最新 update 4.4
《 P＆D》更新頻密， fans打唔厭，上星期五公布 嘅 4.4版加入最新埃及神同新進化，有型仔有索女。

漫遊毒物

手機神作《 P&D》　轉珠勁破 500萬次

2012年12月19日 ~~ 第291期 Face

又到年尾，係時候來個 game壇結算，如果要數日本今年最強人氣遊戲，仲講孖寶、 FF、芒亨呢 啲大路 嘢就 out喇！講人氣、講爆紅梗係要數風靡中、港、台、日，攻陷各個手機平台 嘅轉珠方塊 RPG《 Puzzle& Dragon》（《 P&D》）。
最近佢又推出 4.4 Version更新，並加 500萬次下載特備節目，將呢款遊戲 嘅人氣推上最高峰。再睇攻略情報高登、巴哈日日開 thread講唔停，全城熱話，點到你唔玩！

互動片段

Kabby Puzzle& Dragon 轉珠教學

Android版人氣爆發《 FF》都要黐

由名不經傳遊戲廠商 Gungho於今年 2月 喺 iOS推出嘅《 P&D》，融合方塊遊戲同 RPG回合制戰鬥，玩法新穎，一推出已長據日本 App Store排行榜前列位置。到今年 9月推出 Android版更人氣爆發， 11月頭先話下載達 300萬次，到 12月竟已準備下載 500萬次特備活動。𠵱家《 P&D》可謂日本手機遊戲龍頭， game網日日 update，兼搵製作人分享成功經驗。傳統名 game《太鼓之達人》同《 FF》都要黐佢玩 crossover，為積弱 嘅日本遊戲界帶 嚟生氣。
對應系統： iOS、 Android
售價：免費 

山寨三國

玩法照抄《 P&D》 嘅山寨版《逆轉三國》香港幾多人玩，但打唔出勁怪焗人畀錢，反而吸 咗一班玩家轉玩《 P&D》。 

討論唔完

隻 game耐玩食腦，高登已經開 咗超過 300期討論， 1,001個回覆爆 post，吹水量突破 30萬個回覆。 

日文版至 update

遊戲出 咗英文版，但始終日版最 update，雖然隻 game免費，但香港 iOS同 Android用戶要用 啲計仔先玩到。

iOS用家

先用電腦 喺 iTunes揀日本區，之後求其買一隻 free app，就可以跳過入日本信用咭資料。

要申請日本 iTunes帳戶先可下載。方法一定要經電腦，用電腦版 iTunes選擇日本地區，再隨便購買一隻 free app（例如《 P&D》），咁樣申請日本帳戶先可跳過輸入日本信用咭資料 嘅步驟。 

Android用家

最直接方法係去 Google搜尋「 Puzzle＆ Dragon apk」，下載完再過落 SD咭。

Android嘅 Play Store商店要轉地區更難，要 root機呃 GPS先得。簡單方法係上網搵已經改成冇區碼 嘅遊戲檔下載，但就唔能夠用官方更新，只可上討論區再搵新檔案喇！要留意唔係部部 Android機都玩到，例如 Samsung Note2官網未寫對應，就有人試過玩唔到。網址： http://mobile.gungho.jp/news/pad/and_taiou.html 

Game書、玩具力捧

喺網上撰寫《 P&D》專頁「 Puzzle and Dragon應援團」 嘅 C君 啱 啱去完日本搵《 P&D》新 product，收穫豐富。「呢隻 game真係 game of the year，去到日本搭車一定見到有人玩。 Game書送虛寵更必定炒同缺貨，實體精品都出埋，有排 hit！相信 嚟緊會同更多遊戲合作 crossover，出《芒亨》 event都唔奇。」


專頁網主 C君
打 咗 230日，消費達$10,000以上，《 P＆D》重度中毒者。


新買返 嚟 嘅《 P＆D》鎖匙扣，日本方面仲有 iPhone case等精品，人氣爆燈。

「 Puzzle and Dragon應援團」

網址： http://www.puzzledragons.com
facebook： http://www.facebook.com/PuzzleDragonsclub

同 枱食飯　各自轉珠

論下載次數，《 P&D》同數十億 嘅《 Angry Birds》比仲差好達，但講中毒性之高，卻係近年遊戲界少見。班轉珠友達，隔幾個鐘就要拎部手機出 嚟轉轉轉，甚至連夜鬼都要特登早起打 event，今次就搵 嚟 3位唔同中毒程度 嘅《 P&D》戰友講吓隻 game點樣改變佢 哋生活習慣。 

