來到旅程的尾聲，順利搭順風車平安從西藏回到雲南，「我哋坐喺車站外食啲乾糧，等過夜火車去大理再轉火車返廣州……雖然成日要轉車轉船好奔波，但我哋唔想成日搭飛機咁唔環保！」

Main Camp

4個月窮遊 40城「求救」　浸大情侶走過歐亞大地

2013年01月02日 ~~ 第293期 Face

香港人去旅行，兩個人 8萬蚊還能走一轉 7日東京，豪食靚壽司再 shopping入幾件名牌靚衫已剩無幾。
偏偏現讀浸大數碼圖像傳播系 3年級、 22歲的李明燕（ Celesty），卻可以用 8萬蚊跟男友兼同系師兄葉皓麟（ Alan）走勻歐亞 12個國家共 40多個城市，沿途為慳錢食麵包坐巴士，雖然未有「走過烽火大地」，但 Celesty在 4個歐洲地方舉「 Seeking For Help」紙牌扮求救，才令今次旅程特別難忘。

將 4個月的旅程剪輯成自己的畢業作品，剪接相當有心機之餘，又加入很多後期製作，想睇可到 vimeo.com搵 ciao traveler就可以睇到。

Celesty與任職多媒體設計的同校師兄 Alan拍拖 3年，去年年尾 Celesty向校方申請休學一年，先到德國一間設計公司做實習生，儲夠旅費後，便開始展開 4個月的流浪之旅。
為了百多天的旅程可慳到盡， Celesty和 Alan先在法國會合，沿途中多以深宵巴士或船代替飛機慳酒店錢， Celesty坦言：「有次由希臘去羅德島架深宵船撞啱有班專業背包族，俾佢哋搶先一步霸咗個靚位，結果惟有瞓走廊，如果要有間房，船票就要貴 10倍，𠵱家冇房冇凳都要 30歐羅（約 300港元）！」

羅馬　扮接機

Celesty在羅馬機場，站在一班接機的意大利人身旁， Celesty說：「都有人用啲奇怪目光望我，不過我都唔會理。」

巴黎　親切婆婆

在出名雜多黑人的巴黎北站企了約 5分鐘，就有一位年約七十的婆婆主動幫手， Celesty向她指明鏡頭時還友善微笑：「可惜我哋趕時間，冇得同佢詳細咁傾偈。」

Celesty還特意邀請法籍朋友寫了法文版「 Seeking For Help」在法國巴黎火車站大派用場。

測試人性

Alan同 Celesty主要用 Canon ED Mark II和 Sony Nex 5N拍攝，還帶了手動鏡頭和一支移軸鏡。為了能夠測試不同地方的人的熱心程度， Alan要在火車站搵隱敝位匿埋用長鏡偷拍。

慳家旅行預咗，但完成旅程後， Celesty將行程剪輯成畢業作品短片，片中見 Celesty經常舉住「 Seeking For Help」牌求助， Celesty說：「其實我只係想測試吓有冇人會幫我哋，啲片係男友企遠處偷影嘅，因為我怕男友太 man冇人肯幫，一般企 5分鐘就會有人幫我，咁我就同佢哋解釋我只係做實驗，通常態度都好友善。」
Celesty今次舉牌地點只揀歐洲大城市如巴黎、倫敦等地的火車站，她亦後悔說：「揀火車站只係貪人流集中，後期去到亞洲因太攰冇再拍，我自己都好後悔，覺得唔應該咁懶！經過今次之旅，我覺得旅客之間可以透過手機 app去增加溝通同互相幫助，如果 app真係研發成功固然好，不過呢方面已經超過今次旅程的預期。」
整個旅程雖然不奇幻，但 Celesty仍然感激男友支持：「冇佢個旅程根本完成唔到，可能要縮短一半，而且啲行李太重啦，有佢幫手會好好多，我去到每個地點都盡量會 send相返香港，父母都唔太擔心嘅。」而 Alan亦說：「 Celesty去咗 4個月都係買咗一份手信，呢個時代真係好難搵到呢類女仔，大家感情更深厚。」