黐咗何家千金超雲之後，陳山聰由無綫二線演員升呢做上等人。劇集得閒先拍， 宣傳就一次咁大把，呢種非凡工作態度， 搞到無綫對佢永不錄用。
你有你鬧，山聰一於少理，同超雲飛去英國慶祝聖誕。超雲不停喺微博狂晒幸福， 睇到毛管戙。那邊廂，同山聰由契姊弟變成敵人嘅伍姑娘，亦乘勢喺微博晒相抗衡，但最終輸俾超雲山聰呢對浮誇情侶組。

痴纏濕平
山聰有呢條超雲特大水喉射住，加上家陣英鎊水位唔高，山長水遠點都要去名店濕平一下， 二人仲喺商場大堂同三位人肉小神仙影相， 證明自己刺激當地經濟。事後超雲喺微博話自己一時忘形， 無意晒幸福，但計我話，超雲遇上山聰，其實都一直忘形㗎啦！

宣洩心情
超雲同黑人喺摩天輪前面影相，仲叫微博童鞋估下邊首歌（擺明係〈幸福摩天輪〉）。如果唔熟讀娛樂新聞嘅童鞋，分分鐘以為超雲同嗰位黑人有路，隨時將歌名估錯。

寃氣遊街
倫敦氣溫零度左右，不過超雲同山聰依然四圍去，仲去市集買家品，二人仲齊齊剷青，影張「到此一遊」留念。雖然超雲喺微博嗌「so cold」，但佢呢日行街依然打出大心口，保暖頸巾都冇條，難怪後面羽絨不離身嘅老外，睇到眼凸。

紅豹出巡
今次山聰負責揸機， 超雲喺一棵特大聖誕樹面前影相。 經常重申自己並非藝人嘅超雲，當日就擺出一副chok樣，加埋紫紅色頭髮、唇膏、火紅短褸同高踭鞋， 以及豹紋短裙同legging，以為睇緊「國家地理頻道」啲節目。

布置愛巢
血紅色過火得滯，超雲於是喺微博分享一張比較簡樸，喺金光銀樹下影嘅相。不過轉頭二人又再繼續浮誇，只租住倫敦嘅apartment嘅佢哋依然落足心機，將呢個短期愛巢布置得好有聖誕氣氛，出動埋人造雪（右圖）。

伍姑娘溫情贈興
陳山聰一朝得志，喺自己生日嗰晚打俾契姐伍姑娘，叫契姐以後唔好再搵佢，二人於是擘面，再見不是朋友。家陣山聰飛上枝頭飛埋去倫敦，伍姑娘亦都唔輸蝕，去咗哥哥補習天王伍經衡（Richard Eng）屋企，參加新居入伙兼聖誕party，死黨陳敏之亦帶埋拍拖多年嘅圈外男友高調煙韌。雖然溫情同友情十足，但都唔夠山聰嘅肉麻咁搶眼。


Richard個單位係高層複式，兼有飽覽維港嘅私人泳池，難怪伍姑娘同陳敏之兩姊妹恨到流口水。不過家陣陳山聰咁富貴，隨時快過佢哋進駐。

過氣情侶鬥娘
聖誕普天同慶，所以杜德偉同周汶錡呢對過氣情侶，咁啱得咁蹺整咗張嘜頭聖誕卡慶祝。不過無獨有偶，睇完佢哋嘅聖誕卡，腦海只有一個「娘」字，可能佢哋當初都因為呢條channel而搭上。 杜德偉嘅點唱機（左圖）同埋周汶錡嘅名模坐姿，相信喺呢個世紀都見唔到，認真經典。 ####

arrow
arrow
    全站熱搜

    stacylife 發表在 痞客邦 留言(0) 人氣()

    E-mail轉寄