Wiyona在利時商場開樓上鋪，佔地約 170呎，她常親身示範新裝，做鋪頭生招牌。

創業通

Model賣時裝　親身示範　月賺 4萬

2013年01月02日 ~~ 第1093期交易通．搵車快線

網上購物盛行，最怕是貨不對辦，網頁上 model着的靚衫，到手時可能顏色、款式也有出入，不過本身做 model兼 now電視台節目《女皇駕到》主持的 Wiyona， 2年前以$5,000在 facebook開專頁 VIVA LA DIVA賣時裝，每日親自穿上不同時裝，真人做示範，吸引不少 OL及 model朋友幫襯，去年更找來友人合資，一連開兩間店鋪，連網店每月賺 4萬元。

Wiyona的 facebook跟其他少女一樣，內有不少靚相和自拍照，但不同之處，是每張相， Wiyona都沒有重複着同一套衫，感覺猶如看 fashion show。「呢啲全部係我鋪頭嘅衫，我每件都會着上身，影低相放上網，畀啲客睇效果。」
原來 Wiyona有開設 facebook專頁賣時裝，由她自己真人做示範，而且都是實物拍攝，自然比其他網店用韓妹、台妹的翻版照，有說服力得多。「有唔少 model朋友都會幫襯我，佢哋每次着咗套衫，都會影低 send畀我放埋上網，幫我做宣傳。」
今年 25歲的 Wiyona，已開了 facebook專頁 2年，最初創業是無心插柳。「我每次出騷都會影相放上網，好多人留言問我啲衫喺邊度買？問得多，覺得可以試吓賣，索性自己開個專頁。」
起初 Wiyona每次買衫時，會額外買多 2、 3件，放上 facebook試賣，頭一批貨只用了$5,000，「因為我每次接 job影相，都要着唔同衫，所以唔會買太貴，而且以 one piece裙為主，由百幾至 3百蚊不等，可能平，而且見到我着嘅效果，啲人有信心，所以反應好好。」客人以 OL和 model為主，她會以見面及郵寄方式交收。

利時新店開張，同公司 Model One的 Jessica C.亦有到來撐場，圖右一為 Wiyona的男友 Ben。

雖然自己開鋪， Wiyona仍然和朋友合作經營太子聯合廣場的鋪頭。

返國內入貨勁辛苦

Wiyona經常背着大背囊到韓國、內地等入貨。

結果首批貨，不用 1星期已沽清，為 Wiyona打下強心針，的起心肝認真去做，除了上網找香港批發，她還親自到韓國、泰國、內地等入貨，當中最辛苦便是到內地批發市場，因為地方大，每次要行足 10個鐘逐間睇和格價，加上最初不懂得寄貨，每次都要抬幾袋貨回港。
「雖然之後學識咗寄貨，但內地嘅貨好參差，每件要 check得好仔細，成日都有瑕疵，而且有時訂咗貨，收到都會發現有幾件貨不對辦，但退貨仲麻煩，惟有平賣咗佢。」現在 Wiyona已盡量不入內地貨，主要在香港和韓國入貨。
貨品多了，不可以單靠舊客， Wiyona開始在 blog及其他時裝網如 she.com等，自己做打手宣傳。「以前用手機自拍每日個 today look放上網，𠵱家要大搞，啲相要影靚啲，增加吸引力。」
於是找來相熟攝影師，借影樓及幫忙拍照，「仲會搵相熟化妝師幫手化妝，用盡人情牌嚟慳錢。」在無本生利下， Wiyona單靠專頁已月賺 2萬。

入股朋友的時裝店

本來只想輕鬆賺錢，但 11年 11月，朋友在太子聯合廣場的時裝店，因與拍檔拆夥，便找 Wiyona及另一位朋友一起入股，「我見網上生意都唔錯，亦想試吓開鋪，朋友負責看鋪，我就做 buyer入貨。」
然而開鋪跟網售大不同，令 Wiyona增添不少壓力，「開鋪要畀租金、人工，要提高衫嘅售價，而且款式亦要多啲，唔可以單入 one piece裙。」
由於聯合店面只得百餘呎，不可以存放太多貨，令 Wiyona每 2至 3日便要再入貨，加上要接 job，非常忙碌，曾經令她想暫停專頁，「有諗過開咗鋪，唔使再搞專頁，點知好多熟客話鍾意上網睇相，見到邊件鍾意，先落嚟鋪頭買。」
專頁繼續搞， Wiyona便要繼續影靚相，後期為了不想再麻煩朋友，惟有自己化妝，由男友 Ben操刀影相，「冇得喺 studio影，我哋就拖住幾喼衫喺街頭影，點知反應仲好過以前，啲客話以前喺 studio，覺得打晒燈點影都靚，但喺街邊影，感覺真實好多。」

