未必大大聲先叫做打得；斯文西裝 Look兼陰聲細氣同樣一身好武功，更易令人嚇一驚！令全世界車主等到頸長的 Bentley Mulsanne，極盡富貴的超級豪房終於有水貨到港，當然絕不可以錯失一試它過千 Nm扭力的機會，它四両撥千斤的爆發威力，也可靜靜享受的！記者：許維雅攝影：伍慶泉、林栢鈞Model： Eagle
其他副刊影片 渴市皇座要等一年 放大圖片 
■豪房近年大熱的米櫳，配極軟熟真皮椅猶如豪宅。
買歐洲車向來都無現貨俾你即刻揸走，訂貨後等幾個月交車已經叫等閒事，一些熱賣車款、造工精湛的頂級豪房更要你等足成年，好似 Bentley於 2010年 4月推出的 Mulsanne，世界各地的銷售反應都十分熱烈，加上呢部一直嚴守精雕細琢造工的英式貴族，製造時間需時至少兩個半月，更有傳廠方為控制質量，每年只會生產 18部右軚車，咁搞法，難怪家同代理落定買車，好大機會要等到 2012年頭先有車，亦明白點解代理遲遲都未安排傳媒喺香港試車呢！不過渴市還渴市，終於可以喺香港揸住呢部超級皇座出街，全因有一部水貨新鮮熱辣到港。始終超過五百萬元身價，車行選色方面都相對保守，雖然只係最大路的黑色亮漆車身配米色真皮內櫳，但亦難掩呢部豪房新貴的光芒。前長後短的巨型長方盒車身，配上十分養眼的 21吋五輻式巨軨，充滿懾人氣勢。巨大長方形金屬網面鬼面罩，加一大一小雙圓頭燈，一貫熟口熟面的 Bentley車頭面貌，反而縮短了的房車尾線條，更加吸引。
放大圖片 
■最鍾意個雙色皮軚環設計，時尚高貴兼備。
放大圖片 
■燃油計、時鐘及水溫錶都貴氣過人。
放大圖片 
■後座有電椅及冷氣按鈕，老細位應操控更多。
放大圖片 
■後座有一張桃木餐枱仔的配備。
放大圖片 
■雙圓錶板中間採更清晰液晶體顯示屏。
放大圖片 
■短小車尾增加流線感，更易令年輕富豪垂青。
靜靜起步威力勝跑車
走進車廂，難免將 Mulsanne同 Rolls Royce的 Ghost作比較，雖然滿佈深啡色桃木、真皮及電鍍邊的高貴裝潢，擁有意料之內的豪華氣派，但直覺上覺得 Ghost的貴氣稍勝。終於可以一償揸住 Mulsanne遊街的心願，穿梭特別多車的尖沙嘴區，相映出 Mulsanne更加份量十足，收視率極高。唔好以為擁有 2,585kg的車重、 5,575mm的車長，你就可以蝦到佢， 6.8公升的 V8雙渦輪增壓引擎所輸出的 512匹馬力及 1,020Nm扭力，聞名不如親身一試，起步爆發力量快過唔少辣跑。好打夠惡又使乜大大聲話你知，死氣喉所發出細微而低沉的聲音，坐於車廂入面係完全聽唔到，加上極之穩定舒適的懸掛，真係殺咗人都唔知咩事。大家亦都唔好以為佢大大件一定論論盡盡，操控靈活的軚感恰到好處，切線爬頭同樣身手敏捷。不過始終揸住成層樓周圍走，實在有壓力唔敢亂來，能小試一段路已經令虛榮感滿瀉。
放大圖片 
放大圖片 
Bentley Mulsanne規格
引擎： 6,750cc V8 Twin Turbo馬力： 512ps/4,200rpm扭力： 1,020Nm/1,750rpm傳動： ZF八前速自動波售價：$5,880,000查詢： 2922 2933（金國汽車） 
留言列表
{{ article.title }}
