十六歲的 Apple以前在尖沙咀樓上吧 take嘢，為怕被警察掃場，近期索性在家開餐。踏入暑假，無所事事的她每天起床梳洗後，就回到床上壓碎 K粉充電，成為暑假天天指定活動。

新聞耳目

家長 24小時監控　暑假隱蔽吸毒

2012年07月19日 ~~ 第1167期香港《壹周刊》

踏入七月，暑假正式開始，警方亦開始掃蕩仔妹吸毒索 K。
近幾年，毒品 party集中在樓上吧或北上，經過警隊連番踢竇，加上大陸各口岸嚴防把守，本來一直在外面索 K一族，開始轉竇，從地面轉入地底，越匿越埋。
屋企住所、海中遊艇、酒店房間、離島度假屋、以至屋邨後樓梯、會所，成為新興吸毒私竇。
暑假期間，部分家長為防放假子女在家吸毒，決定聘請私家偵探，廿四小時裝上監聽監視，不過有專家警告，全天候監控只會引爆子女更強烈反彈。

西貢的船家透露，上船吸毒的仔妹，都會帶備大量紙巾上船．由於近日太多人租船吸毒，他們為求自保，都在船身當眼處貼有「嚴禁吸毒」告示。

正式踏入暑假，警方週日立即展開「把脈者」行動，在大嶼山貝澳直搗多處地方，在沙灘、度假屋搜獲四萬元毒品，拘捕二十五名男女，年齡最細十四歲。
一名負責行動的警官透露：「暑假剛開始，警方已接到線報，指唔少有吸毒索 K習慣嘅後生仔定期入離島租度假屋『開餐』。」警官又指，是次行動足足持續二十多個小時，就是因為這班後生仔匿得好埋：「警方其實等咗好耐，睇準班後生仔經常星期六租屋，等到第二日 high爆玩到落海灘才可以拉人。之後再陸續帶人返回佢哋租咗嘅私竇，才能搜獲毒品，人贓並獲。」

越匿越埋

青少年吸毒越趨隱蔽是不爭事實，上月尾禁毒常務委員會主席石丹理就指出，過去青少年平均吸毒一年至兩年便會被發現，現時卻需要三至四年，才能被發現及跟進。
「而家青少年喺屋企足不出戶唔代表就可以放心，佢哋可能喺屋企自己一個匿埋索 K，根本無人知，令問題更加嚴重，始終吸毒的時間越長，戒毒就越困難。」前線青少年社工阿玲說，警方多年來致力掃蕩 K場及樓上吧等吸毒的場所，雖然達到一定成效，但亦產生另一問題，「其實係治標不治本，我而家手頭上的 case，好多係匿埋 take嘢，我哋社工甚至要上門敲門才能搵佢出來。」
九月升中五，今年十六歲的 Apple，就讀馬鞍山區一中學，三年前開始與班 friend索 K，起初去佐敦尖沙咀一帶的樓上吧 high嘢。
「不過自從舊年年尾，有個 friend喺佐敦一個樓上 Café衰咗，因為唔夠秤，搞到好大鑊，之後仲被老豆老母捉去戒毒，我哋之後都唔敢上樓玩。」 Apple一臉惋惜說。
Apple是獨女，家住馬鞍山私人屋苑，父母須輪班工作，家中經常只有她一人。因警方嚴厲掃蕩街頭吸毒， Apple索性在家開餐。
「根本而家 hign大咗，日日都想索，有時一起身無乜精神，就响房『開餐』。老豆老母打電話返來，知道我喺屋企就無嘢驚。講電話應得佢哋衰時，咪話自己心情唔好，唔想講嘢，佢哋都唔得閒理。」

