採訪當日，記者帶同 model Olivia接受 Catman催眠， Catman首先要了解她的意願，才可進行催眠， Olivia想找回 5歲時的快樂回憶。

青雲路

催眠治療師　解決奇難雜症

2013年01月02日 ~~ 第1093期交易通．搵車快線

催眠予人神秘的感覺，以為只會在電視劇集及電影情節中出現，催眠師能把人催眠而為所欲為。現實中，歐美十分流行催眠治療，透過催眠來減肥、戒煙、戒酒及解決情緒困擾等問題。 Catman最初亦被催眠神秘的一面所吸引，而報讀催眠課程，現時他已取得認可資格成為全職催眠治療師，為有需要的人士解決奇難雜症。

Olivia

接受催眠時，個影像有啲模糊，睇到同家姐玩嘅影像感覺好開心。

採訪當日，記者找來 model Olivia接受 Catman的催眠，首先 Catman問了一些簡單的問題，確立了這次催眠是要找回 Olivia 5歲時的快樂回憶，然後 Catman叫她坐上梳化調校好舒適的姿勢後就開始進行催眠，「你搵一個可以望到嘅位置、專心專注咁望住佢，放鬆、放鬆……你前面有間屋，屋前有道門，門後有一個好舒服嘅世界……你回想吓開心嘅感覺，件事大約喺五歲時發生……」
由開始到結束，大約用了 45分鐘時間，最後 Olivia所憶起的只是與姐姐在梳化上一起玩玩具的簡單畫面。 Catman說︰「有時個畫面可能好簡單，但喺嗰一刻對你心中嘅觸動最深。」

要同潛意識打交道

今年 29歲的 Catman，當了 4年催眠師，約有 400人曾接受過他的催眠治療。「我哋平時只會知道表意識嘅運作，表意識只會同一時間留意一樣事物，但其他嘅資訊同情緒都會收集喺潛意識入面，好似你行街專注搵前面嘅路，但途經嘅人、鋪頭等微小細節會儲存入潛意識。潛意識會暗地裏影響緊平時嘅行為，而催眠師透過催眠嚟幫助有需要嘅人同潛意識溝通，從而達至想要嘅效果同行為。」
於歐美社會，如戒煙、戒酒、減肥及解開情緒困擾等治療領域，都會利用催眠，以作心理上的輔導，令人的行為作出改變。
「我接到嘅 case大部分都係減肥同失眠問題，而客人 7成以上都係女性。催眠首要條件係被催眠者想做某一件事，你先幫到佢，好似佢想減肥，就令佢諗點先減到肥，再幫佢加強心中對做運動或者節食嘅動力，從而改變佢日常行為，達到減肥嘅目的。我哋會透過催眠向佢哋做暗示，例如見到人食橙，就想落街跑步。如果被催眠嘅人根本唔想減肥，催眠治療就冇效。」

雙腳無力重新行路

催眠進行了差不多 45分鐘， Catman初段時會拿起 Olivia的手，測試她是否進入催眠狀態。

最令 Catman難忘的個案，是他幫助一名坐輪椅的人重新行路，「個 client喺中學時左腳開始冇力，慢慢要用柺杖行路，到搵我嗰陣已經要坐輪椅，連對手都開始乏力，佢去醫院檢查過，身體及肌肉發展都冇問題；心理醫生話佢心理上有障礙，但冇實質辦法幫到佢，輾轉搵到我。」
催眠有時未必找到問題根源，但可以從另一角度去解決，「我首先嘗試催眠佢，睇吓有咩原因令佢全身乏力，但試咗幾次都搵唔到因由。我知道佢身體機能冇問題，而佢又好想行得番，於是我喺催眠過程直接暗示佢係可以行嘅，佢喺催眠狀態下，慢慢企到起身，仲可以向前行到幾步。之後我畀佢睇番條錄影片段，佢知道自己真係可以行到，佢𠵱家接受物理治療，好似平常人咁行番路。」

催眠乜都得？

有不少電影和電視劇提到催眠可以操控別人為自己做事，甚至殺人。現在由 Catman拆解箇中奧秘：

石修催眠法

石修催眠法近年可謂瘋魔網絡，不少網友用來惡搞。圖為《隔世追兇》石修施展催眼的一幕。

石修催眠法是出自 04年播影的電視劇《隔世追兇》，當中有一幕提到石修被兇徒襲擊，石修利用對方流血在地上，並大聲數出：「 1滴、 2滴、 3滴。」最後成功催眠對方，救回自己性命。 Catman說：「要做到好似劇中咁深層嘅催眠，短時間內冇可能做到，而且催眠最緊要係順應被催眠者嘅意願先可以成功，如果係完全違反佢嘅邏輯同意願，係催眠唔到佢。」

令人產生幻覺

《不速之約》內，林峯會咬蘋果，令歐陽震華進入催眠狀態。

11年的電視劇《不速之約》中，再現催眠橋段，劇中林峰令歐陽震華產生幻覺，令他以為自己是魔鬼，無所不能， Catman解說︰「催眠分為 6級，平時幫人催眠治療改善行為只係需要 1、 2級；我唔知佢之前準備咗幾耐，要去到 5或 6嘅深層催眠，先會產生幻覺，閒閒哋要用 2個鐘以上，而且只可以維持好短時間，絕對冇劇中講到咁誇張。」

