採訪當日，咪咪怕見陌生人，即刻匿入房內，要鄺俊宇同場才可和牠拍照。

Petbook

貓議員為愛貓爭權益

2012年12月19日 ~~ 第1091期交易通．搵車快線

順天邨的流浪貓阿 Miu被虐殺事件，再次引起了市民對動物權益的關注，議員鄺俊宇在活動中十分活躍，極力爭取動物警察的成立，他這麼上心，只因他也是寵物咪咪的主人，雖然他被警方戲稱為貓議員，但他不以此為恥，還更加積極為動物爭取權益。

採訪當日，記者去到鄺俊宇的家，準備訪問他的愛寵咪咪，但入到屋內四周都不見咪咪的蹤影，鄺笑說：「佢好細膽，一見陌生人就會匿埋，成 9歲仔都只係出過兩次街，一次係杜蚤、另一次係絕育，可能對兩次出街嘅印象麻麻，𠵱家對出街都好抗拒。」
咪咪是鄺俊宇機緣巧合下收養的一隻貓，「我幫襯開一間麵店，嗰度有隻貓叫咪咪，去親食嘢都會同佢玩，有日老細話佢唔見咗，我就幫手去搵，喺附近搵咗成個星期都冇發現，咁啱有次經過一間書店聽到貓叫聲，原來有隻貓生咗幾隻貓仔，書店老闆仲煩緊點處置好，我覺得係一種緣分，見其中一隻個樣蠢蠢哋，於是收養佢，幫佢改名叫咪咪當係記念。」
後來鄺得知書店老闆將其他貓仔送到了附近小學，慢慢走失了，「貓媽媽更俾人投訴，俾漁護署帶走而冇發還。」採訪途中，咪咪聽到鄺這番話，竟流下眼淚，十分有靈性。

咪咪　家貓　男　 9歲

咪咪常常霸佔鄺俊宇的睡床，當正自己是床的主人。

照料咪咪病埋一份

鄺從未養過小動物，咪咪對他是一大挑戰，「一拎返嚟咪咪嘅身體好差，唔肯食固體貓糧，嗰陣唔知點算好，成家人又未養過，於是我周圍去問朋友，又走去寵物店度問，終於買咗寵物奶樽同奶粉返嚟，佢夜晚肚餓一叫，我就要起身餵佢，一晚至少起兩次，第二日我又要返工，唔夠瞓搞到自己病埋，養寵物真係唔容易。」
在鄺俊宇悉心照料下，咪咪的身子逐漸好轉，「幾個星期後，咪咪身體好番好多，成日跳嚟跳去，仲跳上我張床，之後開始喺我張床度瞓，完全唔理我哋整畀佢嘅床仔，當正佢係張床嘅主人，成日大字形咁瞓喺床中間，到我想瞓推開佢時，佢就會咬我，每次瞓覺都要經一輪搏鬥，到我瞓低佢又會安靜咁瞓喺我隔籬，試過幾次捉佢返落去佢都照跳上嚟，𠵱家冇佢瞓喺身邊可能仲唔慣。」
鄺已經視咪咪為家庭的一員，「成家人食飯、睇電視，佢一定會出現，靜靜咁坐喺度，好似出席家庭活動咁，平時雖然怕陌生人，但對住我哋會玩得好放，尤其佢鍾意手腳並用咁捉住我隻手指嚟咬，我覺得佢都當咗我哋係佢家人。」

採訪進行中，咪咪聽到自己媽媽被漁農署帶走時，即流出眼淚，十分有性。

鄺俊宇把咪咪從房捉出來，並安撫牠的情緒，才可順利拍照。

關注虐貓案而成名

鄺媽媽也十分愛錫咪咪，視牠為家中一分子。

鄺俊宇曾在區議會上提交關注虐貓案議程，他以一句「貓狗冇選票，但我有責任」作口號，卻被警方代表戲稱為「貓議員」，「 07、 08年發生咗好幾宗虐貓事件，我覺得政府對動物權益方面做得唔夠，我身為寵物嘅主人，覺得應該做番啲事，於是想警方關注番虐貓案成立動物警察，但警方冇理會我，仲叫我做貓議員。」
雖然得不到實質進展，但多個動物團體都留意到「貓議員」，近來鄺為阿 Miu被虐殺事件發起了聯署，努力爭取成立動物警察，「我覺得俾人叫貓議員唔係咩恥辱，反而令我明白政府嘅態度，激起我要為動物爭取合理嘅權益，𠵱家仲多咗動物團體叫埋我一齊去為動物發聲，好似近排嘅虐貓事件，我哋短短 5日就收集到 3萬幾個簽名支持，仲一齊去到警察總部遞交請願信，貓狗唔知點去幫自己，但我哋身為主人有責任去保護佢哋。」

爭取成立動物警察

鄺俊宇早前將收集到 3萬多名市民簽名的「萬人信」遞交至警察總部，爭取政府盡快成立動物警察。

鄺俊宇早前在 11月 25日將收集到 3萬多名市民簽名的「萬人信」遞交至警察總部，雖然籌辦時間不多，現場都有數百名愛護動物的人士支持，爭取政府盡快成立動物警察。如果錯過了機會又想為動物爭取權益的市民，可以參加現在舉行的「致特首梁振英萬人萬電郵行動」，以一人一電郵至香港特首梁振英先生的方式表達對爭取動物警察。
facebook：凝聚萬人，誓爭「動物警察」！我們，願為無聲的貓狗吶喊！