𡃁妹會把 K仔倒在二十元紙幣上，壓碎後才吸服。

毒品「 happy粉」以錫紙包裝，用水沖泡後變成奶茶。這種無色無味的毒品包裝，令警方難以搜查。

踏入暑假，警方連日在中環往各離島碼頭駐守，截停可疑青年人搜身。

暑期活動玩索 K

遇到父母在家， Apple便向父母訛稱去同學屋企玩，實質又是索 K。
上週晚， Apple與兩名女同學，便鬼鬼祟祟在其中一個同學屋企的後樓梯，熟練地把 K粉索進鼻中。十分鐘後，三個少女開始搖搖晃晃。
過了幾小時，醒過來的 Apple說一早跟阿媽講咗會去同學屋企瞓。
「阿媽通常都打電話嚟我同學屋企問吓係真唔係真， check到知我喺度，又以為我同學有父母喺屋企，佢就放心晒啦！」
Apple說，類同的「美麗謊言」，應有盡有。
「有外國讀書的舊同學返香港，要去敍舊，或者同學屋企人開遊艇出海參加，全部都好正常的暑期活動，又真係正常，只不過通常都有 K仔。」 Apple哈哈笑地說。
Apple說，這年暑假同學發起船 P，女收費一百五十元，男的三至四百元，每次三十多人上船。 Apple指出海後不久便會在船艙廁所索 K。
Apple笑着說︰「玩（索 K）到咁上下，就跳落水，出海梗係要玩吓香蕉船、游吓水啦，真係暑期活動㗎！
「不過最正係入長洲 camp，玩得最 free。」 Apple稱到度假屋玩，根本無人發現吸毒。她們通常都會逗留三日兩夜，在屋內把所有窗簾拉上，然後大索特索。

毒品無色無味

Apple透露，毒品來貨全部透過電話預訂，方便又神秘，「可以直接送外賣到後樓梯，食剩就用張銀紙包住，放入銀包，見到差佬都無有怕。」
Apple說她近期在屋企附近的酒樓交收：「禮拜日同阿爸、阿媽飲茶，一早打電話要貨，其間話去廁所，順手喺門外收埋貨，神不知鬼不覺啦。」
她又說，每次取一至兩件（即約十至二十克），花費一千元左右：
「拎得少又係衰，拎得多又係衰，梗係拎多啲，放咗入化妝袋，之後同阿爸阿媽一齊返屋企，一定唔會有人查，擺喺屋企最安全。」
Apple父母每星期給她一千元零用錢，其中一半用來索 K。
「有時無錢，咪叫啲男朋友仔拎囉，一般都肯嘅，被佢哋摸幾下之嘛！」
毒品外賣交收，地點隱秘，令警方難於追尋，而新興的毒品包裝，亦令香港警方更難防。本月初元朗區一次反黑行動中，警隊檢獲五包分別以避孕套及茶包包裝而成、每包約重一克的「 happy粉」。這種「 happy粉」屬水溶性，是由「 K仔」、「冰」及「搖頭丸」等以雞尾酒式混合而成，服後極速亢奮，甚至不省人事，最恐怖是「無色無味」。
「其實呢啲『 happy粉』興咗好耐，以前香港無乜貨，聽啲帶貨嘅人講通常係大陸玩，個樣好似三合一茶包咁，打開錫紙即沖即飲。」 Apple說身邊不少 friend曾經試玩，「幾過癮，而且見佢哋 high到爆晒幾好笑。」

