簽名會當日，不少忠實書迷都買齊了孤泣的作品拿簽名，令孤泣驚喜萬分。

青雲路

孤泣玩弄人性　用 App谷書上暢銷榜

2013年02月27日 ~~ 第1101期交易通．搵車快線

香港近年興起不少網絡作家，孤泣是其中一位，他擅寫愛情及懸疑故事，描述人性的《 APPER》系列十分受歡迎，他在網上及手機 app連載故事，成功推動電子書及實體書銷量，打入 app store及各大書店的銷量榜，由籍籍無名的小子成功開創一條作家路，這青雲路可謂一步一腳印。

孤泣首次在讀者面前現真身，分享如何創作故事，「本來都唔想影相，但𠵱家咁多人見過，今次豁出去喇！」

「點解我叫孤泣？ 14歲生日同朋友上天台吹水，講到我哋嘅夢想，我就話想寫本武俠小說，小說主角名都諗好，就係叫孤泣，當然最後本小說未寫到出嚟，而我用咗主角個名……唔知大家會有咩想問？」
採訪當日是 2月頭，誠品書店邀請作家孤泣舉辦分享會和簽名會，他首先與台下近 200名書迷分享他的寫作經歷，其後與書迷簽名和合照，持續個多小時人潮才散去。「第一次搞簽名會，之前估唔到有咁多人，而且唔少讀者帶晒我成套作品嚟簽名，好感激佢哋嘅支持。」
31歲的 Ray，筆名孤泣，是新晉的香港網絡作家，擅寫愛情與懸疑故事， 5年間出了 11本小說及散文，包括《愛情神秘調查組》、《 APPER人性遊戲》及《分手寄賣店》等，尤其《 APPER人性遊戲》加入不少人性刻畫，十分受讀者歡迎。「《 APPER》個主角唔完美，成日做錯事，為自己同鍾意嘅人去傷害其他人；《 APPER 2》個主角又會為錢做自己唔想做嘅事，好似殺人，其實人就係咁自私，我唔想啲主角係聖人，咁樣會更貼近真實，讀者先會 buy。」

真實經歷引起共鳴

支持孤泣的讀者眾多，隊伍一度排出書店門口，可算是近來少見的盛況。

Ray的作品能引起讀者共鳴，全因靈感來自他的真實經歷，「我之前做電訊業，所以《 APPER人性遊戲》嘅主角設定為電訊營業員；而我又喺旺角西洋菜街做過波鞋鋪 sales，曾經同對面化妝品店嘅女 sales拍拖，最後散咗，覺得呢段感情有遺憾，用咗嚟寫《西洋菜街的天空》。我亦有唔少故事改編自朋友嘅經歷，我好鍾意同人傾偈同周圍去，接觸多啲個世界先有靈感。」
此外，他的作品中有大量本土文化元素，「好似西洋菜街、時代廣場、茶餐廳，係大家都有共同回憶嘅地方；我又會喺文中描述銅鑼灣同港鐵返工放工嘅恐怖人潮，咁先畀到讀者共鳴，同時可以捍衞本土文化創作。」
Ray並不是大學畢業生，寫作是他一直以來的堅持，「中學開始寫日記，之後開始改編歌詞，讀完中五出嚟做 sales，但一直都冇停過寫作。」

不喜填詞欠自主性

在 07年， Ray填的詞奪得 CASH流行曲創作大賽的流行曲創作亞軍，及網上最受歡迎歌曲獎，以為可發揮所長，但前路並不是一片坦途，「嗰陣仲做緊電訊 sales，有唱片公司搵過我填詞，發覺幫人填詞好多限制，好似冇得自己定主題，監製、編曲等唔同單位又會要我修改好多次，同自己原意好唔同，覺得唔多啱我就冇做。」
填詞人路難走， Ray卻於 08年 12月，自資$15,000出版了第一本作品《孤泣情心》散文集，開始踏出作家的第一步，「既然自己鍾意寫嘢，就試吓搵出版社自資出書，自己鍾意寫咩都得，估唔到銷量唔錯，出咗 1,500本都賣晒，雖然冇乜錢賺，但 09年呢間出版社見反應好，就搵我合作出書，出咗我第一本小說《預言故事》。」
《孤泣情心》出版後， Ray興起網上寫作的念頭，「嗰陣同兩個朋友一齊喺 Xanga分享自己嘅作品，開頭得幾十個人睇，朋友都放棄咗，但我堅持寫落去，人數開始慢慢上升，見反應好，之後整咗個人網站出嚟連載故事，到𠵱家每個月點擊率有 450萬，如果冇堅持我諗冇今日嘅成果。」

孤泣擅寫愛情懸疑故事，著作包括《 APPER人性遊戲》、《預言故事》及《分手寄賣店》等，而《 APPER人性遊戲 2》推出 10日已經要再版，現已加印第三版，估計銷量超過 3千本。

