娛樂八掛大放送★

長腳蟹呂慧儀同現職私人健身教練嘅前「港男」黃文迪（Dickson）結束10年嘅愛情馬拉松，周二（13日）喺會展舉行婚宴嘞！

媽咪姐一直都覺得蟹仔係圈中難得孝順又開懷嘅好女仔，梗係着到靚靚去賀一賀佢啦！之前，有人話坐擁成千萬物業嘅蟹仔嫁窮「港男」，事實證明今次豪擺廿八圍，加上四套合共七位數字嘅鑽飾都係Dickson埋單。佢仲花盡心思整個森林場景，熱愛大自然嘅老婆仔開心，鬼咁浪漫。不過，媽咪姐覺得，呢啲錢，新郎哥真係抵俾！事關蟹仔除咗生財有道，仲婚宴任影、全程勁笑兼送埋精美嫁女餅俾傳媒，鬼咁襟撈！
新婚晚宴一完咗咋，佢覺都唔瞓，就「嗱嗱聲」喺微博多謝有份幫手嘅全人類同贊助商。有樣有身材有學歷（科大畢業㗎），仲要咁識做人、賢良淑德，呢啲老婆，邊度搵吖！

喪笑任影
蟹仔安排咗切餅、合𢀷交杯等儀式俾傳媒任影，仲全程喪笑，非常合作又甜蜜。　

識做夫妻
呂慧儀喺婚宴完咗，凌晨 一點幾將老虎乸婚照post上微博，多謝各方友好幫忙。而新郎哥當晚亦拎住大疊一百蚊一封嘅利是派俾記者，兩公婆都咁識做！

欣宜晒字
估唔到讀番書嘅欣宜，寫中文字都見得吓人，佢仲喺人情封上叫新郎做大隻教練，好乖巧呢。

嚟飲嘅黃日華同梁烈唯兩個大男人大唔透，見到現場嘅犀牛紙牌即刻話要騎吓喎。 ####

哈哈哈！我嫁得又飲得！﹙設計對白﹚

兩公婆勁錫一對花女，呵護備至，應該好快可以生番個！

長腳蟹送出一set精美嫁女餅、賀卡同眼鏡優惠券俾傳媒，禮數做到足。