Wiyona因為工作關係，經常要着 one piece裙，因此店內有一半以上屬連身裙款。黑色喱士連身裙$599

冷帽$169、墨綠色軍褸$650

豹紋連身裙$599

深藍色絨裙$599

自己開鋪增自主性

可惜地鋪減去各項開支後，只是收支平衡，加上與拍檔意見不合，「我負責做 buyer，但佢哋畀太多意見，叫我入啲咩貨，失去咗自主性。」
雖然仍然和朋友合作開鋪，但為了擁有完全屬於自己喜好的店鋪， Wiyona今年 11月，便與男友在尖沙咀利時商場開樓上鋪，百幾呎鋪，租金約 1萬。「今次鍾意入乜都得，除咗衫、裙外，我仲入咗好多鞋、袋同飾物。」
除了 one-piece裙外，還購入一些型格貨品，如窩釘款衣飾，定價由$200至$1,000不等，主攻熟客及年輕女性，「我哋仲會教埋佢哋襯衫，做埋 styling，希望可以吸引多啲客上嚟，最好買晒全身由頭到腳嘅衣飾。」
雖然租金夠平，但因為位處 17樓的樓上鋪，地方隔涉，更要落力宣傳，除了借衫給 model朋友穿着，和給雜誌拍照外， Wiyona和男友更親自落街派傳單，「其實都唔會尷尬，親自去派，可以睇吓啲客嘅反應，同埋親自 sell吓。」
像採訪當日，記者跟着他們派傳單，由於是靚仔靚女關係，也有不少人願意接傳單，還有客人即時上鋪頭睇衫。
店鋪趕及 12月旺季開業，首月生意頗理想，專頁加上店鋪生意額約 15萬，盈利有 4萬，未來 Wiyona還計劃出自家品牌，「我𠵱家已經嘗試喺啲貨上面加工，好似有個黑色背包，我哋自己搵咗間香港廠，幫我哋加上窩釘同公司 logo， D.I.Y.變成自己產品，好受歡迎， 1個星期已經賣咗 10個，遲啲希望可以有更加多唔同貨品。」

男友 Ben負責替 Wiyona在街頭取景，影相放上網。

當有新貨， Wiyona會在 facebook示範如何襯衫，吸引客人。

Wiyona找廠在黑色背包上加上窩釘，製成自家品牌，每個售$469。

因為是樓上鋪，要吸街客， Wiyona與男友要在街頭派傳單。

客人 Kety

我一向有喺 facebook專頁幫襯佢哋買衫，今次喺網上睇到條連身裙好鍾意，就上嚟鋪頭買。

租　金：$0（ facebook專頁）
入　貨：$5,000
總投資：$5,000

每月收支

租　金：$30,000（兩間店鋪）
入　貨：$60,000
人　工：$20,000（ 2人）
營業額：$150,000
盈　利：$40,000

VIVA LA DIVA

地址：尖沙咀利時商場 17樓 03室
網頁： http://www.facebook.com/vivaladiva.hk

點入貨？

Wiyona現時主要在韓國東大門及香港的香工時裝批發中心入貨，她提醒大家要小心寄貨問題，「除咗內地外，我都試過喺韓國寄貨，俾人溝咗其他唔要嘅貨入嚟，記得即時打電話或電郵投訴，第二次去補貨時，要再當面同佢哋講清楚，唔可以太 nice或就咁算，否則就會不停俾人溝貨。」
另外，入數時，記得 check清楚所有戶口資料，萬一過錯數，就要畀雙倍手續費。「仲有地址都要對清楚，最好畀晒中、英文地址，避免寄錯，始終啲貨有咩問題，最大損失都係自己。」