肥仔雖然經歷過不少危險事，但現今已走出陰霾，主人對牠更加呵護備至。

Petbook

獨眼八哥　意外走失多個媽

2013年01月02日 ~~ 第1093期交易通．搵車快線

今年 10歲的八哥犬肥仔可謂經歷過不少難關，早幾年在街上被大狗撞甩左眼；於 12年尾一個寒冷晚上更走失了，嚇怕主人 Sandy。在街上遊蕩的肥仔，幸好被有心人 Kelly收養，最後 Sandy在網上尋愛寵，與肥仔重聚。由於 Kelly曾帶肥仔回家悉心照顧，對牠寵愛有加，所以 Sandy讓肥仔認埋 Kelly做媽咪，現時肥仔成為兩家的寵兒。

得區議員之助， Sandy在網上發放尋犬啟示，最終找回肥仔。

記者相約 Sandy到公園訪問，只是第一次見面，肥仔便不怕生保走到記者和攝影師的腳邊，「佢唔驚人又為食，只要你有嘢食就好易同你玩。」肥仔本是由 Sandy的朋友飼養，但他要移民，便送了肥仔給 Sandy照顧，「我屋企之前養開狗，上一隻唐狗養咗十幾年終老後，就冇再養過，直至肥仔成為屋企嘅一員。」
自小患有皮膚病的肥仔，在 5歲時因意外失去了左眼，「有次放狗，肥仔俾隻大狗撞到，聽到佢慘叫一聲，我哋跑埋去見佢左眼甩咗出嚟，我哋嚇到傻咗，嗰陣差唔多半夜 12點，我即刻打去唔同嘅寵物診所睇吓邊間仲有開，去到醫生話肥仔隻眼冇得救，要切除，我同屋企人聽到呢個消息都係咁喊。」
失去左眼，令肥仔留下了陰影，「手術後肥仔自閉咗 3、 4個月，平時我哋放工返嚟，佢會撲埋嚟歡迎我哋，嗰排只係抬頭望一望我哋就算，我哋撩佢都冇咩反應，成日趴喺地下唔肯出門，隔咗一段時間佢先願意出門行吓。」
雖然已走出自閉的陰霾，但肥仔聽到別人話自己是盲狗仍會不開心，「𠵱家佢出去見到大狗會紮行晒馬，唔敢再行近大狗，而且鍾意貼牆行，可能咁先有安全感。試過有途人對住佢話：『隻狗盲嘅！』肥仔會知道人哋講緊佢，返到屋企會匿埋，而且眼濕濕，雖然我即時會叫人哋唔好咁話佢，但始終把口生喺人哋度，好難阻止。」

意外走失網上尋親

在 12年 12月 9日的晚上，因 Sandy的大意，令肥仔走失了，「嗰晚成家人食緊飯時發現唔見咗肥仔，原來道門未閂好，佢應該走咗出去，我哋成家人即刻走出去逐層樓去搵，之後又去我哋平時放狗嘅地方睇吓。」
整晚都找不到愛寵，令 Sandy一家十分緊張，「周圍搵都搵唔到，又沿住附近馬路去搵，真係好驚佢有咩意外，而且嗰排氣溫好低，得十一、二度，驚佢喺街凍親，過咗 2日，我哋去搵鄺俊宇區議員求助，喺 facebook散發消息。」
原來走失了的肥仔被 Kelly一家收養了，據 Kelly憶述：「嗰晚我同媽咪買外賣返屋企，見到有隻狗（肥仔）喺街上流連，見佢冇狗帶、左眼又盲咗，跟咗一段路都唔見有主人搵佢，以為佢盲咗俾主人拋棄，同媽咪商量就帶咗佢返屋企，諗住收養佢，之後喺網上見到有人尋狗，先發覺肥仔唔係流浪狗，係主人一時唔小心先俾佢走失咗，雖然唔捨得，但都想佢返到主人身邊。」

自 5歲被撞甩左眼後， Sandy帶肥仔出街，肥仔都會貼牆行，這樣才會有安全感。

肥仔被撞甩眼，做完手術後，曾經自閉 3、 4個月，唔願睬人。

團聚後兩家成好友

事隔 7日，最終 Sandy與肥仔得以團聚，更令兩家人成為朋友，「最後知道 Kelly收留咗肥仔，而且仲對佢好好，帶佢睇醫生又幫佢沖涼，我去拎番肥仔時，見 Kelly眼濕濕添，佢仲送咗一堆狗糧、沖涼粉等狗用品畀我哋，於是我就畀肥仔認埋佢做媽咪。」
Sandy現時對肥仔更加呵護，以免再次發生意外，「𠵱家我哋係大門加咗塊木板，令肥仔冇咁易走出去，而喺屋企都照幫佢着衫，畀人知道佢唔係流浪狗。」本來喜歡狗的 Kelly因此決定買貴婦犬豆豆來陪肥仔，肥仔現在有兩家人錫，又多了狗伴，不會怕寂寞了。

Kelly最近養了貴婦犬豆豆，希望給肥仔多一個玩伴。

騷 GOODS　皮膚毛髮保健食品

寵物的毛髮及皮膚健康十分重要，尤其八哥犬這樣油脂分泌旺盛的寵物很容易患上皮膚病，所以主人要多注意平時飲食和食用一些營養產品，改善牠們皮膚健康。

Vets Kitchen護髮補充劑$238/300ml
含有 Omega 3脂肪酸及去殼燕麥，可以改善狗隻皮膚痕癢和乾燥問題，當中加入雞汁調配，令寵物更易入口。

Dr.Goodpet營養粉︰年長配方$140/227g
含有豐富的礦物質、維生素 E和 D，均對寵物皮膚和毛髮有益，適合 7、 8歲以上的貓狗，為牠們提供重要的營養，維持活力和健康。

Grandma Lucy's兔肉脫水糧$528/3lbs
純天然，無殼物成分減低狗隻敏感的風險，含有兔肉、木瓜等高蛋白質材料，而且有 Omega 3和 6脂肪酸，保持毛髮健康。