打機擇友

修羅場戰士　小蔡
Rank： 136
遊玩日數： 192日
小蔡用 iPad、 iPhone玩兩個 account，新 account試吓唔畀錢打到幾叻，仲會上日本 twitter徵友。「朋友好重要，因為要有自己 Leader怪同朋友怪先會出到 Leader技能，平時 WhatsApp叫朋友換怪幫手打好正常，上網見到日本 twitter啲人留言，真係好似徵友廣告咁，講明自己有咩條件，要 add啲咩怪。講真，朋友位得 100個，去到後期真係要小心擇友，有時見到自己 啲 friend唔生性 keep住用渣怪又唔升 LV，真係想 del佢！」


打到後期唔少人都會 del啲唔係成日玩 嘅人，所以有時見到 啲人去遠行會改名叫人 哋唔好 del佢，圖中就有位仁兄話 24號至返 嚟。


無論日本定香港都有唔少網上求戰友區，但日本玩家比較仔細，有晒自己條件同對方要求，感覺好比富豪徵婚。

課金無悔

重課金戰士　 C君
Rank： 249
遊玩日數： 230日
《 P&D》係免費 app，但可以花錢買魔法石抽勁怪同回體力， in game收費日本人稱為課金， C君總計課 咗高達$10,000！佢無怨無悔咁話：「佢耐玩性比其他手機遊戲高，儲怪升 LV到打完最勁 嘅宙斯，唔用錢打可能要花半年，用錢可以買到時間。同埋佢最勁 啲怪係打大佬打出 嚟，唔似其他手機 game鬥排名，到後期勁 咗課金需求愈低，唔係無底深潭。我仲專登買 咗 iPad Mini打《 P&D》，用手機打成日畀隻手遮到唔知轉 咗去邊， Mini細得 嚟又唔會遮到。」


C君強烈推介用 iPad Mini打，夠大之餘，唔似打 iPhone版一有來電即刻轉停，名副其實死亡來電。


幹掉最強怪物宙斯一刻，唔花錢打 嘅話，真係要籌備經年先打到。

上堂偷打

悠閒女戰士　阿倩
Rank： 39
遊玩日數： 93日
比起兩位男戰士，女戰士阿倩自言冇咁勤力練功，不過佢都會校鬧鐘打 event，仲會偷偷 哋上堂用 notes遮住部機打，似足夜神月寫死亡筆記。「隻 game最毒係定時定候有限時 event打，有 啲兩個星期，有 啲得一個鐘，最早試過朝早 7:00要打，真係會校鬧鐘起身，上堂見到有體力都會偷打，唔係爆 咗頂好蝕。鍾意佢係玩方塊遊戲，同埋 啲女性角色好靚，砌隊我都係睇靚唔靚，打唔打得過關係其次。」


阿倩最爆趣經歷係唔小心 del咗隻 game，專登搵日文老師寫 email求助官方，可惜官方都幫唔到手，隻 game backup好麻煩，大家要小心！


阿倩同男朋友拍住打，互相提示大家朝早起身打機，最 sweet係男朋友為 咗贈送 嘅虛寵買 咗日文攻略本，最後被女友搶 咗 嚟用。

6步學懂怎玩《 P&D》

組隊
先由自己擁有 嘅怪物挑選 1位隊長（ 黄圈）同 4位隊員（綠圈），怪物有 HP、攻擊力同回復力，最重要係睇佢 嘅屬性，分火、水、木、光、暗 5種。 




戰鬥
揀好隊員就揀打邊關，唔同 嘅關會消費玩家體力，用晒要等時間回復，同 facebook遊戲差唔多。 




轉珠例子
正式開戰，玩法係篤住一粒珠任轉 4秒，移動後 3粒以上同色寶珠， 3個或以上珠子連接時即可消除，簡單 啲睇下一步示範。 




寶珠 喺移動過程中會移動經過 嘅珠子，消去某顏色珠子，我方隊伍對應屬性 嘅寵物就會作出攻擊，因為我方為暗屬怪物，消除紫色寶珠就可以攻擊。 




轉珠例子
郁一步似《寶石方塊》，但係篤住任轉令玩法變化大好多，好似如圖中所示移動．．． 




跟住就可消去 2× 3粒心形寶珠回復體力，轉完一次就叫完成一回合，敵人經過一定回數會固定攻擊扣你 HP，似打 RPG。 

買石有辦法　新手唔使怕

我部 iPhone用日本 gift card最穩陣！

睇完身邊 啲 friend打得咁開心， model Kabby都話趁近期有 event想玩埋一份，不過新手上路有好多難題要解答，好似想打快 啲畀錢買石抽怪，但又唔知開頭升咩怪好。 喺呢度就幫一次過幫新手解決 3大疑難，等大家快 啲轉珠屠龍。 

