漫遊毒物

《人中之龍 5》江湖再見

2012年12月19日 ~~ 第291期 Face

我都幾敢肯定，江湖中人都愛看港產片經典《英雄本色》，如果唔係， SEGA黑道大佬 game《人中之龍 5》主角「龍哥」桐生一馬，退隱江湖後就唔會模仿「豪哥」狄龍，遠走日本九州福岡做的士佬啦！
可惜，兩位冇做大佬好耐嘅阿哥，命運亦相近：舊兄弟求佢重出江湖、點知一個屈尾十被仇家隊冧埋。江湖事、江湖了，龍哥決定追兇殺到大阪！

人物關系圖

人稱「堂島之龍」的桐生一馬，本來係日本關東最強幫會「東城會」第 4代會長，因愛人由美之死而退隱，本來第 4集已收養由美女兒阿遙，於沖繩開設托兒所。點知今集又變番單身寡佬，搬去福岡做的士佬。故事涉及 5大主角、日本 5大生活區：東京、大阪、名古屋、福岡、札幌。每個故事都絲絲入扣，行版送中文版對白小說，一定睇得明。

的士速遞
首先要嚴守交通規則，將客人送到目的地；文字式劇情中要接載不同類型客人，揀對白考吹水能力。最後就係跟當地暴走族玩《頭文字 D》，氮氣加速、甩尾、改車、整拉花，喪好玩！

歡場真愛
去夜總會搵小姐，叫貴嘢飲、傾偈啱佢嘴形都會加好感度，去多幾次就可以約出街食飯，仲會不時 send港女自拍照畀你。

我冇做大佬好耐啦！

開 game後，阿龍哥每日生活就係玩《 Crazy Taxi》接送乘客，收工去吓夜總會，出糧就入數畀托兒所，偶然會撞到飛車族鬥鬥車、飲大兩杯會跟街邊小混混打一場。戰鬥系統已近完美打得爽，遊戲保持大量趣味 mini game，真係唔會悶，記者呢一刻覺得：「咁嘅生活都算唔錯，但我畀錢買 game係想做大佬喎！」唔使一陣，第 6代大佬堂島大吾搵到上門，原來日本經濟惡劣，東城會要學 AKB48到大阪、福岡、名古屋開分部，仲同當地原幫派起衝突，求佢出山幫拖。龍哥當然話你搵錯人啦，點知唔夠一日，大吾啲𡃁就話大佬失蹤，遊戲終於進入主題，就係搵兄弟、救老友！絕對建議播住哥哥首〈當年情〉去玩，感覺勁正！

街頭隻抽
龍哥居於紅燈區，收工時總會撞到啲小混混，冇得走一定要打。主攻擊為掣，仲可以學車門夾爆頭、磨地毀容等大技。

豚王兼職
打一份工唔夠錢玩女人，可以去河邊麵檔打工，跟足客人要求做出 6種軟硬度嘅麵，客人愈來愈多，記者整到 40碗左右已認輸，但遊戲最高目標係整 100碗！

卡拉 OK
一個人都可以去唱，但揀女仔歌時會交由電腦唱歌，自己孤獨地拍手助興，有種無名傷痛，人到中年冇個陪，真係咁慘？

《人中之龍 5：實踐夢想的人》
人數： 1人
類型：動作
機種： PS3
售價：$348/初回附中文小說