娛樂八掛大放送★

外來語

有啲嘢係整定。明明影過一次艷照，衰到貼地，竟然仲有女送上門，再影再衰，注定色字頭上一把刀。又例如，佳烈治。明明拍乜衰乜，黴到發瘟，點知一套《神探福爾摩斯》，起死回生，注定大導有運行。點知好運陸續有來。拍完第一集，大導即被催促開拍續集。家吓續集未上映，據聞電影公司已搵緊編劇寫第三集劇本。好運，擋都擋唔住。

 

有運行嘅，唔止導演佳烈治（Guy Ritchie）。最好嘅人辦，有男主角羅拔唐尼（Robert Downey Jr.）。想當初由《鐵甲奇俠》鹹魚翻生，到《神探福爾摩斯》有口皆碑，人氣持續高企。你可以話：頭一兩次賣座，都係撞手神啫。冇可能次次都係嘅！

逃過一劫

又真係唔到你唔信邪。據講《神探福爾摩斯》票房造好，電影公司即決定開拍續集。不過羅拔唐尼當時已應承拍攝《天煞西部反擊戰》，檔期撞到正一正。手掌又係肉、手背又係肉，點算好呢？結果梗係揀《福爾摩斯》啦。除咗做落有感情，羅拔同導演仲好啱key，可遇不可求。哈，點知咁就俾佢避過一「劫」。據知《天煞》成本約1億6千萬美金，除咗美國本土1億票房，外國加加埋埋都只係收得7千幾萬。埋單計都只得1億7千萬多啲，仲要口碑普通。羅拔唐尼辭演，直頭執番身彩。可憐007丹尼爾格力（Daniel Craig） 當災啫。

兩雄相遇

今次《神探福爾摩斯》續集《詭影遊戲》（香港、美國同步12月15日上映），古仔講奧地利皇儲自殺身亡，但福爾摩斯一口咬定係謀殺。查案之際，突然殺出邪惡教授。據知邪惡教授係原著小說裏面嘅大奸角，實力、智力跟福爾摩斯差唔多。另一邊廂，華生準備做老襯。喺單身告別派對時，認識皇儲兇案關鍵女主角。此角由瑞典版《龍紋身的女孩》露美慧柏絲（Noomi Rapace）飾演。露美本身原為瑞典國寶級演員，演技毋庸置疑，只係年紀已經30有2……想睇後生女，都係搵Edison實際啲。 ####

《神探福爾摩斯》上一集成本9千萬，全球狂收5億2千萬美金，成績驕人。難怪電影公司即搵原班人馬開拍續集，仲搵埋影壇新貴、瑞典演員露美慧柏絲做女主角，陣容尚算強勁。

佳烈治初出道時，作品好評如潮，但2000年同麥當娜結婚後就再冇佳作。直至2008年離婚後，大導鹹魚翻生，一拍《神探福爾摩斯》即掂。

上一集女主角麗素麥雅當絲將會回歸客串一小part，負責同福爾摩斯藕斷絲連。

上一集羅拔赤裸上身打拳，今集搞搞新意思，赤裸上身扮女人。

新加入嘅瑞典女演員露美慧柏絲（左），飾演吉蔔賽占蔔師。因涉嫌捲入皇儲謀殺案而慘遭追殺，要跟福爾摩斯、華生一齊走佬。

邪惡教授一角有傳聞搵畢彼特、加利奧文等重量級人物飾演。搞搞下，竟變咗二打六Jared Harris。 Jared拍開電視劇，近作有《Mad Men》。

電影喺英國、法國取景。坦白講，唔算好大製作，呢幕爆炸場口算係有啲睇頭。

華生上集訂婚，今集正式步入教堂。不過華生為救福爾摩斯而爭啲miss 咗自己婚禮。