功能幫手，畀你即時睇到光軌變化，曝到爆光就手動即停，只要試多幾次，係人都影得到靚光軌。除此以外， light painting都可以用呢個 app影到，夠晒多嘢玩！

光軌試相
上大樓露台 set腳架用 iPhone高角度影落街最正，影到嘅馬路或天橋愈長，光軌就愈長，張相就愈有氣勢。呢張相只需選用 15秒快門，已經夠影到成條橋滿晒嘅光軌。

正常拍攝
iPhone如常咁影夜晚馬路，逐架車見到晒，只係近鏡頭幾架出現鬼影，冇特別！

慢快門影
同一個角度用慢快門 app影，啲車唔見晒，只剩低幾條白色燈光軌，特別好多！

轉模式
Set好腳架影之前唔只要揀快門速度，仲要轉埋 Capture mode去「 Light trail」，個 app先識調校啱影光軌嘅設定。

睇變化
跟住再篤左上角個 LP掣，開始影相後，光軌變化過程就會顯示晒畀你睇，若你覺得曝光程度已足夠，就可以㩒下面個正方掣停止，唔怕曝光曝到過晒龍！

快快門影高速影像

有慢快門 app，自然唔少得快快門 app。呢個 Fast Camera嘅玩法啱啱同 Slow Shutter Cam相反，一按影相掣，佢就會好似機關槍咁喪影相，最多 1分鐘影到 800張，直到成部機冇晒儲存空間為止，啱晒用嚟捕捉汽車、運動之類嘅高速影像。不過， iPhone鏡頭嘅快門速度始終有限，唔好旨意佢影到行車中嘅車轆，或者篤爆氣球嗰一刻嘅高難度畫面。

Fast Camera$8

下載網址

影相後，佢會彈出所有相嘅 preview畀你揀，然後問多一次要 save邊啲相，先會真正儲存入相簿，其他無謂相會立即 delete，騰出儲存空間畀你用。