自創業後， Thomas愛上做生意，希望 25歲前可以買樓結婚。

U撈

理大副學士　淘寶代客增值　低價發圍

2012年12月19日 ~~ 第1091期交易通．搵車快線

淘寶全球有 5億註冊用戶，可謂商機無限，不少人藉淘寶掘金，而現時就讀副學士 Yr.1的 Thomas，於今年 6月已想到替客人增值支付寶，從差額中賺取利潤。
他只透過 facebook宣傳，在無本生利下，每月營業額高達百萬，一創業每月即賺 2萬元。

淘寶所以受歡迎，因為貨品種類極多，價錢又平，可惜淘寶規定，用戶購物須以內地「支付寶」戶口扣數，而香港用戶可透過官方認可的信用咭和電話咭增值，但手續費較高，$135才可增值 95人民幣（現時一般$100兌約 80人民幣）， Thomas看到這一點，想到提供「代客增值支付寶」服務，「我同朋友都鍾意上淘寶買嘢，但手續麻煩又貴。」
由於媽媽在找換店工作，可獲得兌換優惠，今年 6月，作為末代高考生的 Thomas，中學畢業，又正值看到「淘點」改做物流，沒有再做增值服務，認為是難得機會，便在 facebook開設「香港愛淘」專頁，推出增值服務，「客人將港幣轉賬到我哋嘅香港戶口，我哋就會透過找換店兌換成人民幣，存入客人嘅支付寶賬戶內。」
在推出服務時，當時已有 4、 5間同類公司，一般低於$100要收 1人民幣手續費， Thomas便以低價錢、免手續費作招徠。「我哋只賺兌換嘅差額，由於我哋兌換人民幣有優惠，所以就算兌錢平啲，都有水位，$2,000以下兌 1.26，以上就兌 1.25，客人每兌$1，我至少賺到$0.025，我格過價，應該係全行最平。」

Thomas在新蒲崗租了辦公室，他說每日做到唔停手，連飯都冇時間食，所以返學後冇可能兼顧生意，惟有靠媽媽打理，「話就話辦公時間 12至 12，但好多客想即時兌到錢， 30分鐘都嫌耐，搞到我差唔多一瞓醒就開工，做到對眼都紅埋。」

現時 Thomas每晚負責埋數，工作到凌晨。

承諾 30分鐘增值

為了方便客人，他又承諾 30分鐘內完成交易，「除咗午飯及放工時段後 1小時呢段繁忙時間外，其他時間，我哋都會喺 30分鐘內，幫客人完成增值，等啲客可以盡快購物。」
雖然只是透過 facebook吸客，但推出服務不夠 2個月，便有媒體報道，提升了不少知名度。「因為我哋全部服務都係網上進行，一定要得到客人信心，所以有媒體介紹後，多咗好多客識我哋，同埋會有信心啲。」公司生意額由首月 10萬，到第 3個月即時提升至 80萬，「呢行好講口碑，好靠熟客介紹，有部分媽咪級客戶，佢哋網絡真係好大，一個試用完服務後，即刻可以介紹幾十人嚟。」
創業路起步順利，但 9月時，卻遭受沉重打擊。「有日 facebook突然剷咗我哋嘅專頁，跟住 send個訊息嚟，話我哋侵權。」原來淘寶已將「淘」字申請了專利，因發現到 Thomas的專頁，便要求取消。
「冇晒啲客，真係幾徬徨，好在之前同客都有用 email聯繫，於是 send咗 2千幾個 email，逐個客解釋番點解冇咗個 facebook。」接着他便把公司名改為「香港愛掏」，再開新頁，重新找回一群熟客，兼開設代購服務，現時每月營業額達百萬，盈利有 2萬。

雖然忙於上學及創業，但 Thomas（中）仍繼續做童軍。

Thomas（左二）的中學同學，大部分也是他的客戶，還會替他四圍向人宣傳。

讀副學士退居幕後

今年 9月， Thomas入讀香港專上學院金融系副學士，未能像暑假時全身投入工作，幸好媽咪看到生意不錯，願意辭去工作，全職替他打理生意，「媽咪因為同找換店熟，辭職後都可以繼續合作，我花咗成個月 train佢，先教識佢用電腦做嘢，不過每晚都係要靠我對數同埋數。」
由前線退居幕後， Thomas現時主力負責埋數及 marketing工作，「創業對我影響好大，我中學讀理科，以前只想到理科嘅嘢，但創業後，加上我𠵱家讀埋金融系，思考模式轉晒，滿腦子都係生意，就算同女朋友食食吓飯，都會講起生意經。」為拓展業務，下一步，他將在旺角物色新辦公室，兼做集運服務，把各客戶的訂單集合，一次過運到香港，再請他們到辦公室提貨，賺取當中的運費。「本來我搞生意只係想賺下零用錢，𠵱家好想 25歲前可以買樓結婚。」

客人阿鄔

香港愛掏，只要網上過數， 30分鐘就搞掂，充值好方便，而且價錢合理。

香港愛掏：

http://www.facebook.com/hongkongaitao

申請咩牌照？

原來做網上生意，若涉及金錢服務，便要像 Thomas一樣向政府申請一個名為「金錢服務經營者牌照」。「我知好多公司都冇申請牌照，但我想合法經營，同埋萬一同客戶有咩爭拗，都容易處理，雙方都有保障。」申請牌照主要考慮兩點，就是公司負責人的個人資料審查，及辦公場所，審批時間約 1個月，牌照為期 2年，費用約 5千多元，「最初我填咗屋企做公司地址，但覺得唔係咁好，後來索性喺新蒲崗租咗個細 office畀媽咪做嘢同登記。」
網址： http://www.gov.hk/tc/business/registration/license