So Comment

食西餐必蒲西環　 Bistro Du Vin

2013年01月04日 ~~ 第910期飲食男女

Happy 2013！
本來寫咗篇稿鬧人，但係諗吓新嘅一年，新開始，唔好響 2013年第一篇稿就鬧人吖！於是大家 Happy 2013！

食「西」餐，梗係去「西」環啦！！！

堅尼地城條 Davis St.真係愈嚟愈旺，成條變咗食街，而且每間都相當唔錯，最難食反而係最老牌嘅「西環碼頭」！雖然條街（有嘢食的部分）短短，但是已殺低全個大坑浣紗街。這個大坑，大大細細巷，想搵間好食都冇。只有雪糕檔 OK，但食雪糕唔會飽呢！吖，仲有達磨拉麵，冇嘞！成區簡直令人失望。但又唔知鬼咁多人去，最近朋友去咗間舊 Centro（銅鑼灣道）隔籬的新意大利餐廳，簡直係食風同食塵！
最正 Piccolo新加坡老闆 Randy開了間 Bistro喺隔籬，本來想去食個 Boxing Day late brunch，又唔諗到去邊，就盤算食「西」餐梗係去「西」環，去 Davis St.逛逛，試新屎坑！

食物

Escargots$150， OK啦！
Baby Squid$130，超正！首先唔係時常有 baby squid，我成日逛街市都要撞手神。我常見的比較長形，佢啲就係圓啲！好新鮮，彈牙！只要魷魚靚，點煮都好食！最聰明嘅煮法就係落鹽，少少胡椒粉加少少芫荽碎，這樣一定唔會搶走啲鮮甜味。
Egg Brandade$95，鬼佬鹹魚，蛋！冇試！但賣相好靚。
Onion Soup$75，嘩！好熱呀！喺香港未飲過好飲嘅洋葱湯，呢度算好了。濃而不杰，最怕飲洋葱湯係冇湯飲，淨係好似喺度食洋葱渣，個湯炒得啲洋葱好香，牛肉湯底亦非常好，又唔會太多 cheese，可以一試。
Suckling pig leg$220，飲完洋葱湯已全滿，都唔記得自己叫了 Suckling pig leg！見到隻燒豬腳端上枱面，真想死！於是快啲打發佢，叫佢去切開幾嚿先，切開比較細嚿，睇落冇咁膩。拿了一小嚿（一小嚿仲要分四！）嘩！結果係食完又食！皮好脆，肉好「豬」！好香豬味呀！真係食緊豬呀！又 juicy！好正！
雖然試唔多嘢，但果然係一間超水準 Bistro，又平，又 casual，開心過去食 French Fine Dining！

Bistro Du Vin
地址：西環堅尼地城爹核士街 1D號鋪
電話： 2824 3010

蘇施黃
資深電台人，天生異「口」，除了講嘢叻，食嘢同樣嘴刁，近年開咪、上電視做主持都不離教人食得精，吸引大批粉絲跟佢搵食。