搜尋氣
MK John Lennon：玩唔夠力唱為止！
旺角行人專用區一向係街頭表演旺地，上週網上便 hit起一條名為「旺角 John Lennon獻唱的 imagine」短片，連後生仔都大讚片中主角唱得好。
呢位「旺角 John Lennon」叫 William Lau（阿威），手執一支結他，唱 John Lennon的〈 Imagine〉而爆紅，咪睇佢年屆 62歲， William唔只唱得，連佢手結他都好鬼勁，你聽世紀巨 band Mr.，佢話 Beatles先係王道，後生狂呻香港夾 band難， MK John Lennon就話：「𠵱家夾 band幸福好多！」
現場騷勁正
我唔係好識上網，係朋友話我知網上呢單嘢，多謝大家支持啫，話我唱得似 John Lennon誇獎咗，佢係一代巨星，我都係模仿佢咋！我後生都係個 band仔嚟㗎，當年同幾個 friend夾咗隊 band叫「 The Mark Q」，我係主音兼結他手，嗰陣最鍾意玩 Beatles嘅歌，貪佢哋嘅歌好聽又有難度！之後一直做音響及音樂方面工作，到年幾前，識咗幾個玩音樂的朋友，撩我一齊街頭演唱，我見退休後好得閒，所以咪試吓囉，之後就走到出嚟旺角演唱，喺度唱都儲到班 fans㗎！
呢年幾喺旺角表演都冇乜難處，間中有警察話收到投訴聲浪太大，細聲番就冇事，反而難處係屋企人，佢哋成日叫我唔好再出嚟，話驚我辛苦喎，不過結他係我興趣，呢度每日都有人停低聽我唱，已經係我最大滿足，每日賺到少少咪當茶錢。
我哋當年夾 band要儲好耐錢好辛苦先買到支結他，𠵱家環境好咗啲後生仔好幸福啦，不過我淨係聽 70年代啲歌，𠵱家有乜 band我真係唔知。我今年都 62歲，玩到有一日我唔夠力唱為止喇！
有「旺角 John Lennon」之稱的 William，原先同另外兩個街頭表演者組成 3人樂隊喺旺角演唱，早排 William轉會，同「旺角羅文」 Tony、及女聲 Connie組成 SMS樂隊，最近三人更獲邀到酒樓獻唱。
每晚都有知音人打賞、十元至百元不等， William唔肯透露有幾多，佢就話喺度表演純粹自娛滿足，分到夠飲茶已經好足夠。
William喺旺角演唱時，被圍觀者拍片上 YouTube後 hit爆，上載過一星期，點擊率已近 40萬。睇啲留言就知後生仔都撐佢！
留言列表
{{ article.title }}
