韓面
BIGBANG中佬師弟 EPIK HIGH Rap霸
前週六，韓國勁爆男團 BIGBANG來港舉行一連 3場演唱會， 5子玩盡爆衫、噴火甚至飛天，超有娛樂性，搞到港女 high爆。
其實同 BIGBANG同屬 YG Entertainment的同門師弟組合 EPIK HIGH一樣有料到。 3位 1體的 EPIK HIGH，特色係扮相古靈精怪，而最叻係玩黑人音樂喪 rap，早前就扮晒蝙蝠俠奸角去 MAMA頒獎禮攞「最佳 rap演繹大獎」，同 BIGBANG一樣 yo爆全韓國。
早於 03年已加入樂壇的 EPIK HIGH，主音 Tablo、隊長 Mithra同 DJ Tukutz一直以 3人幫姿態 rap盡全韓國，由 05年至 08年 4年間，年年於各大頒獎典禮包辦「最佳 hip hop歌手獎」，點知去到 09年，成員 DJ Tukutz同 Mithra輪住服兵役，於 3缺 2情況下，成隊 EPIK HIGH可以話散晒。
MAMA頒獎禮當晚，當 BIGBANG演唱〈 Fantastic Baby〉時，主音太陽（右一）就落台對住 EPIK HIGH 3子一齊又跳又唱，擺明畀位班師弟出鏡。
鍾意扮鬼扮馬嘅 EPIK HIGH，上月尾就以蝙蝠俠中奸角如小丑及 BANE等造型，出席 MAMA頒獎禮領取「最佳 rap演繹大獎」，令全場 O晒嘴。 Rap得勁，扮嘢都勁。
年尾等攞獎
好彩兩年後 DJ Tukutz同 Mithra服完兵役後即同 Tablo重組 EPIK HIGH，仲簽埋韓國夢工場 YG Entertainment做 BIGBANG師弟。兩個月前剛推出新碟《 99》，主打歌〈 Up〉唔只霸佔各大流行榜冠軍，上月尾還於 MAMA頒獎典禮，擸走「最佳 rap演繹大獎」，而嚟緊 EPIK HIGH於年終各大頒獎典禮中，更成為「最佳 hip hop歌手獎」大熱門，捱過低潮後，終於重生。
撈過界
EPIK HIGH中以隊長及主音 Tablo最紅，佢唔只齋喺樂壇發展，亦曾拍過電視劇如 KBS電視台嘅《太陽的女人》，更曾試過升呢拍電影《荒誕的自殺騷動》，撈到過晒界。
早前 YG開家族演唱會時影晒冷照，除大星 PSY、 BIGBANG及 2NEI， EPIK HIGH嘅主音 Tablo（紅圈）亦有份入鏡，證明公司都非常重視佢哋。
靠老婆
09年 10月， Tablo就同演員出身的姜惠貞拉埋天窗結婚。而姜惠貞一早簽約 YG Entertainment做旗下藝人；而前兩年 EPIK HIGH因事業陷入低潮，經姜惠貞推薦下今年加盟 YG後即反彈，呢個老婆當然抵娶。
玩 hip hop喪 rap嘅 EPIK HIGH，𠵱家鬼咁潮，但睇番佢哋 6年前，推出《 Black Swan Songs》唱片時，扮東瀛 look，而 rapper Mithra仲留長頭髮，娘到爆。
為霆鋒打交退學
霆鋒十幾歲讀中學時，曾非常反叛，入行初期更試過演唱途中怒掟結他，超火爆，所以同 Tablo應該好啱 key。《蘋果日報》圖片
雖然 EPIK HIGH 3子唔算靚仔，但勝在勁有料，尤其最紅的主音 Tablo，除唱作超班外，學歷更唔簡單，原來他於美國著名學府史丹福大學（ Stanford University）的文學系碩士畢業，所以 rap英文絕對冇難度。
而一直讀番書的 Tablo，於加拿大讀初中時更曾與謝霆鋒做同學，他曾於訪問中爆料：「喺加拿大讀初中時同 Nicholas Tse係好朋友，當時曾為咗佢（霆鋒）同白人學生打交，最後我被處分仲要退學。最近我睇番《新警察故事》先知佢原來入咗娛樂圈，佢由以前到𠵱家都係咁靚仔。」 Tablo唔只 rap得長氣，仲好有義氣喎！
YG 2013最強武器
點石成金的 YG Entertainment，除令 EPIK HIGH反彈外，最近亦着手力捧年僅 16歲女新人李夏怡。上年參加 SBS電視台歌唱比賽《 K-pop Star》時，因低沉兼沙沙哋聲線甚為特別，參賽時已被 YG睇中簽為旗下，處女歌〈 1, 2, 3, 4〉於 10月尾推出後，更連續 4週成為《 M Countdown》流行榜 no.1，被視為 YG 2013年最強武器。
上月尾於香港舉行嘅 MAMA頒獎禮，李夏怡雖冇份攞獎，但 YG一樣帶埋佢來港曝光，錫到出面。
而 EPIK HIGH於兩個月前，亦有同李夏怡合唱一首〈 Cold〉，利用 EPIK HIGH帶起新人。
留言列表
{{ article.title }}
