一直恨追女的樂壇天后陳慧琳（Kelly），今年初曾試過人工受孕懷孖女，可惜最終不幸流產。揚言40歲前想生多個的她，再接再厲，早前宣布再度人工受孕成功懷有龍仔， 預計明年中誕「小龍包」。
不過百無禁忌噏得就噏的Kelly，今次再度佗B，卻犯下大肚婆四大戒條，她除了舟車勞頓坐三粒鐘長途車、狂啃煎炸立雜嘢食、着高踭鞋短褲外，更亂噏話自己「佗住啲咁嘅嘢！」
寧可信其有，Kelly要顧身子之餘，仲要慎言至得呀！


今年三月，Kelly不幸痛失所懷的五個月孖女，她自言今胎會加倍小心，生B前絕不會離開香港。不過話口未完，上周四（8日）她為賺一百萬酬勞，山長水遠乘三個鐘長途車，到廣州出席商場騷。

車上啃炸兩
一向廿四孝媽咪的Kelly，每朝風雨不改接「蝦餃仔」劉昇放學，但上周四（8日）早上，她卻乘坐有中港車牌的七人車從加多利山寓所出發，往廣州出席商場騷。記者發現「唔餓得」的Kelly竟在車廂上狂啃炸兩，乾爭爭又沒有營養。Kelly曾自言：「醫生話要注意飲食， 唔可以立亂進補，亦都唔可以立亂食嘢。」炸兩的油分十分高，而且炸製過程所用的「千年油」不單冇營養，平常人不能攝取過量， 更何況是孕婦。吃完一整盒炸兩的Kelly，便開始在車上煲電話粥， 記者發現她愈講愈勞氣，更講到皺眉兼手握拳頭，足足半個鐘都唔肯收線。

寒風騷大髀
當日現場所見，即使氣溫忽然驟降至14度，向來型慣的Kelly依然懶理低溫，到達會場後即換上超短熱褲騷大髀，又着上兩吋高踭鞋，在台上四圍走，見到都牙煙。知情者透露：「其實Kelly今次去廣州都係局去，因為呢個活動係佢有喜之前接落嘅，仲簽咗合同。如果突然話唔出席，要賠償一倍酬勞，即二百萬人仔。所以Kelly先頂硬上，你估佢好想坐三個鐘頭車上上落落咩！」

亂噏廿四
現時佗B接近五個月的Kelly，除了繼續接有錢騷外，周日（11日）晚，她更出席黎明演唱會任表演嘉賓。當晚她同樣穿上兩吋高踭鞋， 不單手舞足蹈扭腰扭pat跳舞，當記者追問她當年拍電影《江山美人》，黎明是否好咀時，她竟然說：「唔敢講，佗住啲咁嘅嘢，唔敢講囉！」認真百無禁忌。

Kelly：會避忌啦！
周二（13日），Kelly如常湊蝦餃仔放學，當記者趨前問她知否自己犯下大肚婆禁忌時，她即頭嘟嘴表示：「吓！乜有咩？（你着高踭鞋又坐長途車喎？）唔敢再着啦，你睇我今日換咗對平底鞋，好舒服呀！係咪好靚呀？（你狂食熱氣嘢喎？）哦……你話炸兩呀，貪口痕啫，助手買俾我嘅。不過我唔係淨係食呢樣嘢，喺屋企出嚟前都食咗飯㗎！（覺唔覺自己喺黎明演唱會亂噏嘢，擔唔擔心BB會小器？）哎吔，冇啦，自己會避忌吓啦！」隨即匆匆拖蝦餃仔上車離開。

玄學家：坐長途車影響胎神
據堪輿學家區仲德師傅表示，孕婦絕不宜坐長途車東奔西走，會影響胎神保護個胎兒，就算小朋友於出生後，亦有機會過於活躍，難以管教。另外，胎教亦十分重要，亂說話、怨言會影響出世後的小朋友容易抑鬱，甚至有情緒病。至於西醫關嘉美則表示：「長途車冇得舒展雙腿，最好盡量避免啦。雖然未有實質數據證明煲電話粥會影響健康，不過普通人都唔應該講咁耐，有輻射嘛，何況係孕婦？煎炸嘢嘅千年油更甚，食得多冇益，孕婦唔戒口最弊，應該食番啲蔬菜、生果平衡番。」 ####


第2戒　狂啃千年油炸兩
Kelly為賺一百萬酬勞，上周四（8日）長途跋涉搭三個鐘頭長途車到廣州出席活動。大肚婆唔戒口，在車上狂啃成盒炸兩，炸兩用千年油炸成，油分高而營養低，Kelly食咁多認真冇益。


第1戒　台上亂咁
周日（11日），Kelly應邀擔任黎明演唱會嘉賓，竟然亂廿四話自己個胎係「咁嘅嘢」，Kelly，你估係山草藥咩！


第3戒　煲電話粥
在車上講足半個鐘頭電話粥的Kelly，邊傾電話邊皺眉和fing手，未知是否因佗仔導致心情容易煩躁，小心輻射呀！


第4戒　冒風騷大髀


上周四（8日），Kelly到廣州出席活動時，冒着低溫着熱褲騷大髀，又唔怕危險着兩吋高踭鞋，認真愛靚唔愛命。


老公朝朝湊仔孕婦最緊要多休息，錫老婆的Alex近日肩負送囝囝返學重任，跪在地上為囝囝整理校服、書包，十足廿四孝爸爸。


唔敢抱蝦餃仔雖然粗身大細，不過Kelly仍堅持每日接囝囝放學，拎書包輕鬆動作當然親身上陣，不過抱囝囝重任則落在菲傭身上。


唔知犯戒條犯了多次孕婦禁忌的Kelly，周二（13日）面對記者時表示：「吓，我唔知唔做得喎！」一向大癲大肺的她，今胎真係要小心啲嘞。


Kelly更自稱已購多款平底靚鞋作準備，更向本刊記者笑問：「我對鞋係咪好靚呢？」


上一胎佗住孖女時，Kelly曾百無禁忌表示：「生得出先算。」亂噏早有前科，嚇得在場傳媒目瞪口呆。


區仲德


關嘉美

arrow
arrow
    全站熱搜

    stacylife 發表在 痞客邦 留言(0) 人氣()

    E-mail轉寄