今日未漱口嘅，就入嚟食番碗啦！﹙設計對白﹚
新年新開始，元旦日中午時分，大劉喺「飯堂」門口開聲話請記者食飯。咁難得嘅機會當然要第一時間舉手，之不過條件係「唔講政治問題」，而呂麗君亦陪伴在側，幫手點數。
媽咪姐
喂，大劉麗君請食翅！
媽咪姐同大劉（劉鑾雄）都係一樣，鍾意去福臨門食飯醫肚，不過次次見佢都係粒聲唔出，一支箭咁入去福臨門，想同呢位話題富豪傾吓偈都冇機會。
不過最近大劉滿腹牢騷，周日（ 30日）同呂麗君去福臨門食 lunch嘅時候，主動同門外守候嘅記者講，話要發表一啲有關政治嘅意見，噏咗一大堆言論，重點係支持習近平提出嘅反腐敗、反貪污。
不過啲政治問題，媽咪姐真係唔識解，淨係記得大劉有單澳門貪污案嘅官司喺身，下禮拜開審。聽大劉嘅偉論，似乎佢深切感受到港澳兩地貪腐情況好嚴重喎！不過點都好， happy最重要，大劉年年都會喺除夕夜去君悅 party載歌載舞，今年都唔例外，除夕當晚呂麗君同甘比（陳凱韻）就先後陪大劉度過除夕，用行動支持大劉。到咗元旦日，大劉仲請埋大班記者去福臨門食翅，睇嚟佢開心返晒啦！
大劉請食飯，自然唔止有翅食！仲有乳豬、龍躉片、冰糖燕窩等奉上，精美點心食到飽。
喺「飯堂」影大劉入𨋢就見得多，成班記者連保鑣加大劉同𨋢？就確係第一次！唔通今年想搞親民？
福臨門係大劉嘅指定「飯堂」，大班記者見佢單官司就嚟開審，連日到嚟追訪。大劉一家大細上車，要搵人鏈開路，好大陣仗。
除夕輪住陪
大劉每年除夕嘅指定動作，咪就係去君悅睇煙花，今年仲早早 8點幾就同呂麗君十指緊扣到場。當晚氣溫急降，但呂麗君就一於少理，只係着咗件披肩款嘅皮草，最緊要靚。 
Party一完，大劉就陪甘比同囡囡一齊走，戴住個后冠嘅甘比，霎眼睇差啲靚過今屆港姐，起碼佢淡妝都順眼、見得人嘛。
哎呀！甘比上咗保母車先發現囡囡個皇冠仔甩咗㖭，不過無緊要，小朋友咁樣先叫 cute。
留言列表
{{ article.title }}
