「多謝添哥！（李添勝）」一句耳熟能詳的說話，卻非站在頒獎台上獲頒獎項時說的，而是坐在維園中的林子博，談及被無綫監製賞識的女兒，有感而發。

林子博，出道近十年，拍過亞視劇集、當過《今日睇真啲》主持；過檔無綫後，繼續主持工作，現為無綫娛樂新聞台主播及外景主持，卻仍希望有一天能於無綫劇集中演出！可幸的是，六歲的女兒詠渝，比父親更早懷才得遇，去年底獲李添勝睇中，接拍《我的如意狼君》，飾演童年的周麗淇，「既然佢鍾意拍戲，又有能力做得到，我都支持佢同細佬入行。呢行好好玩，冇乜壓力。好多謝添哥畀機會詠渝，最好第時搵埋我開戲啦。」

無綫娛樂新聞台主播林子博，與太太Shirley育有一對分別六歲及四歲的子女，女兒詠渝去年更參演無綫劇集《我的如意狼君》。

詠渝去年底獲李添勝睇中，於《我的如意狼君》中飾演周麗淇的童年，首場戲便要流出真眼淚。

代父從演

「我入咗TVB咁耐都未拍過劇呀，你第一套就拍添哥嘅戲，仲想點呀？」女兒詠渝今年初拍畢無綫劇《我的如意狼君》後，催促父親林子博為她接戲，子博即有以上的回應。

沒錯，舞台劇出身的子博出道近十年，由亞視轉戰無綫均以主持工作為主，而且一直希望演出無綫的劇集，奈何主播工作密集難度期，很少監製會考慮找他拍劇。去年中，藝員部同事在機緣巧合下翻看子博的blog，看過他女兒的鬼馬片段，遂將她推薦給李添勝，子博說：「嗰陣添哥諗住搵個同周麗淇咁上下樣嘅細路女拍《我的如意狼君》，佢見到詠渝之後覺得佢幾靚女，試完戲之後就落實用佢喇。」

還記得第一日拍戲，詠渝便要演出一場喊戲，出動到白花油也谷唔出眼淚，最終要由子博親身示範，在女兒面前哭崩才能逼出她的真眼淚。雖說女兒代父從演一償父願，但這個父親，擔任童星女兒的幕後軍師，也出過很多力、無數汗與淚。

他憶述：「同一晚，個女仲要拍一個扮跛嘅鏡頭，點知扮得唔似畀導演鬧。當晚佢返咗屋企後，瞓到清晨五點，突然搖醒瞓喺佢隔籬個婆婆喺度喊。婆婆問佢做咩事，佢竟然話自己尋晚有場戲演得唔好，驚人哋以後唔搵佢拍，自此之後，我就知道個女真係好鍾意拍戲。」

早前，詠渝再獲添哥欽點接拍新劇《天梯》，戲份極重，需要子博向教育局及學校申請，而他就從未擔心過影響女兒的學業，「當我決定畀個女拍戲時，就會付出雙倍嘅時間出嚟陪佢溫書做功課。我要佢明白，拍劇睇劇本都要識字，唔畀心機讀書點識得睇劇本？好多家長想啲子女做醫生、做律師，我就認為，做藝人冇咩唔好，佢有機會做，又有能力做到嘅，入娛樂圈都係一件好事，呢份工冇乜壓力，仲好好玩添。」

林子博贊成讓子女入娛樂圈，更表示將來假若他們讀不上大學，便讓他們報讀演藝學院。

詠渝早前再獲李添勝欽點，參演新劇《天梯》，戲份極重。

計劃前途

六歲的詠渝今年讀小一，在軒尼詩道官立小學就讀，至於弟弟卓楠，今年兩歲，並沒有像時下的小朋友上興趣班和playgroup。子博解說：「我諗住個仔直接上K1喇，我唔擔心佢學嘢慢過人喎，字遲早都識o架啦，係咪先？自己都教到嘅，幼稚園嗰啲好簡單啫！我個女啲同學，一年班就走去補習，我覺得有冇咁嘅必要呢？如果吓吓都靠人哋，即係作為家長嘅唔願意負呢個責任啦！其實父母有時間、有文化嘅，都可以自己跟進子女啲功課，唔使郁啲就掟出去畀人教嘅。」