1.日本 iTunes咭最穩陣

隻 game唯一收錢地方就係魔法石，有石就可以抽珍貴怪物同回體力，上癮者往往忍唔住想畀錢玩，但因為遊戲係日本版，有錢都未必買到石。 Android版較方便，直接用香港信用咭買就得。不過， iOS版就難搞，香港信用咭同 gift card時得時唔得， C君話純屬系統漏洞， Apple未必認可，有損失難追討。比較穩陣係買日本 gift card， 1,000日圓點數咭 喺香港約售$150，貴就貴 啲，勝在安全。


Android版可以直接用信用咭購買魔法石，但冇信用咭 嘅小朋友就冇辦法買到。


直接用日圓表示，最抵買係 5,200日圓買 85粒石，平均每粒 61.2日圓，每次扭蛋用 5粒，抽一次花 305.9日圓就得，約$30.5港元。

2.重要第一抽

原來遊戲完成教學關後，免費畀你 嘅第一抽好重要，唔對路 嘅洗 咗個 app再裝番就可以由頭再抽，務求抽到一隻好怪喺手，條路就易行得多。網民比較推崇新手抽實用「魔劍士」開始，記得做功課認清邊 啲怪好用先開始，可參考「 Puzzle and Dragon應援團」攻略介紹。
「神」類怪物最難抽最多人講，但對新手 嚟講未必隻隻好，最實際都係睇住攻略玩。
《 Puzzle and Dragon應援團》網址： http://www.puzzledragons.com/ 

3.用盡你朋友

揀完戰友打 咗場，再開新一場， friend list就會唔見 咗佢。之不過，只要對方關 咗個 app重開就會出返 嚟，所以一 啲十年唔見佢 online嘅朋友可以 delete。急需朋友 嘅時候打電話、 WhatsApp叫佢重開都好重要，有個好戰友帶住開頭好快上軌。
要對方完全關掉 app再開先可以見番佢，緊急時可以 WhatsApp急 call真實朋友助戰。 

手機遊戲、即時通訊 Mix& Match

《 P&D》有朋友易打 啲又好玩 啲，撞正成班人一齊轉珠抽蛋睇見都開心。除 咗《 P&D》，其他手機遊戲都開始由自閉式憤怒鳥時代進化，日韓兩大即時通訊應用 Line同 Kakao Talk都積極推出遊戲，可以同真實認識 嘅朋友鬥高分，玩落肉緊 啲。 

Line連動名作

近日 App Store免費遊戲排行榜都見到幾款 Line字頭作品，佢 哋其實係獨立遊戲，不是 Line用戶都玩得。當中最火熱係《 Line POP》，玩法同《寶石方塊》一樣，但用 咗 Line嘅賤熊做主角，可愛度爆分。其他仲有《 Cartoon Wars》同《 Bizzle》呢 啲早已出名 嘅人氣遊戲，用 Line登入易搵 friend又跨平台。

《 Line POP》

YouTube好多人拍片打《 Line POP》鬥高分，呢位神人就示範 3隻手指玩寶石方塊，快過打字。
系統： iOS、 Android
售價：免費 

《 Bizzle》

《 Bizzle》掉雞仔方塊曾經紅極一時， Line版只係多 咗用 Line帳戶登入，玩法一樣，雞仔可以亂掉， 3隻以上黐埋一齊就會爆炸消失。
系統： iOS、 Android
售價：免費 

《 Cartoon Wars》

《 Cartoon Wars》玩起兵塔防，算係耐玩性比較高 嘅 Line遊戲，但其實冇乜同朋友互動 嘅元素。
系統： iOS、 Android
售價：免費 

Kakao Talk韓國先鋒

Kakao Talk同 Line有好多類似之處，大家都有可愛表情符號。論玩遊戲的話， Kakao Talk比較早一步，最火 嘅《 AniPang》今年中已經熱爆韓國，佢同《 Line POP》玩法一樣，一樣係寶石方塊鬥高分，連互動元素，靠朋友幫你回心心都一模一樣。不過《 AniPang》只得韓文顯示，《 Line POP》在港較多人玩。

《 AniPang》

可謂手機社交平台玩遊戲 嘅先行者， 喺韓國下載次數達 1,200萬。韓國以外， K-Pop迷通常都會玩。
系統： iOS、 Android
售價：免費 

總結： facebook遊戲借 app還魂

其實上述遊戲同 fb版寶石方塊玩法冇分別，呢幾年手機 app打殘 facebook遊戲，主要贏在流動性，但其實手機遊戲 嘅社交元素仲好簡陋，《 P&D》咁靠朋友，卻只能用 add ID呢個原始方法。用即時通訊 app打通 iOS同 Android兩大平台，搜尋手機內朋友資料必成手機遊戲大趨勢。好玩係好玩，但就怕 facebook式洗板宣傳，𠵱家 Line同 Kakao Talk都有 game通知，再多幾隻 game怕俾佢震到冇電。 

撰文：司徒港燊
攝影：傅新發
場地提供： My Home Cafe（ 2838 5656）
模特兒： Kabby@GME