科大圖書館長期坐滿埋頭苦讀學生，雖有不少其他院校的學生羨慕科大有一個月聖誕假，但編委會編輯黃同學指出，好多同學全年根本沒有假期，「由於科大可以畀學生自由申報最好成績的選修科，取代較差成績的科目，所以好多同學都利用一個月聖誕假及暑假報選修科，希望追分，所以好多人都會讀足全年！」

Main Camp

1年 4生自殺　科大變富士康

2012年12月19日 ~~ 第291期 Face

辛苦捱過公開試，以為順利入到大學，便可歎足四年，住 Hall溝女做兼職少考試，總之大學 4年預咗自由，不再中學雞。
但貴為本港三大大學之一的科大，今年內竟發出四宗大學生疑不堪學業壓力的自殺案，連科大編委會都發表號外，直斥科大已變成「血汗工廠」般的「富士康大學」，又指科大教學制度令學生只求追求分數，而失去正常校園生活，大學輕鬆讀原來只是夢。

由今年 2月開始，科大已發生四宗學生自殺事件，最近科大的編委會更發表號外，刊登了一篇以「香港富士康大學」為題的文章，把科大比喻為富士康工廠，內容更稱「學生被推至……極限邊緣」、「精神崩潰」等字眼，甚至有學生稱科大（ UST）是"University of Suicide and Tragedy（自殺及悲劇大學）"，看來科大的壓力問題不容忽視。

今年 11月初，一宗科大生自殺案件，死者只入學兩個月，就頂不住壓力患精神病！

編委會在號外指出科大 11年間有 8同學自殺，與美國麻省理工學院（ MIT） 12年死 12生相若。
= University of Suicide and Tragedy

上月科大學生會罕有就近年多宗同學自殺事件撰寫號外，內容指責校方為爭世界前列排名，催谷學生，令學生壓力爆煲，用詞嚴厲，並指科大變成富士康大學。

考試連 chur36個鐘

上週正值科大期終試，同學考完試又走入圖書館繼續奮戰，連午餐也是是但但吃個三文治了事，圖書館內則長期擠滿埋頭苦幹的同學。科大編委會總編輯陳棟材同學直言：「圖書館平時都開 22小時，考試就一定開 24，好多同學都溫通宵，喺科大連溫 36個鐘係好閒，有同學四日考五科，唔通頂溫冇可能溫得切！而大部分中期試更安排在晚上，日頭老師教嘅科，亦會考埋，同學根本冇足夠時間消化同溫習！」
除此之外，科大近年力谷做「亞洲第一學府」，在科大校園外亦可見校方攞獎的威水史，而學校的評分制度更令同學壓力加劇，陳棟材說：「個個同學都睇 MEAN做人， MEAN即係最多人拎個分數，曾經聽過一個 Yr.1 BBA的同學講會計份卷 100分滿分，個 MEAN係 95，即係拎 95分先係正常，如果低過 MEAN就代表你差。」

高分博出國交流

除了為 MEAN而活，鼓勵學生去外地交流的風氣亦成為壓力源頭。
就讀工程系 Yr.2的阿德大呻：「難得咁辛苦入到科大，個個都唔想衰，希望攞住靚成績去搵份好工，所以同學都好重視每個學期的 GPA，要揀到自己心儀的主修科， Yr.1嘅 GPA起碼要 2.5以上！而向來科大文化又鼓勵出國多見識和跟名牌大學 exchange，以工程為例，一般都要 GPA2.6先去到， GPA低都有得去，不過一定係返大陸囉！加上科大教授好多都好手緊，大部分同學都拎 C+，即係 2.3，唔勤力啲 Second low hon都保唔住，仲點搵工！」
科大同學個個叫苦連天，就 11月初有科大數學系同學自殺一事，該系教授陳炯林則堅說：「我都有同校方了解過，唔覺得係學校畀太大壓力同學，可能係同學自己唔識減壓！」而校方則表示已成立了學務輔導辦公室、舉行林林總總的校友分享，教導學生如何應付壓力，但對於校方的回應，編委會的陳同學笑言：「我唔信聽完個 talk壓力就會冇晒囉！」

數學系教授
陳炯林
曾有數學系同學自殺，該系教授陳炯林堅持校方沒有過大壓力。

開學即溫書
科大工程系 Yr. 1
尹同學
工程啲科教得好快，我開學首週已經要去圖書館溫書！

一日考三科
科大 BBA Yr. 1
Janice
我其實唔夠時間溫書，要好似鐵人咁通頂，一日要考三科啲同學大有人在！

跳動物舞減壓

上週日（ 9日），一群碩士生及交流生着到一身動物裝，悄悄走入迫滿同學溫書的圖書館跳快閃舞，希望幫科大生減壓及打氣，搞手之一的 Raj說：「希望各同學可以 relax，唔好淨係讀書，忽略人生。」

大部分跳舞的同學都是外地生，他們不諱言：「科大的同學好勤力，所以我哋搞 silent dance畀佢哋輕鬆吓！」

活動搞手之一的 Raj Saxena是資訊科技的碩士生，臨近考試，特意在考試前一天在圖書館關閉前 15分鐘扮動物跳舞。

廁所上吊

另一宗科大生自殺案發生於今年 5月，讀工程及商學雙學位 Yr.3的豐姓女生，疑因考試周壓力爆煲而在科大宿舍殘廁內自縊身亡，本刊發現該層對出的房間，有宿生就掛上八卦（紅圈），心寒！

科大多不測
1週 1小測

科大號稱理學院課程最密集，本刊用科大及中大的物理系作比較，發現中大雖然有 7科期終試，比科大多，但科大又比中大多 13個小測及 2份額外語文功課，同學除上正常課堂每週還要應付 1個測驗，難怪壓力大增。

Main Camp：
Main Campus簡稱，意即主校園，各大專潮人潮事當然離不開 Main Campus。