福祿壽對上一次現身商場騷，已是上年 1月在銅鑼灣皇室堡的玩具商活動，同樣收 30萬影吓相講幾句，咁貴唔怪得成年冇再發市啦！《蘋果日報》圖片
真面目
有價冇市 商場騷鬥搶 嘉欣 Bosco 10萬任用 福祿壽大咬 30萬齋企
電視台人工奀，藝人搵真銀要靠登台出商場騷，如果一、二線哥仔姐仔，出吓騷一個鐘隨時有 10萬落袋。
但靠搞笑上位的福祿壽，據知最近接洽一個房委會旗下的商場騷時，除開大口叫價 30萬，更聲明只肯齋企乜都唔玩，如玩遊戲要加 10萬、唱歌又加 10萬，結果房協最後棄用福祿壽，改用只收 10萬同 11萬的一線鍾嘉欣及黃宗澤，仲要現場唱埋歌，夠晒抵玩！
由王祖藍、阮兆祥同李思捷組成的福祿壽扮鬼扮馬紅足 4年，出過唱片又開演唱會，最近更拍攝惠康賀年廣告，不過 3人除宣傳自家節目外，一直甚少以福祿壽身份出席商場活動，對上一次已是去年 1月，真相原來是佢哋叫價拍得住一線小生花旦，兼且要求多多，商戶自然要諗清楚。
鍾嘉欣形象清純又唱得，都只係收 10萬，搶贏福祿壽。《蘋果日報》圖片
Bosco要進軍樂壇，唱埋歌收 11萬，可謂大家有着數。《蘋果日報》圖片
唔唱歌唔玩 game
雖然甩商場騷，福祿壽仍然接到超市廣告，日日見觀眾。
據知下月某品牌將在房委會旗下商場辦宣傳活動，原先有意請福祿壽做嘉賓，吸引師奶客到商場，點知被對方開價 30萬之餘，更諸多限制，客戶惟有另搵嘉賓。
知情人士說：「個品牌搞過好多商場騷，習慣請 TVB啲藝員，通常一線級數都只係 10萬左右咋嘛，但福祿壽一開價就 30萬！仲講明只係齋企，連埋預備、化妝 4個鐘，係咁意講幾句嘢，玩遊戲要加 10萬，唱埋歌又加多 10萬，搵佢哋都係想搞吓笑啫，齋企不如搵其他姐仔好過。」
有請開藝人出席商場騷的公關公司透露，若拆散福祿壽來計，王祖藍騷價約 10萬、阮兆祥約 5萬、李思捷只不過 3萬，合計都只係大約 18萬，如今三人合體叫價幾乎貴一倍。
據知該品牌最終改用黃宗澤（ Bosco）及鍾嘉欣，兩人都答應唱一首歌，分別只收 11萬及 10萬，認真抵用。知情人士說：「 Bosco同 Linda靚仔靚女又夠紅，師奶一樣鍾意啫，加埋都只係 21萬，慳番唔少！」福祿壽都係面對現實啦！
解體得《老表》掂
王祖藍率先跑出
福祿壽自從做完上年個演唱會後，三子便各有發展，王祖藍套《老表，你好嘢！》報捷，又忙於拍新劇《食為奴》和演出內地綜藝節目《百變大咖秀》，在福祿壽三子中可謂最紅又最忙，所以單人匹馬出商場騷都要收 10萬，個期咁難度，貴少少算合理。
單拖 10萬
《老表》演員早前齊齊睇大結局兼慶功，祖藍被問到會否結婚慶祝，即拋個波畀郭晉安：「佢哋肯再生，我就結婚。」到時咪唔認數喎。
早前喺內地綜藝節目《百變大咖秀》中扮葫蘆娃（左）攻入內地，早前更益埋女友齊齊上節目，李亞男仲深情對話：「這世界上沒有第二個人像你那麼好。」
阮兆祥一劇拍完
已有一段時間沒有主持綜藝節目的阮兆祥，正放緊一個月長假，之前則只拍咗套《巨輪》，而祥仔亦稱希望今年底搞個人騷，想睇福祿壽要等吓喇。
單拖 5萬
上月由鍾嘉欣、陳展鵬、阮兆祥主演的《巨輪》煞科後，祥仔已去咗放大假。《蘋果日報》圖片
《福祿壽》後，祥仔已甚少主持節目，上次做主持是去年的《皆大歡喜之溏心風暴》。《忽然 1周》圖片
李思捷冇新工作
單拖 3萬
正拍攝《法網囂雄》的李思捷，經常將花絮及同陳敏之合照放上微博，保住人氣。
李思捷的工作量明顯比其餘兩個少，對上一套劇集已經是去年初播映的《換樂無窮》，拍攝中的《法網囂雄》又未知幾時播，人氣只係靠福祿壽個名頂住。
上位姐仔最抵用
一線藝人身價高，隨時 10萬接個騷，其實唔少新晉姐仔接商場騷幾萬蚊就有交易，加上樣靚又肯玩，吸客能力唔輸蝕。
陳茵媺 5萬
陳茵媺自從承認同陳豪拍拖，廣告商都爭住搵佢，騷價自然升呢，由以往 3萬跳升至 5至 7萬，唔怪得公開戀情都無所謂啦。
苟芸慧 4萬 5
苟姑娘係 09年華姐冠軍，加入 TVB後拍過《當旺爸爸》、《怒火街頭 2》等，樣靚身材好，商場騷叫價 4萬 5至 5萬。
岑麗香 3萬
香香公主去年憑《巴不得媽媽》跑出，在《老表，你好 嘢！》演後生版朱咪咪入晒屋，成為廣告客新寵，難得商場騷價只係收 3萬認真抵到爛！
採訪、撰文、攝影：娛樂組
留言列表
{{ article.title }}
