真面目
冰鎮玉女 11℃海水冰鎮 失憶詩雅死 3次
冬天凍冰冰，平時早起返工返學已經惡頂，要浸住冰水拍戲更加難捱。
早前詩雅為 Goyeah.com的微電影《兜售回憶》拍落水戲，劇情講意外失憶的詩雅，分別在沙灘、泳池及浴室連環自殺。
當日早上只有 11、 12度，要濕身拍足 3個鐘的詩雅，有替身唔用，薄衣露腿親身上陣凍到面青口唇白騰騰震，要不停飲薑茶保暖。
拍微電影都搵命搏，唔怪得又有機會同謝霆鋒任達華開新戲啦！
戲中飾演失憶少女的詩雅，晨早 6點已到西貢相思灣化妝，與助手坐在海邊吹冷風培養感情，等到 8點先正式埋位拍攝。當日氣溫只得 11度，而且落住微雨寒到震，詩雅着住黑色薄紗裙同牛仔恤衫，拍完幾個坐沙灘講電話鏡頭後，即要抵冷拍落水戲。
浸足 3粒鐘
沒頂
浸到上心口，跟住直頭成個頭沉埋落水，夠專業，反而攝影師哥哥着晒潛水衣保暖，孱咗啲喎！
替身他條
替身坐足一朝勁他條，反而詩雅要狂飲熱水保暖。
凍到震
拒用替身
最初詩雅行到水深及膝的水位已打咗幾個冷震，後來應導演要求愈行愈出，直到完全浸過頭，更要來回行幾次試位及拍攝不同角度。每次上水，助手即衝上前為詩雅披上毛氈，又遞上熱辣辣薑茶，但濕到上頸的詩雅依然凍到面無血色。
原本導演只要求詩雅浸到腰已收貨，其餘由替身負責，但做過救生員的詩雅決定攬晒上身自己搞掂，所以連沒頂鏡頭都親身上陣，一停機即獲得全場工作人員拍手鼓勵，連女替身都戥佢凍，細細聲話：「嘩，佢凍到面都青埋呀！」
HKTV劇集《還來得及再愛你》中，詩雅同唐禹哲吸血殭屍玩人鬼戀，咦，咁似《吸血新世紀》？
詩雅着晒低胸裙出席 HKTV記招，比起平時密實 look索得多。
唞唔到氣
3女神鬥演技
《兜售回憶》改篇自深雪的同名小說，由 3個故事組成，分別由詩雅、陳嘉桓及周秀娜做女主角。電影講詩雅開了一間寄賣二手物件的小店，但該物件一定要有一個關於回憶的故事。詩雅因意外失憶，要不斷接觸水去找回記憶；陳嘉桓糾纏在兩個有錢男友中間，最後決定寄賣男友送的手表（咁似某廣告？）；而娜姐的男友因病突然離開，死前將心臟移植畀另一個男仔，男子決定搵娜姐重新開始可惜被拒，後來拎 咗娜姐一隻耳環去寄賣，希望有朝一日娜姐自己買番。
有 Chrissie（左二）、詩雅（右二）同陳嘉桓（右一）做主角，齊賣長腿都夠殺！
轉發天下
電影票房唔保證大收，反而微電影成本低市場大，放上微博一傳十十傳百，瞬間轉發天下，分分鐘有過百萬點擊率，好過 揼錢齋賣廣告。
林峯
為 咗宣傳演唱會，林峯專程搵女神岑麗香拍了一段微電影玩人鬼戀，其實成個故事同演唱會毫無關係，純粹幫 chok王谷人氣宣傳。
周柏豪
周柏豪與連詩雅、張致恆拍微電影《最佳響友》，兩師兄妹做情侶，雖然有少少談情戲，但劇本以友情做賣點，有 啲勵志 feel！
陳喬恩
葉念琛鍾意拍微電影，早前搵到台灣女神陳喬恩幫手，拍了一套《末日來電》。講被好友硬撬男友的陳喬恩，在末日前遇到另一個真心愛佢的神秘男子。
留言列表
{{ article.title }}