催眠是否能令人自殺/殺人

日本電影《催眼》有不少用催眠來殺人的情節。

不少電影情節中，催眠可以令人自殺或殺人， Catman說：「其實催眠一個人，唔係整傻咗佢，只係令佢進入潛意識狀態，表意識仲係運作緊，催眠期間會意識到外在事物，如果你叫佢自殺或者傷害自己，人第一時間就會自我保護，立即會醒，所以催眠人自殺係做唔到。其實催眠令人做嘢要合乎番被催眠者嘅道德同情緒，如果佢覺得殺人唔啱就一定做唔到。」

智商高易被催眠

催眠的成功率取決於很多因素，例如舒適、寧靜、對催眠師的信任都有助被催眠者進入催眠狀態，而撇除這些外在因素，原來有些人真會較易受催眠， Catman說︰「其實催眠界都做咗好多研究，除咗女性和感性嘅人外，年紀細同智商高嘅人都比教容易被催眠。由於年紀細通常閱歷冇咁深，雜念會少，而智商高嘅人想像力同信息處理能力都會較高，兩者都容易進入催眠狀態。職業方面，畫家會較易受催眠，因為想像力愈豐富嘅人愈易受到催眠。」

兒時小事影響行為

為推廣催眠治療， Catman成立香港催眠學院，開班授徒。

有時只是兒時的一件小事，已可能影響到人的行為，「有個病人每次喺一班人前 present或者分享就會緊張同口窒，但平時傾偈又冇問題。因為佢結婚擺酒當日要上台分享，所以嚟搵我，初頭以為佢怕醜，催眠咗先發覺佢讀小學時好鍾意發問，有次上堂問得太多問題俾老師罰企，自此佢驚咗喺一班人面前講嘢，我幫佢審視番件事，令佢諗通其實唔係咁嚴重，𠵱家佢喺一大班人面前講嘢都唔再緊張。」
讀電腦出身的 Catman，在 5年前接觸到催眠，自此令他對催眠充滿興趣，「有個朋友識催眠，佢喺我面前表演，令人產生幻象見唔到眼前嘅杯，嗰刻覺得催眠好犀利同神秘。」
最初 Catman是跟朋友學，後來在香港找到催眠治療師的課程，分別考取美國國家催眠師公會，及美國催眠治療委員會的認可證書，「嗰陣未有穩定客源，而自己又搞緊 cafe，因為間 cafe嘅主題係心理學，有唔少客人願意接受催眠治療，我會免費幫佢哋，當儲經驗，冇將佢當成職業。」

開班教學宣揚催眠

Catman接受過多個傳媒訪問，包括亞視節目《我要做特首 2》。

其後累積了經驗和知名度，並有客人主動找 Catman接受治療，為了成為全職催眠治療師，不想分身搞生意。 09年， Catman將 cafe結束，並開設香港催眠治療中心，鑑於香港並不流行催眠治療，他以平價收費來吸引客人。
「行內催眠治療師多數係按小時收費，唔理有冇效都要畀錢，而我就按 case計，無論見幾多次都係收一個價錢，如果冇效仲會退番錢，希望多啲人認識同嘗試催眠治療。」 Catman每個個案收費約$2,200至$3,500，每個月約有 8至 10個個案，約有$20,000的收入。
在 11年 Catman成功取得催眠培訓講師資格，開辦了香港催眠學院，「我見坊間都有教人催眠嘅課程，而我自己都報讀過，發覺冇實習機會畀到學員，於是就打算將治療中心同學院結合。」
說到未來發展， Catman希望令大眾認識催眠治療，「催眠治療可以幫到有需要嘅人，除咗開班，我仲有接受媒體訪問，

Michael學員

我本身做金融，對心理學方面嘅嘢都有興趣，有次喺網上見到呢到有得學催眠治療，覺得學多樣技能都冇壞，而且 Catman仲有個案畀到我哋去實習，唔係紙上談兵。

Ivan客人

我係一個飛鏢手，喺前排參加掟鏢比賽，一上場就會緊張到手震同全身繃緊，之後問題嚴重到平時玩吓都會出現呢個狀況，於是搵 Catman接受催眠治療，做咗 2次，發現我好耐之前喺一次掟鏢比賽中失手而令成隊人輸咗，影響到自己好緊張，𠵱家正視番個問題根源，心結解咗已經冇事。

點入行？

不像外國，在香港催眠治療沒有受到規管，不用註冊都可以做催眠治療， Catman：「如果想成為催眠治療師，可以報讀國際認可嘅催眠治療師課程，學習專業技巧，考到牌後執業，畀到客人嘅信心。」一般催眠治療師按小時收費，由$1,000起。

註冊催眠治療師課程

機構︰香港催眠學院
時間︰ 120小時
學費︰$11,800
內容︰進行自我催眠、洞悉社會上的催眠現象、了解人類的行為構成原因、利用催眠治療改善習慣及能力、獨立處理個案及實踐專業催眠治療，成功畢業和通過考試後可註冊成為美國國家催眠師公會催眠治療師，及美國催眠治療協會催眠治療師，資格得到國際認可。
查詢︰ http://www.hypno.hk