揞名爆

有個老友早排出門，因時差關係，要搭淩晨機。老友喺排隊過關時，見到富二代「老實人」，身邊仲有一個長頭髮、身材高䠷嘅索女，不過老友見佢哋冇咩親熱舉動，而且交談唔多，以為係助手或朋友之類。點知原來好戲在後頭。



老友話佢哋一過關入咗禁區，情況完全唔同曬。先見到個索女成隻樹熊咁撻喺「老實人」度，「老實人」一隻手喺索女個身度遊上遊落、另一隻手箍住索女係咁咀、係咁啜，完全唔怕俾人知道。

老友好唏噓話﹕「以為『老實人』人如其名，同一般富二代唔同，而且老婆又係出曬名嘅靚女，仲有幾件金叵羅，幸福滿瀉。估唔到又係得個樣，天下烏鴉一樣黑。」

唉，阿妹呀，媽咪姐幾時都話﹕人不可以貌相啦，況且世界上有邊隻貓唔偷腥㗎？總之偷食完，記得抹乾淨個嘴、識得返屋企。做老婆嘅，隻眼開隻眼閉咪算囉。

arrow
arrow
    全站熱搜

    stacylife 發表在 痞客邦 留言(0) 人氣()

    E-mail轉寄