娛樂八掛大放送★

媽咪姐手帳

星期一（7日）深夜，有賊人趁周永恒同趙頌茹一家三口瞓曬覺，爬窗入去佢哋租住嘅元朗洪水橋村屋爆格！因為星期三要搬屋，所以嗰晚全屋亂糟糟，佢哋要到第二日食早餐埋單時，發現兩個人嘅銀包都冇曬錢，先知出事去報警。點算後發現，放响飯枱準備俾搬運公司嗰兩千蚊，仲有銀包入面嘅錢同電腦、相機器材等，共損失近三萬蚊。

 

喺屋企執緊嘢嘅周永恒同媽咪姐講：「我初時真係嬲到想搵人打！後尾有個教友（基督教）勸我話冇人想做賊嘅係咪？可能佢等呢啲錢養妻活兒呢？一咁諗我成個人鬆曬。」其實周永恒個腦有水瘤，近排同TVB鬧翻，無咗份工，而趙頌茹之前又小產，依家一家三口全靠周永恒出福音唱片同拍福音電影養妻活兒，今次俾人爆格，更加被認為係「愈窮愈見鬼 」。「我冇嘢噃，我老婆都咁話。有好多人搵唔少錢，但係日日使錢買名牌，又鬼咁大壓力，咁會開心咩？依家我有親情、有愛情，不知幾幸福，人開唔開心睇你追求啲乜嘅啫！今次俾人爆格，我仲好感恩㗎！真係要多謝上天，我只係損失金錢啫，當時好彩冇出到房，一家人都平平安安。」媽咪姐從未見過有人會好似周永恒同趙頌茹咁，俾人爆完格仲咁豁達嘅，睇嚟耶穌同一歲大嘅囡囡（周信希）真係令佢哋成長咗唔少。 ####

周永恒講到初時發現被爆格，嬲到想搵人打時，老婆趙頌茹亦苦惱得以雙手掩臉。

未爆前早前一家三口先喺屋企開開心心接受訪問，但依家就覺得村屋唔多安全，會搬去天水圍嘅私人樓住。圖片

露台地上布滿賊人臨走時掉棄嘅文件，全部都係本來放在周永恒背囊內的東西。窗框上就留有賊人指模（圈），警方現正跟進。

周永恒家住三樓，賊人有地下一、二樓唔揀，唔嫌辛苦爬上三樓，證明係有備而來。

面對現實，收拾心情，兩公婆繼續忙於整理衣物，準備搬屋。

由於飯枱上布滿雜物，所以周氏夫婦 初時仲未知道失竊。

周永恒呢隻道具「金銀撈」亦放喺飯枱，賊人「識貨」並未拎走，所以差人話呢個賊應該係老手。

早前，兩夫婦齊齊出席嘅《第一屆潮 B Kids模大賽》拍住上搵奶粉錢。失錢事小，夫妻同心最重要。