阿 Ray媽媽　粱太

我哋喺阿 Ray出咗書先知佢做緊作家，不過見到佢咁叻仔好開心，佢𠵱家可以達到自己嘅理想，我哋都好支持佢，最大嘅支持就係唔干預佢，畀佢自己自由發展。

讀者阿珊

喺手機 apps度見到《 APPER人性遊戲》，覺得個書名幾得意，一睇發覺佢描寫人性好深刻，不知不覺就追落去，喺網上睇到今日孤泣有簽名會，特登由澳門過嚟支持佢。

點入行？

現時新人出書，一般只可獲 6%至 8%版稅，即一本書賣$50，作者只可分到$3至$4，而第一版通常會印 1至 2千，反應好會再加印。部分出版社會逐本和你簽約，有的會簽你幾年。所以出書的只為興趣，否則當正職收入好冇保障。
想成為作家，除了投稿外，真源出版社出版人黃先生有些建議：「除咗愛情呢類永恆主題外，近年烹飪、旅遊、醫療偏方等都比較受讀者歡迎，如果想出書可以考慮呢方面嘅主題；而想同出版社合作，可以學孤泣嘅做法，喺網上連載小說累積一班讀者，如果反應不俗，會增加同出版社合作出書嘅機會。」
投稿者可電郵到真源出版社郵箱 mailto:enquire@382now.com

電子書推動實體書

Ray平時會周圍走去攞靈感，他說一定會寫武俠小說兌現承諾，「同我上天台談夢想嘅朋友喺加拿大遇到車禍過咗身，佢嘅夢想已經實現唔到，所以我會實現自己少時夢想，獻給呢位朋友。」

繼網上連載， Ray推出電子書，希望吸引更多人閱讀他的作品，「 10年喺 Uwants識到寫手機 apps嘅 Jason，見傾得幾投契，於是提議合作，用《預言故事》出電子書 app，但銷量唔係太好，我就諗到不如先畀人預覽 70%，如果想睇埋落去就要買，試咗發覺真係有成效，《預》喺 app store賣到 1千本，比之前賣多咗 500本。」
《預言故事》電子書反應不俗，卻因此與出版社出現了分歧，「我哋覺得出電子書會幫助到實體書，讀者如果覺得好睇就會去買，但出版社唔係咁諗，好在我同佢只簽咗 1年約，出咗《 APPER人性遊戲》後，喺上年年尾改為同真源出版社合作出版《 APPER 2人性遊戲》，佢哋好支持我嘅做法，我喺網上連載到 70%時，會預告 3日後出實體書，唔使慢慢等網上追看。」

總銷售量十分驚人

孤泣平時在自己的手機殼店時，都是對着電腦寫作，「間鋪唔太忙，大部分時間都可以用嚟創作，暫時算取得個平衡。」

事實上，《 APPER 2》的銷量估計比《 APPER》高 1倍，打入各大書店暢銷書 10大位置。專做電子書及 App的「飛勢力」老闆 Eric表示，根據上年的數據，一本電子書在 2個月內賣出 400本，已可上暢銷榜。 Ray的電子書在 12年於 app store的總銷售量是 1萬 1千本，以香港本土作家而言，十分驚人。
Ray覺得網上連載還可以拉近與讀者間的距離，發揮更多創意，「喺網上發布會同讀者多咗互動，好似連載緊《 APPER 2》時，去到一個故事場景，有幅畫、蘋果、刀、老鼠同老鼠洞、最初嘅諗法係將樣關鍵物品收喺老鼠洞度，有讀者預先估到，我就改收喺老鼠體內，點知又俾人估到，前後改咗 3次，最後我改收喺把刀度，完全係同讀者一齊鬥智，過程要不斷扭橋都幾辛苦，但咁樣先可以寫好個故仔。」
Ray自全職寫作後，便辭去原本工作，只靠出書收入大不如前， app store賣電子書加實體書的版稅，平均每月約有$15,000的收入，「喺香港出書唔可以賺到大錢，但我真係好鍾意寫作，𠵱家開咗間賣手機殼嘅鋪頭，每月可以幫補到 4、 5千，起碼維持到生活同自己嘅作家夢。」
寫作是 Ray的興趣，對未來已有了安排，「我會用系列嘅形式出書，好似《 APPER》會一直寫落去。我希望可以將小說搬上銀幕，打算改編《分手寄賣店》，不過𠵱家都係籌組當中，而今年將會好忙，嚟緊半年會出至少 5本書，真係每日都唔可以停，不過可以一直寫作真係好開心。」

網上連載好緊要！

同屬網絡小說的《那夜凌晨，我坐上了旺角開往大埔的紅 van》同樣大受歡迎，作者 Mr.Pizza與孤泣推廣小說方法差不多，在網上連載小說從而引起話題和更多關注，「我諗寫網絡連載同傳統紙版連載，兩者最大分別係網絡平台嘅即時性。讀者可以喺 internet同作者作出最即時嘅互動，咁會增加讀者嘅參與感。箇中有好有壞，好嘅係會明白某部分讀者嘅反應，即時完善自己作品，咁當中會有推動力令自己寫得快啲。壞處係壓力加大，作者有機會太著重讀者而迷失自己嘅本意，未必可以靜落嚟沉澱作品。呢啲就係網路連載嘅特性。」

後記：擺位看地位

現時孤泣的作品都會擺放在書店當眼處，真可謂此一時彼一時。

看着簽名會的成功， Ray不免慨嘆這得來不易，「仲記得出第一本《孤泣情心》，行勻屋企附近嘅書店都見唔到本書，最後問店員先見佢喺櫃桶度拎出嚟，嗰刻真係幾失落。去到出《戀愛崩潰症》，本書終於可以喺書架角落頭位搵到。《 APPER人性遊戲》係轉捩點，見到擺出櫥窗，嗰一刻真係好興奮！𠵱家《 APPER 2人性遊戲》上埋各書店嘅暢銷榜，好慶幸一開始冇放棄，同開心自己嘅作品有人認同。」
只要你有銷量，擺位自然會好，人性就是這樣現實。