索 K青少年由地上走到地底，屋企後樓梯成為其中一個私竇。

暑假剛開始，警方已疲於在離島加強巡邏，打擊青少年吸毒。

監視子女

私家偵探受家長聘請調查子女，會動用如醫生聽筒般的儀器，在房間隔牆偷聽。

以往家長能從子女的蛛絲馬跡查看子女行為，但近年暑假，不少家長開始聘請私家偵探調查子女。
弘景安私家偵探社 Jeff說：「每年暑假都會多了家長調查子女，以前無咁多，係呢一、兩年越來越多。上年每月約十單，今年每月十五單，暑假期間會多三、四倍。」 Jeff透露主要調查子女是否涉吸毒、援交及黑社會。價錢按日計，每天二千五百至五千元不等，視乎難度而定。
Jeff指找私家偵探的家長，大都來自中產，「呢啲後生仔女有好多零用錢，如果吸毒，通常都响朋友屋企、遊艇、私竇酒吧，甚至屋企樓下會所都有，好隱蔽。」
他表示以前通常以跟蹤居多，暑假期間家長會額外要求在家安裝偷聽或監視器，目的是了解子女在家的行為。
在父母配合下，他們把家中物件改裝成偷拍偷影工具，監察子女的電話及網上活動。「試過安裝一個偷聽器喺床褥下面，亦試過安裝喺子女隔籬房間的牆上，一般家長都只係偷聽就可以，如果偷拍，功夫多好多，可能要改裝開燈電掣之類，因為其實班後生仔都好醒目，好易發現。」另外，亦需要找與目標人物年齡相若的年輕人做「臥底」，混入目標的圈子內，以便調查及了解其援交或吸毒原因。
此外， Jeff指 facebook亦是調查工具之一：「 add咗目標人物約三分一嘅朋友之後，先 add佢，然後投其所好，之後先慢慢打開話題，話好悶，撩佢講會唔會有吸毒船 P，傾多兩傾，咪話一齊去。」
中大心理學系講座教授侯傑泰認為，父母找私家偵探調查子女前必先深思熟慮，「當你收到子女有吸毒、援交甚至加入黑社會的調查資料後，你會點處理呢？唔通攤開晒質問子女？」侯認為，一旦處理不當，只會令行為偏差的子女更加走向極端，與父母關係更加緊張。
循道衞理楊震社會服務處專負責青少年輔導的社工葉嘉綸指，家長找私家偵探調查子女「並不可取」。「所有的掃蕩、監視行為，只能讓反叛的年輕人更加逃避我們，正確的教育、溝通、關心，互相建立信任才是治本的方法。」

地下援交

青少年毒禍嚴重，援交之風也更趨熾熱，並由互聯網漸轉以用智能手機 apps（應用程式）搵客傾生意。
在警方犁庭掃穴下，援交少男少女在網上討論區的留言變得收斂，由以往列明收費及服務內容如︰ ML（做愛）、 BJ（口交）、 HJ（手淫）等露骨字眼演變成隱晦留言。
「想搵人幫手……有心人想幫我就 whatsapp」
上週，本刊透過網上隱晦留言，以 whatsapp接觸一名援交少女。該名少女自稱 Ivy、年約十七、八歲、她即時透過 whatsapp傳來詳細服務表。
上週六晚上，九龍塘港鐵站出口， Ivy在一間時鐘酒店出現。
她背着一個 LV手袋，取出智能手機，在霓虹燈下，急速地按電話。
約四十五分鐘後，一名年輕男子與 Ivy在後巷會合，二人刻意分開走，前後腳步入時鐘酒店，兩小時後男子自行離開， Ivy之後步出。
援交女除了用 whatsapp一類的通訊 apps與客人聯繫外，亦會以交友 apps，如︰遇見、 SayHi、 SKOUT等，進行援交活動。
有私家偵探指，近年不少父母要求調查女兒的私生活，發現一名十多歲的少女，為了買名牌接客，其中一名客人竟然是表哥，二人的援交內容就是通過 whatsapp。
援交的發源地日本，早於○三年通過「電子送信罪」法，任何人透過電話郵件等誘使他人進行性交易，最高刑罰是入獄三年。反觀香港，現時刑事條例第 200章 147條「唆使引誘他人作不道德行為」指任何人在公眾地方或在公眾可見的情況下為不道德目的而唆使他人，例如「企街拉客」賣淫即屬違法，最高罰款一萬元及監禁六個月。警方今年三月才表示，近年援交活動多以網上討論區及智能手機作拉客平台，正與律政司研究，清楚演繹「公眾地方」定義，希望把網上及手機列入。

援交少女搵客、講價、約見面，全以手機 apps進行。她們通常約在時鐘酒店後巷陰暗處，再與客人前後腳入酒店開房交易。